CEN
ភ្នំពេញ: ក្រសួងសាធារណការយល់ព្រមផ្តល់ស្លាកលេខ (ចុះបញ្ជី) រ៉ឺម៉កម៉ូតូ ដែលបានធ្វើឡើងត្រឹមត្រូវតាមបទដ្ឋានកំណត់ដោយច្បាប់នោះហើយ តែមកទល់នឹងពេលនេះមិនទាន់មានរ៉ឺម៉កម៉ូតូ ១ គ្រឿងណា ត្រូវបានគេយកទៅចុះបញ្ជីនៅឡើយទេ ។ ឯម៉ូតូកង់ ៣ ដែលគេយល់ព្រមចេញស្លាកលេខឲ្យជាយូរមកហើយនោះ ក៏មិនសូវមានគេមកសុំធ្វើស្លាកលេខដែរ នេះដោយសារមកពីផ្នែកមានសមត្ថកិច្ចនៅតាមដងផ្លូវមិនបានរឹតបណ្តឹង ក្នុងការត្រួតពិនិត្យ ។
លោក ខៀវ សារុន អនុប្រធានមន្ទីរសាធារណការរាជធានីភ្នំពេញបាននិយាយឲ្យដឹងនៅថ្ងៃទី ០២ មិថុនានេះថា បន្ទាប់ពីម៉ូតូកង់៣ (ទុកៗ) គឺរ៉ឺម៉កម៉ូតូត្រូវបានក្រសួងសម្រេចឲ្យមានការចុះបញ្ជី (ចេញស្លាកលេខឲ្យ) ដើម្បីគ្រប់គ្រងហើយ ។ រ៉ឺម៉កម៉ូតូដែលបានធ្វើចរាចរនៅក្នុងទីក្រុងកន្លងមក មិនមានស្លាកលេខសម្គាល់ទេ គឺមានតែម៉ូតូកង់៣ មួយចំនួនតូចប៉ុណ្ណោះ ។
ប្រភពខាងលើបាននិយាយឲ្យដឹងទៀតថា រ៉ឺម៉កម៉ូតូពេលនេះអាចមកធ្វើស្លាកលេខបានហើយនៅកន្លែងចុះបញ្ជី យានយន្ត នៃមន្ទីរសាធារណការរាជធានីភ្នំពេញ ដោយមានការត្រួតពិនិត្យលក្ខណៈបច្ចេកទេសត្រឹមត្រូវ ដូចជាការចុះបញ្ជីរថយន្តដែរ ។ រ៉ឺម៉កម៉ូតូធ្វើចរាចរនៅលើផ្លូវសាធារណៈ ក្នុងក្រុងកន្លងទៅមានស្លាកលេខសម្គាល់តែម៉ូតូ ឯរ៉ឺម៉កមិនមានទេ ។
តាមប្រភពដដែលបាននិយាយឲ្យដឹងទៀតថា ការចុះបញ្ជីរ៉ឺម៉កម៉ូតូនេះ មន្ទីរបានធ្វើសេចក្តីជូនដំណឹងរួចហើយ តែមិនឃើញមានគេមកចុះបញ្ជីទេ ។ ឯម៉ូតូកង់ ៣ វិញ ដែលក្រសួងបានសម្រេចឲ្យមានការចុះបញ្ជីជាយូរមកហើយនោះ ក៏មកចុះបញ្ជីមានចំនួនមិនច្រើនប៉ុន្មានដែរ នេះដោយសារសមត្ថកិច្ចនៅតាមដងផ្លូវមិនបានរឹតបណ្តឹងក្នុង ការត្រួតពិនិត្យ ។
លោក ជា ប៊ុនធឿន ប្រធានការិយាល័យចុះបញ្ជីយានយន្ត នៃមន្ទីរសាធារណការក្រុងភ្នំពេញបាននិយាយឲ្យដឹងនៅថ្ងៃទី០២ មិថុនានេះដែរថា គិតត្រឹមដំណាច់ខែឧសភា ឆ្នាំ២០០៩ ម៉ូតូកង់ ៣ ដែលបានមកចុះបញ្ជីត្រឹមត្រូវមានចំនួន ៣០៤ គ្រឿង តែរ៉ឺម៉កម៉ូតូមកទល់ពេលនេះមិនទាន់មានអ្នកណាមកចុះបញ្ជីនៅឡើយទេ ដោយសារទើបមានការសម្រេចឲ្យចុះបញ្ជី ។
តាមប្រភពដដែលបានបញ្ជាក់ឲ្យដឹងទៀតថា រ៉ឺម៉កម៉ូតូដែលត្រូវបានផ្តល់ស្លាកលេខឲ្យនោះជារ៉ឺម៉ក ដែលគេបានធ្វើឡើងត្រឹមត្រូវបទដ្ឋានកំណត់ គឹមានទទឹង ១,៤០ ម៉ែត្រ និងបណ្តោយ ៣,៤០ ម៉ែត្រ ។ រ៉ឺម៉កណាដែលធ្វើឡើងផ្ទុយពីការសម្រេចនេះមិនផ្តល់ស្លាកលេខឲ្យទេ ។ រ៉ឺម៉កម៉ូតូវែងៗ ដែលដឹកអ្នកដំណើរបានចំនួនពី៣០ ទៅ ៤០ នាក់ កន្លងទៅនេះ គឺមិនចេញស្លាកលេខទេ ។ ម៉ូតូកង់ ៣ និងរ៉ឺម៉កម៉ូតូខ្លីៗ ដែលគេបានធ្វើចរាចរ នៅលើផ្លូវសាធារណៈក្នុងក្រុងភ្នំពេញសព្វថ្ងៃនេះមានចំនួនច្រើន តែគ្មានស្លាកលេខទេ ហើយគេនៅតែបន្តគ្មានស្លាកលេខ បើសិនជាសមត្ថកិច្ចនៅតាមដងផ្លូវមិនធ្វើការត្រួតពិនិត្យឲ្យរឹងទេនោះ ។
លោក អែល ណារិន អនុប្រធានការិយាល័យនគរបាល ចរាចរជើងគោក នៃស្នងការនគរបាលរាជធានីភ្នំពេញ បាននិយាយឲ្យដឹងនៅថ្ងៃទី០២ មិថុនានេះដែរថា ការត្រួតពិនិត្យម៉ូតូកង់ ៣(ទុកៗ) បានធ្វើម្តងម្កាលពេលណាលោកអភិបាលរាជធានីចេញបញ្ជា តែចំពោះរ៉ឺម៉កម៉ូតូមិនដែលបានធ្វើទេ ព្រោះមិនទាន់មានគោលការណ៍ឲ្យធ្វើ ។ ការត្រួតពិនិត្យម៉ូតូកង់ ៣ កាលពីប៉ុន្មានថ្ងៃមុននេះ យើងបានឃាត់ទុកម៉ូតូកង់ ៣ ចំនួន ២៦ គ្រឿង តែម៉ូតូកង់ ៣ មួយចំនួនដែលមានស្លាកលេខត្រឹមត្រូវយើងបានលែងទៅវិញ បន្ទាប់ពីបានធ្វើកិច្ចសន្យា ។ ចំពោះម៉ូតូកង់ ៣ គ្មានស្លាកលេខយើងទុករហូតមកទល់ពេលនេះមិនទាន់លែងទេ ដោយតម្រូវឲ្យគេធ្វើស្លាកលេខរួចសិន ទើបដោះលែងទៅវិញ ។
ប្រភពខាងលើបាននិយាយទៀតថា កិច្ចសន្យាដែលយើងបានធ្វើជាមួយនឹងម៉ូតូកង់៣ ដែលបានដោះលែងនោះ គឺមិនអនុញ្ញាតឲ្យឈប់ ឬធ្វើចរាចរនៅលើផ្លូវសុធារសស៊ីសុវត្ថិ និងមហាវិថីព្រះនរោត្តមជាលើកទី២ ។ ខ្លឹមសារនេះ គឺជាគោលការណ៍របស់លោកអភិបាលរាជធានីភ្នំពេញ ។ នៅពេលខាងមុខបើសិនជារ៉ឺម៉កម៉ូតូមានមានគោលការណ៍ចេញស្លាកលេខឲ្យហើយ នោះ យើងនឹងធ្វើការត្រួតពិនិត្យ ។ តាមពិតរ៉ឺម៉កម៉ូតូក៏ដូចជាម៉ូតូកង់ ៣ ដែរ គឺមិនអនុញ្ញាតឲ្យធ្វើចរាចរនៅក្នុងក្រុងទេ ។ បើតាមច្បាប់យានយន្តដែលធ្វើចរាចរដោយគ្មានស្លាកលេខ គឹខុសច្បាប់ហើយត្រូវឃាត់ទុក តែកន្លងទៅនេះយើងធ្វើមិនទាន់បានតាមច្បាប់នោះទេ ៕
រ៉ឺម៉កម៉ូតូដែលកន្លងមកគេមិនឲ្យស្លាកលេខ ឥឡូវគេយល់ព្រមផ្ដល់ស្លាកលេខហើយ (រូប : សិរី)
No comments:
Post a Comment