ភ្នំពេញ: យ៉ាងហោចនៅយប់ថ្ងៃទី២២ ឧសភា នេះនៅក្នុងទីក្រុងភ្នំពេញ មានករណីគ្រោះថ្នាក់ចរាចរកើតឡើង ៣ លើក បណ្តាលឲ្យស្ត្រីម្នាក់ស្លាប់ និងបុរស ៥ នាក់ទៀតរងរបួស ។
ករណីទី១ : នៅវេលាម៉ោង ៦ និង ៣០នាទីល្ងាចថ្ងៃទី ២២ ឧសភានៅចំណុចផ្លូវមុនីរ៉េត សង្កត់ទំនប់ទឹក ខណ្ឌចំការមន មានករណីរថយន្តបើកបុកម៉ូតូបណ្តាលឲ្យមនុស្ស ៣នាក់រងរបួស ។
ប៉ូលិសនិយាយថារថយន្តបង្កម៉ាក PAJERO ពណ៌ខ្មៅ ពាក់ស្លាកលេខ ភ្នំពេញ 2J 0161 បើកបរដោយឈ្មោះ ចាប សុដារ័ត្ន ភេទប្រុស អាយុ ៣៥ ឆ្នាំស្នាក់នៅសង្កាត់ទឹកល្អក់ ៣ បានបើកតាមផ្លូវ មុនីរ៉េត ពីជើងទៅត្បូងហើយបត់មិនប្រយ័ត្ន បុកម៉ូតូម៉ាក SUZUKI SMANH ពណ៌ត្រួយចេក ដែលបើកច្រាសទិសគ្នា បណ្តាលឲ្យមនុស្ស ៣ នាក់រងរបួស ។ អ្នកបើកម៉ូតូឈ្មោះ ឌួង សុភ័ក្រ ភេទប្រុស អាយុ ១៦ ឆ្នាំ មុខរបរសិស្ស អ្នករួមដំណើរឈ្មោះ សុខ ម៉ី ភេទ ប្រុស អាយុ ៤ ឆ្នាំ និងឈ្មោះ សើម រដ្ឋា ភេទ ប្រុស អាយុ ១០ ឆ្នាំ ។ ជនរងគ្រោះព្យាបាលនៅពេទ្យរុស្សី ចំណែករថយន្ត និងម៉ូតូរក្សាទុកនៅការិយាល័យប៉ូលិសចរាចរក្រុង ។
ករណីទី២ : វេលាម៉ោង ១១ និង ១០នាទី យប់ថ្ងៃដដែលនៅចំណុចផ្លូវជាតិលេខ ៥មុខមន្ទីរពេទ្យ សម្តេចឪ សង្កាត់គីឡូម៉ែត្រលេខ៦ ខណ្ឌឫស្សីកែវ មានករណីម៉ូតូបើកបុកអ្នកបោសសំរាម របួស ២ នាក់ ។
ប៉ូលិសនិយាយថា ម៉ូតូបង្កម៉ាក VIVA ពណ៌ខ្មៅស្លាកលេខកណ្តាល 2F 1724 បើកបរដោយឈ្មោះ ឡូយ វិចិត្រ ភេទប្រុស អាយុ ២២ ឆ្នាំ ស្នាក់នៅឃុំព្រែកព្នៅ ស្រុកពញាឮ ខេត្តកណ្តាល បានបើកតាមផ្លូវជាតិលេខ ៥ ពីត្បូងទៅជើង លុះដល់មុខមន្ទីរពេទ្យ សម្តេចឪ ក៏បុកអ្នកបោសសំរាមតាមផ្លូវ បណ្តាលឲ្យរបួស ២នាក់ ។ ជនរងគ្រោះ ឈ្មោះ ហេងផេង ភេទប្រុស អាយុ ២១ ឆ្នាំ មុខរបរកម្មករ និងឈ្មោះជួន ងួន ហាក់ ភេទប្រុស អាយុ ២១ ឆ្នាំ ។ កម្មករទាំង ២នាក់ ព្យាបាលនៅពេទ្យ វិបុលសុខ ចំណែកអ្នកបើកម៉ូតូដេកពេទ្យកាល់ម៉ែត ។ ម៉ូតូរក្សាទុកនៅការិយាល័យប៉ូលិសចរាចរក្រុង ។
ករណីទី៣ : នៅវេលាម៉ោង ១១ និង ៣០នាទី យប់ថ្ងៃដដែលនៅផ្លូវ ៣៦៩ មុខវិហារអ៊ីស្លាម សង្កាត់ព្រែកប្រា ខណ្ឌមានជ័យ មានករណី នារីលក់ស្រាបៀរបើកម៉ូតូបុកបង្គោលភ្លើងស្លាប់ ។
ប៉ូលិសនិយាយថា ជនរងគ្រោះឈ្មោះ លៀប ចាន់ ភេទស្រី អាយុ ២៨ ឆ្នាំ មុខរបរលក់ស្រាបៀរ ស្នាក់នៅផ្ទះជួលមុខក្រុមហ៊ុនស្រាបៀរអង្គរ សង្កាត់ទន្លេបាសាក់ ខណ្ឌចំការមន ។ ជនរងគ្រោះបើកម៉ូតូ ម៉ាក YAMAHA SUPER ពណ៌ខ្មៅគ្មានស្លាកលេខ បើកតាម ផ្លូវ ៣៦៩ ពីត្បូងទៅជើងយ៉ាងលឿនបត់ផ្លូវកោងក៏បុកបង្គោលភ្លើងស្លាប់តែម្តង ។ ប៉ូលិសបញ្ជាក់ថាមូលហេតុបណ្តាលមកពីស្រវឹងខ្លាំង ។ សពតម្កល់ធ្វើបុណ្យនៅវត្តច្បារអំពៅ ចំណែកម៉ូតូរក្សាទុកនៅខណ្ឌ ៕
នារី លៀប ចាន់ ស្លាប់នៅនឹងកន្លែង ដោយសារស្រវឹងបើកម៉ូតូលឿនទៅបុកបង្គោលភ្លើង ( រូប: សុពិសិដ្ឋ )
No comments:
Post a Comment