ដោយ សោភ័ណ
2009-08-05
RFAលោកនាយករដ្ឋមន្ត្រី ហ៊ុន សែន នៅថ្ងៃទី៥ សីហា ២០០៩ បានអំពាវនាវឲ្យមន្ត្រីរាជការត្រូវអនុវត្តច្បាប់ចរាចរណ៍ឲ្យបាន គ្រប់គ្នាដើម្បីការពារសុវត្ថិភាពក្នុងពេលបើកឡាន បើកម៉ូតូនិងធ្វើដំណើរ។
សកម្មភាព នគរបាលចរាចរណ៍ចាប់ឃាត់ម៉ូតូដែលមិនដាក់កញ្ចក់ និងម្ចាស់មិនពាក់មួក នៅលើវិថីព្រះនរោត្តម នាថ្ងៃទី៥ សីហា ២០០៩។
លោកនាយករដ្ឋមន្ត្រីខ្មែរ មានប្រសាសន៍ថា លោកបានសង្កេតឃើញប្រជាពលរដ្ឋនៅក្នុងទីក្រុងភ្នំពេញ ពី ៧០ ទៅ ៨០%ហើយ ដែលបានគោរពច្បាប់ចរាចរណ៍ដោយមានពាក់មួកការពារក្បាលនៅពេលជិះ ម៉ូតូ ប៉ុន្តែលោកបានសង្កេតឃើញអ្នកពាក់ឯកសណ្ឋានជានគរបាលនិងកងទ័ពអត់ ពាក់មួកទេ។
លោកនាយករដ្ឋមន្ត្រី ហ៊ុន សែន ថ្លែងយ៉ាងដូច្នេះ ៖ «សូមយកឱកាស នេះអំពាវនាវឲ្យមន្រ្តីរាជការនិងកម្លាំងប្រដាប់អាវុធធ្វើជាគំរូ ក្នុងការពាក់មួក ព្រោះខ្ញុំមកអម្បាញ់មិញហ្នឹង ក៏ឃើញអ្នកពាក់ឯកសណ្ឋានជានគរបាលនិងកងទ័ពគ្មានពាក់មួកដែរ ហើយចុះបើនគរបាលខ្លួនឯង និងកងទ័ពអត់ពាក់មួក អ៊ីចឹងធ្វើម៉េចទៅ? អ៊ីចឹងទាំងមន្រ្តីរាជការ និងកម្លាំងប្រដាប់អាវុធត្រូវពាក់មុនគេ»។
អគ្គស្នងការរងនគរបាលជាតិលោក អ៊ុក គឹមលេខ មានប្រសាសន៍ថា ចាប់តាំងពីថ្ងៃអនុវត្តច្បាប់ចរាចរណ៍ឲ្យមានការគោរពត្រឹមត្រូវ នៅថ្ងៃទី១ សីហា មក នគរបាលបានឃាត់ម៉ូតូចំនួនជាង១ម៉ឺនគ្រឿងហើយ ដែលមិនដាក់កញ្ចក់មើលក្រោយ អត់ផ្លាកលេខ និងអ្នកបើកបរមិនពាក់មួក ហើយនិងរថយន្តចំនួនជាង ៦០គ្រឿងដែលអត់មានផ្លាកលេខ។
លោក អ៊ុក គឹមលេខ ថ្លែងយ៉ាងដូច្នេះថា ៖ «៤ថ្ងៃនេះសរុបទៅបាន ១៥.៦១៦គ្រឿង រថយន្ត ៦៧គ្រឿង។ រថយន្តអត់ផ្លាកលេខ សំពីងសំពោង និងខុសលក្ខណៈបច្ចេកទេស។ ឧទាហរណ៍ថា ច្នៃតសាក់ស៊ីខុស»។
ទោះជាយ៉ាងណា អ្នករត់តាក់ស៊ីពីខេត្តតាកែវមកភ្នំពេញមួយរូប បានអះអាងថា លោកតែងធ្វើដំណើរតាមផ្លូវជាតិលេខ២ ហើយក្រុមនគរបាលក្រុងតាខ្មៅក្នុងខេត្តកណ្តាលបានទារលុយពីលោក ៧.០០០រៀលនៅពេលដែលក្រុមនគរបាលទាំងនោះបានឃាត់ឡានលោកដើម្បីឆែក រកប័ណ្ណបើកបរនិងពិនិត្យផ្លាកលេខ។
ពាក់ព័ន្ធនឹងការទារលុយនេះ អគ្គស្នងការរងនគរបាលជាតិ លោក អ៊ុក គឹមលេខ មានប្រសាសន៍ថា លោកមិនបដិសេធទេ ប្រហែលជាអាចមានតិចតួចជាលក្ខណៈបុគ្គល ពីព្រោះលោកថា ប្រតិបត្តិការនេះមានកម្លាំងមានសមត្ថកិច្ចចម្រុះ ដោយក្នុងមួយក្រុមមានប៉ូលិស៧នាក់ កងរាជអាវុធហត្ថ ៥នាក់ អនុប្រធានស្រុក ឬខណ្ឌ១រូប ខាងក្រសួងសាធារណការនិងដឹកជញ្ជូនមួយរូប ដូច្នេះពួកគេមិនអាចប្រព្រឹត្តអំពើពុករលួយបានងាយៗទេ។
លោកក៏បានអំពាវនាវដល់ប្រជាពលរដ្ឋទាំងអស់ថា ប្រសិនបើមានមន្ត្រីណាមួយបានប្រព្រឹត្តអំពើពុករលួយ សូមឲ្យរាយការណ៍ទៅក្រសួងមហាផ្ទៃពីសកម្មភាពនោះ ដើម្បីចាត់វិធានការ៕
No comments:
Post a Comment