នៅទូទាំងប្រទេសកម្ពុជាចំនួនគ្រោះថ្នាក់​ចរាចរ​ថយ​ចុះ ​តែ​អ្នក​ស្លាប់​បាន​កើនឡើង​

ដោយ៖អាឡិច
ksn-news
04/06/2009
ភ្នំពេញៈ គណៈកម្មាធិកា​រជាតិសុវត្ថិ​ភាព​ចរាចរ​ផ្លូវគោក បាន​​ឲ្យដឹងថា ចំនួន​តួលេខ​ នៃ​គ្រោះថ្នាក់
​ចរាចរ​ណ៍ នៅក្នុង​រយៈពេល​ប្រាំ​ខែ​ដើម​ឆ្នាំ​២០០៩​​នេះ មាន​ការ​​ថយ​​​ចុះ​​បើ​ធៀប​ទៅនឹង ​ប្រាំខែ​ដើមឆ្នាំ២០០៨
ប៉ុន្តែ​ចំនួនអ្នកស្លាប់ពីគ្រោះថ្នាក់ចរាចរណ៍នេះ​មានការកើនឡើង​ ។​ ​​ប្រភពពី​គណៈកម្មាធិកា​រជាតិសុវត្ថិ​ភាព​ចរាចរណ៍​ផ្លូវគោក ​​ដែល​ទទួលបាន​មក​ពី​អគ្គ​ស្នង​ការ​នគរបាលជាតិ ស្តី​អំពី​​គ្រោះថ្នាក់​ចរាចរណ៍ ដែល​បាន​កើតមានឡើង​នៅ​ទូទាំង​ប្រទេស ក្នុង​រយៈពេល ៥ខែ ដើមឆ្នាំ​២០០៩​នេះ​​បាន​ឲ្យដឹងថា បើ​ប្រៀបធៀប​រយៈពេល​ដូច​​គ្នា​​​នឹង​ឆ្នាំ​២០០៨ ចំនួន​គ្រោះថ្នាក់​ចរាចរណ៍​បាន​ថយចុះ ៦,៥១ភាគរយ តែ​ចំនួន​អ្នកស្លាប់​កើនឡើង ៦,១០ ភាគ​​រយ ។ ពោលគឺ​រយៈ​​ពេល ៥ខែ​ដើមឆ្នាំ​២០០៨ មាន​គ្រោះថ្នាក់​ចរាចរ​​កើតឡើង ២.៩៦៤លើក បានសម្លាប់មនុស្ស​​ចំនួន​តែ​ ៧៣៩នាក់​ទេ ។ ដោយឡែក​រយៈ​​​ពេល ៥
ខែ ដើម​ឆ្នាំ​២០០៩​នេះ ចំនួន​​គ្រោះថ្នាក់​បាន​ថយ​ចុះ​មក​នៅ​ត្រឹម ២.៧៧១លើក ។ ប៉ុន្តែ​ចំនួន​អ្នក​ស្លាប់​ដោយ​គ្រោះថ្នាក់​ចរាចរ​​បាន​កើនឡើង​ដល់ ៧៨៤ នាក់ ។ របាយការណ៍ដដែលបាន​ឲ្យដឹងទៀតថា ក្នុង​ខែ​ឧសភា​កន្លង​ទៅ​​នេះ គ្រោះថ្នាក់ចរាចរណ៍បាន​កើតមាន​ចំនួន ៥៣៤លើក បណ្តាលឲ្យ​ស្លាប់​មនុស្ស​ចំនួន ២០៥នាក់ ​របួស​ធ្ងន់​ចំនួន ៥២០នាក់ និង​របួសស្រាល​ចំនួន ៦២៣​នាក់ ។ គ្រោះថ្នាក់​នេះបង្កឡើង​ដោយ​ ​រថយន្ត​ធុន​តូច១៨៥គ្រឿង រថយន្ត​ធុន​ធ្ងន់ ៥៦គ្រឿង យាន​ន្ត​ផ្សេងៗ៣៨គ្រឿង អ្នក​ថ្មើរជើង​៦០​នាក់ និង​ម៉ូតូ​ចំនួន ៧៣៤គ្រឿង។​ តាម​​​ប្រភព​​​​ដដែលនេះបញ្ជាក់ថា ក្នុងចំណោមម៉ូតូ​ចំនួន ៧៣៤គ្រឿង ដែល​​គ្រោះថ្នាក់​ចរាចរណ៍​ មាន​អ្នក​ដំណើរ​ចំនួន ២០៣នាក់ បាន​​រងរបួស​ធ្ងន់​ ដែលជនរងគ្រោះទាំងនោះ​ ​មិនបាន​ពាក់មួក​សុវត្ថិភាព​។ ចំនួន​គ្រោះថ្នាក់​ចរាចរណ៍​ដែល​បាន​កើត​មាន​​ឡើង​​​នៅក្នុង​ខែ​ឧសភា​កន្លង​ទៅនេះ បើ​ប្រៀបធៀប​ទៅនឹង​ខែ​មុនៗ​ឃើញមាន​ការថយចុះ​ តែ​ចំនួន​ជនរងគ្រោះ​ដល់​ស្លាប់​មាន​​ការកើនឡើង ។
លោកមាស ចាន់ឌី នាយកកម្មវិធីការពារគ្រោះថ្នាក់ចរាចរណ៍ នៃអង្គការជនពិការអន្តរជាតិបែលស៊ិក​
បានមានប្រសាសន៍​ថា គ្រោះ​ថ្នាក់​ចរាចរណ៍​ភាគច្រើន ដែលកើតមានកន្លង​មកនេះ គឺ​បណ្តាលមកពី​​អ្នកបើក​បរ​ៗក្នុង​ល្បឿនលឿន​ មិនគោរព​ច្បាប់ និងភ្លើង​ចរាចរណ៍ បើក​​បរក្នុង​ភាពស្រ​វឹង បើកប្រជែងគ្នាក្នុងល្បឿនលឿន ដោយ​មិនបាន​គិតពីគ្រោះថ្នាក់ដែលអាចនឹងកើតមានឡើង ។ ដោយឡែក​ជនរងគ្រោះដែល​ជិះ​ម៉ូតូគឺ​ការបើក​បរ​របស់ពួក​គេ​មិនបាន​ពាក់​មួក​ការ​​​​​ពារ​សុវត្ថិ​ភាព។
លោកកែវ សាវិន ប្រធាន​នាយកដ្ឋាន​ដឹកជញ្ជូន នៃ​ក្រសួង​សាធារណការ និង​ជា​លេខាធិការដ្ឋាន​នៃ​គណៈកម្មាធិការ​ជាតិ​សុវត្ថិភាព​ចរាចរ​ផ្លូវគោក បានឲ្យដឹងផងដែរ​​​ថា គ្រោះថ្នាក់​ចរាចរ​នៅ​ទូទាំង​ប្រទេស​ក្នុង​ខែ​ឧសភា​កន្លង​ទៅ បើ​ប្រៀបធៀប​ខែ​មុនៗ ឃើញ​មាន​ចំនួន​ថយចុះ ប៉ុន្តែ​ចំនួន​អ្នកស្លាប់​បាន​កើនឡើង​ ។គ្រោះថ្នាក់​ចរាចរ​ណ៍ក្នុង​ខែ​មេសា បាន​សម្លាប់​មនុស្ស​ចំនួន ១៦៤នាក់ និង​នៅក្នុង​ខែ​មីនា បាន​សម្លាប់​មនុស្ស១២៧នាក់ ។​ ​តាមលោកែវ សាវិន គ្រោះថ្នាក់ចរាចរណ៍​ដែលកើតមានក្នុង​ឆ្នាំ២០០៩នេះ បើធៀប​​រយៈពេល​ប្រាំខែដូចគ្នាឆ្នាំ​២០០៨ ឃើញថា គ្រោះថ្នាក់នេះមានការថយចុះ ប៉ុន្តែចំនួនជនរងគ្រោះដល់អាយុជីវិតគឺ​​មានការកើន​ឡើងទៅវិញ​៕