ស្រវឹងស្រា​បើករថយន្ត​បុក​ដើម​ក្ងោក​មួយ​ទំហឹង បាក់​រថយន្ត​ជា​ពីរ​កំណាត់​

ដោយ : សុ​ពិសិដ្ឋ (ថ្ងៃទី 9 មិថុនា 2009)
CEN News
ភ្នំពេញ​: យុវ​និស្សិត​ម្នាក់ រងរបួស​ធ្ងន់ និង​មិត្តភ័​ក្រស្រី​ម្នាក់​រងរបួសម​ធ្យ​ម ក្នុង​ហេតុការណ៍​គ្រោះថ្នាក់​ចរាចរណ៍​មួយ ដោយសារ​ស្រវឹងស្រា បើករថយន្ត​ទៅ​បុក​ដើម​ក្ងោក​មួយ​ទំហឹង បណ្តាល​ឲ្យ​រថយន្ត​បាក់​ជា​ពីរ ។ បើ​តាម​សមត្ថកិច្ច​អះអាងថា រថយន្ត​នេះបើក​​លឿន​ណាស់ ហើយ​អ្នកបើកបរ​ទំនង​ជា​ស្រវឹងស្រា​ខ្លាំង ។​
​
គ្រោះថ្នាក់​ខាងលើនេះ បាន​កើតឡើង​កាលពី​វេលា​ម៉ោង ០០ និង ១០ នាទី អធ្រាត្រ​ថ្ងៃ​ទី ៩ មិថុនា​នេះ នៅ​ចំណុច​ផ្លូវ​សហព័ន្ធរុស្ស៊ី មុខ​ក្រសួង​ការពារជាតិ ស្ថិតក្នុង​សង្កាត់​ស្រះចក ខណ្ឌដូនពេញ ។​
​
ប៉ូលិស​និយាយថា រថយន្ត​បង្ក​ម៉ាក COROLLA ពណ៌​ស្លែ ពាក់​ស្លាក​លេខ​ភ្នំពេញ 2F 7733 បើកបរ​ដោយ​ឈ្មោះ យិន ចំរើន ភេទ​ប្រុស ២៣ ឆ្នាំ មុខរបរ​និស្សិត ស្នាក់នៅ​សង្កាត់​ទួល​ស្វាយព្រៃ​II ខណ្ឌចំការមន រងរបួស​បាក់​ជើងឆ្វេង និង​ប្រអប់ជើង​ស្តាំ ចំណែក​មិត្តភ័​ក្រ​ម្នាក់ទៀត ជិះ​ពីក្រោយ​រងរបួស​មធ្យម ។​
​
ប៉ូលិស​បញ្ជាក់ថា មុន​កើតហេតុ​រថយន្ត បើក​តាម​ផ្លូវ​សហព័ន្ធរុស្ស៊ី ពី​កើត​ទៅ​លិច​យ៉ាង​លឿន លុះដល់​ចំណុច​ខាងលើ​ក៏​ជ្រុល​ចង្កូត​ឡើង​ចិញ្ចើមផ្លូវ​បុក​ដើម​ក្ងោក បណ្តាល​ឲ្យ​រថយន្ត​បាក់​ជា​ពីរ​កំ​ណាត់​, ពោង​សុវត្ថិភាព​ទាំង ២ បាន​ផ្ទុះ ប៉ុន្តែ​មិន​អាច​ជួយ​ជនរងគ្រោះ​រួច​ផុត​ពី​គ្រោះថ្នាក់​បាន​ឡើយ ។ យិន ចំរើន ត្រូវបាន​បញ្ជូន​ទៅ​មន្ទើរពេទ្យ​កាល់ម៉ែត ដើម្បី​ជួយសង្គ្រោះ ចំណែក​មិត្តភ័​ក្រស្រី​ដេក​ពេទ្យ​ឯកជន រីឯ​រថយន្ត​ប៉ូលិស​ស្ទូច​យកទៅ​រក្សាទុក នៅ​សាលា​រាជធានី​ភ្នំពេញ ដើម្បី​ចាត់ការ​តាមច្បាប់ ៕

រថយន្តបុក​ជាប់​ដើម​ក្ងោក (​រូប​: សុ​ពិសិដ្ឋ​)​

រថយន្ត​ដែល ​យិន ចំរើន បើក​បុក​ដើម​ក្ងោក​បាក់​តួ​ជា ២ កំណាត់ (​រូប​: សុ​ពិសិដ្ឋ​)