ដោយ មុំ សុផុន
2009-08-01
វិទ្យុអាស៊ីសេរី
ស្នងការនគរបាលក្រុងភ្នំពេញ លោក ទូច ណារ៉ុថ បានថ្លែងនៅថ្ងៃទី១ ខែសីហា ឆ្នាំ២០០៩ ថា សមត្ថកិច្ចប៉ូលិសចរាចរណ៍ បានចាប់ផ្តើមយុទ្ធនាការរឹតបន្តឹងនិងបង្ខំឲ្យអ្នកដែលប្រើប្រាស់ ម៉ូតូនៅតាមដងផ្លូវទាំងអស់គោរពច្បាប់ចរាចរណ៍ រួមមានពាក់មួកសុវត្ថិភាព បំពាក់កញ្ចក់សម្រាប់មើលក្រោយ រួមទាំងរថយន្តត្រូវមានស្លាកលេខសម្គាល់ឲ្យបានត្រឹមត្រូវ។
ក្រុម យុវជន ជិះ ម៉ូតូ លើ ដង វិថី មួយ ក្នុង ទីក្រុង ភ្នំពេញ នា ថ្ងៃ ទី ១ សីហា ២០០៩។ (RFA Photo/Sophorn)
លោក ទូច ណារ៉ុថ បានថ្លែងទៀតថា គ្រោះថ្នាក់ចរាចរណ៍ដែលកើតឡើងនាពេលកន្លងមក ហើយបណ្តាលឲ្យបាត់បង់ជីវិតនោះ គឺបណ្តាលមកពីជនរងគ្រោះមិនគោរពច្បាប់ចរាចរណ៍និងមិនបានប្រើមួក សុវត្ថិភាព។
លោក ទូច ណារ៉ុថ ថ្លែងដូច្នេះថា ៖ «គាត់មិនទាន់យល់អំពី សារសំខាន់នៃការប្រើប្រាស់មួកសុវត្ថិភាពដើម្បីថែរក្សាអាយុជីវិត គាត់ទេ អ៊ីចឹង ឥឡូវ យើងត្រូវចាប់បង្ខំឲ្យគាត់ត្រូវតែគោរពតាមរយៈការរឹតបន្តឹង ព្រោះឥឡូវនេះ ការរឹតបន្តឹងរបស់យើងគឺមិនមានអ្វីទេ គ្រាន់តែថា ឃាត់ម៉ូតូគាត់ រួចហើយឲ្យគាត់ទិញមួកការពារសុវត្ថិភាពដើម្បីប្រើប្រាស់ ហើយមួកសុវត្ថិភាពដែលគាត់ទិញមក គឺដើម្បីពាក់ការពារអាយុជីវិតគាត់តែប៉ុណ្ណឹងទេ»។
លោកបានថ្លែងទៀតថា សមត្ថកិច្ចនឹងដកហូតម៉ូតូនិងរថយន្តទុកសិន លុះដល់ម្ចាស់បានបំពេញតាមលក្ខខណ្ឌនៃច្បាប់ចរាចរណ៍ហើយ ទើបប្រគល់ឲ្យម្ចាស់វិញ។
ចំណែកឯលោក សែម បញ្ញាវុឌ្ឍ អ្នកគ្រប់គ្រងប្រព័ន្ធព័ត៌មានជនរងគ្រោះនិងគ្រោះថ្នាក់ចរាចរណ៍ ផ្លូវគោករបស់អង្គការជនពិការអន្តរជាតិ បែលហ្ស៊ិក បានមានប្រសាសន៍ថា ក្នុងឆ្នាំ២០០៨ មានជនរងគ្រោះដោយគ្រោះថ្នាក់ចរាចរណ៍ចំនួន ២៥.៧៩៦នាក់ អ្នករបួសធ្ងន់ចំនួន ៧.២២៦នាក់ និងស្លាប់ចំនួន ១.៦៣៨នាក់។
——————————————————————————————————————————————————————-
«ខ្ញុំយល់ថា ប៉ូលិសចរាចរណ៍ចាប់មួក កញ្ចក់ ស្លាកលេខនេះ គឺល្អហើយ ប៉ុន្តែចំពោះខ្ញុំអ្នករត់ម៉ូតូឌុបវិញ ម៉ូតូចាស់មានតែកញ្ចក់ទេ
ប៉ុន្តែស្លាកលេខ ខ្ញុំអត់ទាន់មានលុយធ្វើទេ។ ថ្ងៃណាមួយ ខ្ញុំនឹងធ្វើឲ្យគ្រប់គ្រឿងដើម្បីកុំឲ្យប៉ូលិសចរាចរណ៍ចាប់» អ៊ុក ថា, អ្នករត់ម៉ូតូឌុប
——————————————————————————————————————————————————————-
លោកថ្លែងទៀតថា ក្នុងចំណោមអ្នកស្លាប់ដោយគ្រោះថ្នាក់ចរាចរណ៍នោះ មាន ៨៦% ប៉ះទង្គិចក្បាល ហើយមិនបានប្រើមួកសុវត្ថិភាព ៖ «អ្នកបើកបរគាត់ ប្រើប្រាស់លឿន គាត់ពិសារគ្រឿងស្រវឹង គាត់បើកបរក្នុងស្ថានភាពប្រជែងជាដើម និងការមិនគោរពសិទ្ធិអាទិភាព។ ទាំងអស់នេះ សុទ្ធតែបណ្ដាលមកពីកត្តាមនុស្ស ដូច្នេះយើងគិតថា គ្រោះថ្នាក់ចរាចរណ៍យើងអាចបង្ការបាន ប្រសិនបើប្រជាពលរដ្ឋយើងផ្លាស់ប្ដូរឥរិយាបថខុសឆ្គងទាំងនេះ ដោយងាកមករកការគោរពច្បាប់ នោះយើងសង្ឃឹមថា ចំនួននៃគ្រោះថ្នាក់ចរាចរណ៍ ក៏ដូចជាជនរងគ្រោះនៅក្នុងប្រទេសកម្ពុជានឹងមានការថយចុះ»។
លោក អ៊ុក ថា អាយុ ២៤ឆ្នាំ ជាអ្នករត់ម៉ូតូឌុបក្នុងទីក្រុងភ្នំពេញ បានថ្លែងថា ការរឹតបន្តឹងរបស់ក្រុមប៉ូលិសនេះគឺដើម្បីជំរុញកាន់តែខ្លាំង ឲ្យប្រជាពលរដ្ឋគោរពច្បាប់ចរាចរណ៍ឲ្យបានគ្រប់គ្នា ៖ «ខ្ញុំយល់ ថា ប៉ូលិសចរាចរណ៍ចាប់មួក កញ្ចក់ ស្លាកលេខនេះ គឺល្អហើយ ប៉ុន្តែចំពោះខ្ញុំអ្នករត់ម៉ូតូឌុបវិញ ម៉ូតូចាស់មានតែកញ្ចក់ទេ ប៉ុន្តែស្លាកលេខ ខ្ញុំអត់ទាន់មានលុយធ្វើទេ។ ថ្ងៃណាមួយ ខ្ញុំនឹងធ្វើឲ្យគ្រប់គ្រឿងដើម្បីកុំឲ្យប៉ូលិសចរាចរណ៍ចាប់»។
នៅក្នុងការពង្រឹកការអនុវត្តច្បាប់ចរាចរណ៍ផ្លូវគោកនេះឲ្យបាន ល្អប្រសើរ កាលពីចុងឆ្នាំ២០០៨ លោកនាយករដ្ឋមន្រ្តី ហ៊ុន សែន បានមានប្រសាសន៍អំពាវនាវទៅកាន់ប្រជាពលរដ្ឋខ្មែរគ្រប់រូបដែលបើកបរ ម៉ូតូឲ្យប្រើប្រាស់មួកសុវត្ថិភាពទាំងអស់គ្នាដើម្បីការពារជីវិត ឲ្យជៀសផុតពីគ្រោះថ្នាក់ចរាចរណ៍។
លោកនាយករដ្ឋមន្រ្តីបានបញ្ជាក់ថា គ្រោះថ្នាក់ចរាចរណ៍បានជាប់ចំណាត់ថ្នាក់លេខ១ក្នុងការសម្លាប់ជីវិតប្រជាពលរដ្ឋខ្មែរ៕
No comments:
Post a Comment