ស្រវឹងស្រា​បើកឡាន​បុក​ម៉ូតូ ២ គ្រឿង​បន្តបន្ទាប់​បណ្តាលឲ្យ​ស្លាប់​ម្នាក់ របួស ៥ នាក់​

ដោយ : មង្គល​ (ថ្ងៃទី 24 មិថុនា 2009)
CEN News
បាត់ដំបង​: គ្រោះថ្នាក់​ចរាចរ​បង្កឡើង​ដោយ​អ្នក​បើក​ឡាន​ទំនើប ស្រវឹងស្រា​បើក​បុក​ម៉ូតូ ២ គ្រឿង​ជា​បន្តបន្ទាប់ បណ្តាលឲ្យ​ស្លាប់​មនុស្ស​ម្នាក់ របួសធ្ងន់​ម្នាក់ ស្រាល ៤ នាក់ ហើយ​បើក​រត់​ជិត ៣ គីឡូម៉ែត្រ ទើប​សមត្ថកិច្ច​បាញ់​បំបែក​កង់​មុខ​ទៅ​លែង​រួច ។ តៃកុង​ឡាន​បាន​ចុះ​រត់គេចខ្លួន​បាត់ ។ ហេតុការណ៍​គ្រោះថ្នាក់​ចរាចរ​នេះ កើតឡើង​កាលពី​យប់​ថ្ងៃទី​២៣ ខែមិថុនា នៅ​ចំណុច​មុខ​វិហារ​ចិន ក្នុង​ភូមិ​រំចេក​៤ សង្កាត់​រតនៈ ក្រុង​បាត់ដំបង ។​

​លោក​វរសេនីយ៍ត្រី សាត គឹម​សាន បានឲ្យដឹងថា អ្នកស្លាប់ អ្នក​របួសធ្ងន់​ម្នាក់ និង​ស្រាល ៤ នាក់ រហូតមកដល់​ម៉ោង ៣ ថ្ងៃទី​២៤ ខែមិថុនា មិនទាន់​ឃើញ​មាន​ក្រុម​គ្រួសា​រណា​ម្នាក់​មក​ដាក់​ពាក​បណ្តឹង ជា​ហេតុ​ធ្វើឲ្យ​សមត្ថកិច្ច​មិនទាន់​ស្គាល់​អត្តសញ្ញាណ​អ្នកទាំងនោះ ។ ចំណែក​អ្នកបើកបរ​ឡាន​បង្ក​ក៏​មិន​ទាន់​ស្គាល់​អត្តសញ្ញាណ​ដែរ ។​

​សាក្សី​ដែល​មានផ្ទះ​ទល់មុខ​កន្លែងកើតហេតុ​បាន​បំភ្លឺ​ប្រាប់​នគរបាល​ចរាចរ ​ថា មុនពេល​កើតហេតុ​មាន​ម៉ូតូ C125 ពណ៌​ខ្មៅ ពាក់​ស្លាក​លេខ បាត់ដំបង 1B 2401 ជិះ​ឌុប​គ្នា ២ នាក់ ពី​ទិសខាងកើត​ទៅ​លិច ហើយ​ស្របពេល​នោះ​មាន​ឡាន ១ គ្រឿង ពណ៌​ខ្មៅ ម៉ាក​តូ​យូ​តា High Lander បាន​បើក​ពី​ទិស​ខាងលិច​មក​កើត​ដោយ​ល្បឿន​យ៉ាង​លឿន រេ​ពេញ​ផ្លូវ​ហើយ​វេ​ចង្កូត​មក​បុក​ម៉ូតូ​មួយ​ទំហឹង​នៅ​ខាងស្តាំ​ដៃ​របស់​គេ បណ្តាល​ឲ្យ​ប៉ើ​ងទាំង​ម៉ូតូ និង​មនុស្ស​ចម្ងាយ​ជិត ១០ ម៉ែត្រ បែកក្បាល​ហូរ​ឈាម​សន្លប់ នៅនឹងកន្លែង​ត្រូវបាន​អ្នកជិតខាង​ដឹកយក​ទៅ​មន្ទីរពេទ្យ ហើយ​បាន​ដាច់ខ្យល់​ស្លាប់​ម្នាក់ ឯ​ម្នាក់​ទៀត​របួស​ធ្ងន់ធ្ងរ​សង្ឃឹម​រស់​តិចតួច ។ បន្ទាប់ពី​បុក​រួច​ឡាន​នោះ​បាន​បន្ថែម​ល្បឿន​បើក​រត់​ទៅ​មុខ រហូត​ទៅ​ដល់​ស្ពានថ្ម​លោក ស ខេង ក៏​បត់​ស្តាំ​ទៅ​បុក​ម៉ូតូ ១ គ្រឿង ដែល​មាន​ស្រីៗ​ជិះ​គ្នា ៤ នាក់ បណ្តាលឲ្យ​របួស​ស្រាល ។ រួច​ឡាន​នោះ​បាន​បើក​រត់​តាម​មាត់​ស្ទឹង​បន្តទៅទៀត រហូត​ដល់​ភូមិ​សូ​ភី​១ សង្កាត់​រតនៈ ចម្ងាយ​ពី​កន្លែងកើតហេតុ​ប្រហែល ៣ គីឡូម៉ែត្រ ទើប​មាន​សមត្ថកិច្ច​ម្នាក់​មិនដឹង​ជា​អង្គភាព​ណា បាន​បាញ់​បែក​កង់​មុខ​ខាងឆ្វេង​ទើប​ឡាន​នោះ​ទៅមុខ​លែងរួច ហើយ​តៃកុង​ឡាន​ដែល​ជិះ​តែ​ម្នាក់​បាន​បើកទ្វារ​ឡាន​រត់គេចខ្លួន​បាត់ ។ ឡាន​បង្កហេតុ​ត្រូវ​សមត្ថកិច្ច​ជំនាញ​ហៅ​ឡានស្ទូច​យក​មក​រក្សាទុក​នៅ​ ការិយាល័យ​នគរបាល​ចរាចរ​ផ្លូវគោក​ខេត្ត ព្រម​ជាមួយនឹង​ម៉ូតូ​របស់​ជនរងគ្រោះ ២ គ្រឿង​ទៀត ដើម្បី​យក​មក​ដោះស្រាយ​តាម​ផ្លូវច្បាប់ ។ ឡាន​បង្ក​ពេល​ដឹក​មក​ដល់​ការិយាល័យ​ជំនាញ​ត្រូវ​គេ​ដោះ​ស្លាក​លេខ​ចោល ប៉ុន្តែ​មាន​គេ​លួចខ្សឹប​ថា ឡាន​បង្ក​ពាក់​ស្លាក​លេខ​បាត់ដំបង 2A 4344 ព្រោះ​ឡាន​នេះ​ពាក់ព័ន្ធ​នឹង​ម្ចាស់​ជា​អ្នកមាន​អំណាច​ម្នាក់​នៅក្នុង​ខេត្ត ៕