ភ្នំពេញ: រយៈពេលពេល ២ យប់ គិតចាប់ពីថ្ងៃទី ១៩ ដល់ ២០ ឧសភា នៅរាជធានីភ្នំពេញ មានករណីរថយន្ដបើកបុករបាំងចែកទ្រូងផ្លូវ ៣ លើក ក្នុងនោះបង្កឡើងដោយជនជាតិចិន ដែលមករកស៊ីនៅស្រុកខ្មែរចំនួន ២ លើក ប៉ុន្តែពុំមានមនុស្សគ្រោះថ្នាក់ដល់ស្លាប់ឡើយ ។
* លើកទី ១ : វេលាម៉ោង ១១ និង ៣០ នាទីយប់ ថ្ងៃទី ១៩ ឧសភា នៅចំណុចផ្លូវព្រះមុនីវង្សកែវផ្លូវក្រមួនស (១១៤) មុខធនាគារពាណិជ្ជកម្មក្នុង និងក្រៅប្រទេសេ ស្ថិតក្នុងសងា្កត់ផ្សារថ្មីII ខណ្ឌដូនពេញ បុរសជនជាតិចិនមា្នក់បើករថយន្ដបុករបាំងចែកទ្រូងផ្លូវ ហើយហោះបុកបង្គោលភ្លើងថែមទៀត ។
ប៉ូលិសនិយាយថា រថយន្ដបង្កម៉ាក CAMRY សេរី ៩៥ ពណ៌សែ្លពាក់ស្លាកលេខភ្នំពេញ ២D ៥៨៨៩ បើកបរដោយបុរសជនជាតិចិនម្នាក់ (ពុំស្គាល់ឈ្មោះ) ។
សាក្សីនិយាយថា មុនកើតហេតុគេឃើញរថយន្ដបើកតាមផ្លូវព្រះមុនីវង្សពីជើងទៅត្បូង យ៉ាងលឿន ហើយជ្រុលចង្កូតបុករបាំងចែកទ្រូងផ្លូវលាន់សូរដូចផ្ទុះគ្រាប់ផ្លោង ហើយរថយន្ដបានហោះទៅបុកបងោ្គលភ្លើងនៅមុខធនាគារពាណិជ្ជកម្មក្នុង និងក្រៅប្រទេសថែមទៀត ។
បុរសជនជាតិចិនដែលទំនងជាស្រវឹងស្រាជោគ បាននិយាយទូរស័ព្ទមួយសន្ទុះក៏មានបក្ខពួកដឹកយកទៅបាត់ ។ ចំណែករថយន្ដប៉ូលិសស្ទូចយកទៅរក្សាទុកនៅសាលារាជធានីភ្នំពេញ ។
* លើកទី ២ : នៅវេលាម៉ោង ១១ និង ៣០ នាទីយប់ ថ្ងៃទី ២០ ឧសភា នៅចំណុចផ្លូវសហព័ន្ធរុស្ស៊ីទល់មុខស្ថានីយ៍ប្រេងតេលា សង្កាត់ទឹកថ្លា ខណ្ឌសែនសុខ មានរថយន្ដមួយគ្រឿងបើកបុករបាំងចែកទ្រូងផ្លូវបណ្ដាលឲ្យមនុស្ស ៣ នាក់ រងរបួសមធ្យម ហើយគេចខ្លួនបាត់ ។
ប៉ូលិសនិយាយថា រថយន្ដបង្កម៉ាក HONDA CIVIC ពណ៌ខ្មៅពាក់ស្លាកលេខ ភ្នំពេញ ២C ៣៩៥៩ បើកបរដោយបុរសម្នាក់ និងមានអ្នករួមដំណើរ ២ នាក់ ស្រីម្នាក់ប្រុសម្នាក់ ។
សាក្សីនិយាយថា មុនកើតហេតុគេឃើញរថយន្ដបើកតាមផ្លូវសហព័ន្ធរុស្ស៊ី ពីលិចទៅកើតយ៉ាងលឿន ។ លុះដល់ចំណុចខាងលើ ក៏ជ្រុលបុករបាំងចែកទ្រូងផ្លូវរបើកក្បាលនាគ និងប្រេះរបាំងថ្ម ៧ កង់ថែមទៀត ។ អ្នកនៅលើរថយន្ដ ៣ នាក់ ដែលស្រវឹងស្រា បានហៅម៉ូតូកង់បីជិះទៅបាត់ ។
រថយន្ដត្រូវបានប៉ូលិសចរាចរស្ទូចយកទៅរក្សាទុកនៅសាលារាជធានីភ្នំពេញដោះស្រាយតាមច្បាប់ ។
* លើកទី ៣ : វេលាម៉ោង ១ អធ្រាត្រ ថ្ងៃទី ២១ ឧសភា នៅផ្លូវព្រះនរោត្តមកែវម៉ៅសេងទុង សង្កាត់ទន្លេបាក់ ខណ្ឌចំការមន (ស្ដុបជលផល) បុរសជនជាតិចិនម្នាក់បើករថយន្ដបុករបាំងចែកទ្រូវផ្លូវ បណ្ដាលឲ្យរថយន្ដខូចផ្នែកខាងមុខ ។
ប៉ូលិសនិយាយថា រថយន្ដបង្កម៉ាក HONDA ពណ៌ស្ក ស្លាកលេខ ង ៦៧៦២ ភព២ បើកបរដោយឈ្មោះ ស៊ក ភេទប្រុស អាយុ ៤៨ឆ្នាំ ជនជាតិចិន មុខរបរបុគ្គលិកក្រុមហ៊ុនអេវប្រាយ ស្នាក់នៅផ្ទះលេខ ១៣៧ ផ្លូវម៉ៅសេងទុង សង្កាត់ទួលទំពូងI ។
ប៉ូលិសបញ្ជាក់ថា រថយន្ដបានបើកយ៉ាងលឿនតាមផ្លូវព្រះនរោត្តមពីជើងទៅត្បូង ហើយបុករបាំងចែកទ្រូងផ្លូវមុខរដ្ឋបាលជលផល ហើយរថយន្ដព្យាយាមបើកដល់ស្តុបបូកគោក៏ត្រូវប៉ូលិសឃាត់ ។ បច្ចុប្បន្នបញ្ជូនទៅរក្សាទុកនៅសាលារាជធានីភ្នំពេញ ៕
No comments:
Post a Comment