រថយន្ត​ធំ​រអិល​បុក​រថយន្ត​តូច ៣ គ្រឿង របួសធ្ងន់​ម្នាក់​

ដោយ : សមុទ្រ (ថ្ងៃទី 12 មិថុនា 2009)
CEN news
ព្រះសីហនុ​ ​: រថយន្ត​ទំនើប​ចំនួន ៣ គ្រឿង បាន​រង​ការខូចខាត​ ដោយសារ​រថយន្ត​ធុន​ធំ​ដឹក​ឥដ្ឋ​មួយ​គ្រឿង​រអិល​កៀរ កាលពី​យប់​ថ្ងៃ​ទី១១ ខែមិថុនា ខណៈពេល​រថយន្ត​ទាំង ៣ នោះ​ចត​នៅ​ស្ងៀម ខាង​មុខ​កំពង់ផែ​ស្វយ័​ត​ក្រុងព្រះសីហនុ ។
​
ប៉ូលិស​ចរាចរណ៍​ខេត្ត​ព្រះសីហនុ​បានឲ្យដឹងថា ​: រថយន្ត​បង្កហេតុម៉ាក FUSO ប្រភេទ​ដឹកទំនិញ​ធ្ងន់​ពណ៌​ខៀវ កម្មសិទ្ធិរបស់​ឈ្មោះ សុខ ជា បើកបរ​ដោយ​ឈ្មោះ ហេង ភេទ​ប្រុស អាយុ ៤៥ ​ឆ្នាំ មាន​ទីលំនៅខេត្ត​ព្រះសីហនុ បាន​ដឹក​ឥដ្ឋ​មកពី​ភ្នំពេញ លុះ​មកដល់កន្លែង​ក​កើតហេតុ​ស្រាប់តែរអិល កាច់ចង្កូត​លែង​ស៊ី ក៏​ជ្រុល​ទៅបុក​រះ​លើ​រថយន្ត​ទំនើបៗ អស់ចំនួន ០៣ គ្រឿង ដែល​ចត​ជិតៗ​គ្នា​បណ្តាលឲ្យ​ខូចខាតស្ទើរ​ទាំងស្រុង និង​បណ្តាល​ឲ្យ​តៃកុង​រថយន្ត FUSO របួសធ្ងន់​ ។

រថយន្ត​រងគ្រោះ​ទាំង​៣ ទី​១. ម៉ាក មី​ក​ស៊ុយ​ប៊ីស៊ី PAJERO ពណ៌​ខៀវចាស់ លាយ​ពណ៌​ទឹកប្រាក់ ពាក់​ស្លាក​លេខ ក្រ​.​សីហនុ 2A 0445 ជា​កម្មសិទ្ធិរបស់​ឈ្មោះ អ៊ូច សំអាត (​ខូចខាត​កម្រិតធ្ងន់​) ទី​២. ម៉ាក តូ​យូ​តា Luxus ពណ៌​ខៀវ ស្លាក​លេខ​ ភ្នំពេញ 2I 1206 កម្មសិទ្ធិរបស់​ឈ្មោះ អ៊ុំ វុទ្ធី (​ខូចខាត​កម្រិត​មធ្យម​) និង​រថយន្ត​ទី​៣ Luxus ពណ៌​ទឹកមាស ពាក់​ស្លាក​លេខ ក្រ​.​សីហនុ 2A 2772 ជា​កម្មសិទ្ធិ របស់​ឈ្មោះ ទេព ចិន្តា (​ខូចខាត​កម្រិត​មធ្យម​) បច្ចុប្បន្ន រថយន្ត​ទាំង ០៤ គ្រឿង​ត្រូវបាន ប៉ូលិស​យក​មក​រក្សាទុក​នៅ​ការិយាល័យ​ប៉ូលិស​ចរាចរណ៍​ផ្លូវគោក ខេត្ត​ព្រះសីហនុ​ដើម្បី ធ្វើ​ការដោះស្រាយ ចំណែក​តៃកុង​រថយន្ត​បង្កហេតុ​ដែល​បាន​រងគ្រោះ​កំពង់​ស្ថិត​ក្នុង​ ការសង្គ្រោះ​ក្នុង​មន្ទី​រ​ពរទ្យ​ឯកជនក្នុង​ខេត្ត​ព្រះសីហនុ ៕