កំពង់ស្ពឺ: មន្ត្រីប៉ូលិសម្នាក់បានរងរបួសសន្លប់ ត្រូវបានគេដឹកទៅសង្គ្រោះ នៅមន្ទីរពេទ្យបង្អែកខេត្តកំពង់ស្ពឺភ្លាមៗ ដោយសារគ្រោះថ្នាក់ចរាចរជិះម៉ូតូបុកគ្នា ដួលបោកត្រូវក្បាល ។ ករណីគ្រោះថ្នាក់នេះកើតឡើងនៅវេលាម៉ោង ៤ និង ៥០ នាទី ល្ងាចថ្ងៃទី ៥ ខែមិថុនា ឆ្នាំ២០០៩ តាមផ្លូវជាតិលេខ ៤ ចន្លោះគីឡូម៉ែត្រលេខ ៤៦-៤៧ ចំណុចភូមិពាណិជ្ជកម្ម សង្កាត់រការធំ ក្រុងច្បារមន ខេត្តកំពង់ស្ពឺ ។
អ្នកឃើញហេតុការណ៍បានឲ្យដឹងថា នៅវេលាម៉ោង ៤ និង ៥០ នាទីល្ងាចថ្ងៃទី ៥ ខែមិថុនា ឆ្នាំ២០០៩ គេបានឃើញ បុរសម្នាក់ស្លៀកពាក់ឯកសណ្ឋានប៉ូលិសបានជិះម៉ូតូហុងដា C125 ស៊េរី ២០០៥ ពណ៌ក្រហមគ្មានស្លាកលេខ បើកបរយ៉ាងលឿនតាមបណ្ដោយផ្លូវជាតិលេខ ៤ ក្នុងទិសដៅពីកើតទៅលិច ។ ពេលបើកបរមកដល់ចន្លោះគីឡូម៉ែត្រលេខ ៤៦-៤៧ ត្រង់ចំណុចភូមិពាណិជ្ជកម្ម សង្កាត់រការធំ ក្រុងច្បារមន ស្រាប់តែមាន ម៉ូតូហុងដា C125 ពណ៌ខ្មៅមួយគ្រឿងទៀត ស៊េរី ២០០៥ ពាក់ស្លាកលេខភ្នំពេញ 1J 1587 បើកឆ្លងកាត់ផ្លូវពីត្បូងទៅជើងក្នុងទិសបញ្ច្រាសគ្នា បណ្ដាលឲ្យម៉ូតូទាំងពីរនេះបុកគ្នាយ៉ាងខ្លាំង ធ្វើឲ្យអ្នកបើកបរម៉ូតូហុងដា C125 ពណ៌ក្រហមបានដួលបោកក្បាលសន្លប់នៅលើផ្លូវជាតិ ហើយត្រូវបានរថយន្តសង្គ្រោះ របស់ប៉ូលិសចរាចរខេត្តកំពង់ស្ពឺ ដឹកយកទៅកាន់មន្ទីរពេទ្យបង្អែកខេត្ត ដើម្បីជួយសង្គ្រោះ និងព្យាបាល ។
មន្ត្រីប៉ូលិសចរាចរខេត្តកំពង់ស្ពឺបានឲ្យដឹងថា អ្នកដែលរងរបួសក្នុងហេតុការណ៍នេះឈ្មោះ មៀច សារ៉ន មន្ត្រីប៉ូលិសនៅស្នងការដ្ឋាននគរបាលខេត្តកំពង់ស្ពឺ ។ ចំណែកអ្នកបើកបរម៉ូតូមួយទៀតប៉ូលិសពុំទាន់ស្គាល់អត្តសញ្ញាណនៅឡើយទេ ព្រោះបានរត់គេចខ្លួន ។ ឯវត្ថុតាងប៉ូលិសបានយកមករក្សាទុករង់ចាំស្រាវជ្រាវ និងដោះស្រាយ ៕
No comments:
Post a Comment