រថយន្តបុកអណិកជនខ្មែរ ចូលនិវត្តមកពីអូស្ត្រាលីម្នាក់ ស្លាប់នៅខេត្តពោធិសាត់
ដោយ : សូរិយា (ថ្ងៃទី 9 ឧសភា 2009)
ពោធិសាត់ : អណិកជនខ្មែរចូលនិវត្តមកពីប្រទេសអូស្ត្រាលីម្នាក់ ត្រូវរថយន្តធំបុកស្លាប់នៅខេត្តពោធិសាត់ កាលពីព្រលប់ថ្ងៃទី ០៨ ឧសភា នេះក្នុងខណៈជនរងគ្រោះកំពុងជិះម៉ូតូលើថ្នល់ជាតិលេខ ០៥ ម្នាក់ឯងកំសាន្តក្នុងខេត្ត ។ប៉ូលិសចរាចរជើងគោកខេត្តពោធិសាត់ឲ្យដឹងថា : ជនរងគ្រោះមានឈ្មោះ សឹង ចក់ ភេទប្រុស អាយុ ៦៥ ឆ្នាំ ជាអណិកជនខ្មែរ រស់នៅប្រទេសអូស្ត្រាលី តែគាត់បានចូលនិវត្ត ហើយសព្វថ្ងៃមករស់នៅជាមួយសាច់ញាតិ ក្នុងទីក្រុងភ្នំពេញ ។
ប៉ូលិសឲ្យដឹងថា : គាត់បានមកលេងខេត្តពោធិសាត់ បានរយៈពេលពីរថ្ងៃមកហើយ ដោយស្នាក់នៅផ្ទះសំណាក់ខ្សាច់មាស ។ គាត់ត្រូវរថយន្តបុកស្លាប់នៅនឹងកន្លែងកាលពីវេលាម៉ោង ៦ និង ៥០ នាទី ព្រលប់ថ្ងៃទី ០៨ ឧសភា ២០០៩ នៅខាងកើតទីប្រជុំជនក្រុងពោធិសាត់ ស្ថិតក្នុងភូមិមាន់ចែ សង្កាត់រលាប ។ ប៉ូលិសឲ្យដឹងថា ជនរងគ្រោះជិះម៉ូតូម៉ាកវីវា សេរី ២០០៣ ពណ៌ខ្មៅ ពីលិចទៅកើត ស្របពេលជាមួយគ្នានេះ មានរថយន្តម៉ាកហ៊ីយុនដាយ ពណ៌សមួយគ្រឿងពាក់ស្លាកលេខ ភ្នំពេញ 3A 4965 អត់មានដឹកអ្វីនោះទេ បើកពីលិចទៅកើត ហើយបានបុកម៉ូតូជនរងគ្រោះពីក្រោយរុញទៅមុខប្រហែល ៥០ ម៉ែត្រ ទៅផ្នែកខាងឆ្វេងដៃ បណ្តាលឲ្យមនុស្សស្លាប់ក្បែរចិញ្ចើមថ្នល់ក្បែរម៉ូតូ រីឯរថយន្តបានធ្លាក់ទៅក្នុងស្រែ ក្រឡាប់បះជើង ចំណែកអ្នកបើកបររត់គេចខ្លួនបាត់ ។
ប្រភពព័ត៌មានឲ្យដឹងថា : ជនរងគ្រោះមកលេងខេត្តពោធិសាត់ នេះដោយសារតែមានទំនាក់ទំនងស្រឡាញ់ស្ត្រីម្នាក់ នៅក្នុងក្រុងពោធិសាត់នេះ តែប្រភពនោះមិនបានបញ្ជាក់ឈ្មោះស្ត្រីនោះឡើយ ។
ប៉ូលិសបានស្រាវជ្រាវរកឃើញសាច់ញាតិជនរងគ្រោះនោះ និងបានផ្តល់ដំណឹងឲ្យបានដឹងផងដែរ តាមរយៈលេខទូរស័ព្ទជាប់នឹងទូរស័ព្ទជនរងគ្រោះ ដែលក្រុមគ្រួសារ គឺនៅទីក្រុងភ្នំពេញ ។ ក្រុមគ្រួសារក៏បានមកទទួលសាកសពជនរងគ្រោះហើយដែរ ។ ចំណែករថយន្តបង្កហេតុ ត្រូវប៉ូលិសអូសយកទៅស្នងការដ្ឋានប៉ូលិសខេត្តទុកធ្វើការដោះស្រាយជា ក្រោយ ៕
No comments:
Post a Comment