គ្រោះថ្នាក់​ចរាចរ​ពីរ​លើ​ក​ស្លាប់​ម្នាក់​

ដោយ : សុ​ពិសិដ្ឋ​ (ថ្ងៃទី 12 មិថុនា 2009)
CEN news
​ភ្នំពេញ: យោងតាម​របាយការណ៍​ប្រចាំថ្ងៃ​របស់​សមត្ថកិច្ច​បា​ន​ឲ្យដឹងថា ក្នុង​រាជធានី​ភ្នំពេញ​មាន​ករណី​គ្រោះថ្នាក់​ចរាចរ ២ លើក បណ្ដាលឲ្យ​ស្លាប់​ម្នាក់ ប៉ុន្តែ​ពុំ​មាន​មនុស្ស​រងរបួស​ឡើយ ។​

* ករណី​ទី​១ : នៅវេលា​ម៉ោង ៩ និង ៣០ នាទី យប់​ថ្ងៃ​ទី ១១ មិថុនា នៅតាម​ផ្លូវ​លេខ ៧០ ជិត​ថ្នល់​រថភ្លើង សង្កាត់​ស្រះចក ខណ្ឌដូនពេញ មាន​ករណី​រថយន្ដ ២ គ្រឿង​បុក​គ្នា បណ្ដាលឲ្យ​ដាច់​កង់ ហើយ​ភាគី​ម្ខាង​ព្រម​សង ២៥០ ដុល្លារ​ ដើម្បី​បញ្ចប់រឿង ។​

​ រថយន្ដ​បង្ក​ម៉ាក​តូ​យូ​តា RAV4 ពណ៌​ទឹកប្រាក់ ស្លាក​លេខ​បណ្ដោះអាសន្ន ២១១៩ បើកបរ​ដោយ​ឈ្មោះ ឈុន វី​នី​តា ភេទ​ប្រុស មុខរបរ​មេធាវី ស្នាក់​នៅផ្ទះ​លេខ ២៤៣ A ផ្លូវ​លេខ ៦៣ សង្កាត់​បឹង​កេងកង​I ។

​ ចំណែក​រថយន្ដ​រងគ្រោះ​ម៉ាក HYUNDAI ពណ៌​ខៀវ​ដឹក​ទឹកស៊ីអ៊ីវ ស្លាក​លេខ ឃ ៥៧៧៤ ភព​២ បើកបរ​ដោយ​ឈ្មោះ ស៊ូ វ៉ាន់​ធឿន ភេទ​ប្រុស អាយុ ៣៥​ឆ្នាំ ស្នាក់​នៅ​ស្រុក​កងមាស ខេត្ត​កំពង់ចាម ។​

​ ប្រភព​ពី​កន្លែងកើតហេតុ​ឲ្យដឹង​ថា រថយន្ដ RAV4 បើក​ពី​កើត​ទៅ​លិច ហើយ​ជ្រុល​ចង្កូត​ទៅ​ចំណែក​ផ្លូវ​ម្ខាង ហើយ​បុក HYUNDAI ដែល​ធ្វើដំណើរ​ច្រាសទិស បណ្ដាលឲ្យ​ដាច់​កង់​ម្ខាង តែ​មិន​គ្រោះថ្នាក់​ដល់​មនុស្ស​ឡើយ ។ ភាគី​ខាង RAV4 ព្រម​សង ២៥០ ដុល្លារ ដើម្បី​បញ្ចប់រឿង ។​

* ករណី​ទី​២ : នៅវេលា​ម៉ោង ១០ និង ៥ នាទី ព្រឹក​ថ្ងៃ​ទី ១២ មិថុនា​នេះ នៅ​ផ្លូវ​ជាតិ​លេខ ៤ ម្ដុំ​អូរ​ដឹម សង្កាត់​ចោមចៅ ខណ្ឌដង្កោ មាន​រថយន្ដ​ទេសចរណ៍​មួយ​គ្រឿង​បុក​រ៉ឺម៉ក​ដឹក​ធ្យូង​ដាច់​ជា​ពីរ បណ្ដាលឲ្យ​ស្លាប់​ម្នាក់ ។​

​ រថយន្ដ​បង្ក​ម៉ាក Istana ពណ៌​ទឹកប្រាក់ ស្លាក​លេខ ភ្នំពេញ ២B ៦៨៧៣ អ្នកបើកបរ​រត់​បាត់ ។ ចំណែក​រ៉ឺម៉ក​ដឹក​ធ្យូង​បើកបរ​ដោយ​ឈ្មោះ ផេង ថូ ភេទ​ប្រុស អាយុ ២៥​ឆ្នាំ មុខរបរ​លក់​ធ្យូង ស្នាក់​នៅ​ឃុំ​ភ្នំ​តូច ស្រុក​ឧដុង្គ ខេត្ត​កំពង់ស្ពឺ ស្លាប់​នៅ​កនែ្លង​កើតហេតុ ។

​ ប៉ូលិស​និយាយថា មុន​កើតហេតុ​រថយន្ដ​បើក​ពី​កើត​ទៅ​លិច ហើយ​បុក​រ៉ឺម៉ក​កំពុង​បត់​ឆ្វេង​ចូល​ផ្លូវ​ក្រួស​ក្រហម បណ្ដាលឲ្យ​ដាច់​ជា​ពីរ ហើយ​អ្នក​បើក​រ៉ឺម៉ក​បាន​ស្លាប់ ។ រថយន្ដ និង​រ៉ឺម៉ក​រក្សាទុក​នៅ​ខណ្ឌដង្កោ ។ សព​ក្រុមគ្រួសារ​យក​ទៅ​ធ្វើបុណ្យ ៕