ភ្នំពេញ: នៅថ្ងៃទី ១ ឧសភា ដែលជាថ្ងៃឈប់សំរាកនៅខណ្ឌចំការមន មានករណីគ្រោះថ្នាក់ចរាចរកើតឡើងពីរលើកបណា្តលឲ្យបុរសម្នាក់ របួសធ្ងន់ ។
* ករណីទី ១: នៅវេលាម៉ោង ១១ យប់ថ្ងៃទី ១ ឧសភា នៅចំណុចស្ដុបផ្សារដើមគរ ផ្លូវម៉ៅសេទុង កែងមុនីរ៉េត (មុខសណ្ឋាគារអាំងទែរកង់ទីណង់តាល់) សង្កាត់ទំនប់ទឹកខណ្ឌចំការមន មានករណីបុរសម្នាក់ស្រវឹងធ្លាក់ភ្នែក បើក រថយន្តបុកបង្គោលភ្លើងបណ្ដាលឲ្យរបួសធ្ងន់ ។
ប៉ូលិសនិយាយថា រថយន្តបង្កគ្រោះថ្នាក់ដោយឯកឯងម៉ាក CAMRY ពណ៌ស្លែពាក់ស្លាកលេខភ្នំពេញ 2G 7389 បើកបរដោយឈ្មោះ ហែម វីរៈ ភេទប្រុស អាយុ ៣៥ ឆ្នាំ ស្នាក់នៅសង្កាត់ទួលទំពូង I ខណ្ឌចំការមន រងរបួសធ្ងន់កំពុងដេកពេទ្យបុប្ផាមាស ។
ប៉ូលិសបញ្ជាក់ថា មុនកើតហេតុរថយន្តបង្កធ្វើដំណើរតាមផ្លូវម៉ៅសេទុង ពីលិចទៅកើតយ៉ាងលឿន ឆ្លងតាមផ្លូវមុនីរ៉េត ហើយជ្រុលបុកបង្គោលភ្លើងបណ្ដាលឲ្យរថយន្តខូចខ្ទេចផ្នែកខាងមុខ ហើយអ្នកបើកបររបួសធ្ងន់ ។ ចំណែកបង្គោលភ្លើងយក្ស គ្រាន់តែទ្រេតបន្ដិច ប៉ុន្តែប្រអប់អំពូលបានដាច់ធ្លាក់មកក្រោម ។ រថយន្តរក្សាទុកនៅខណ្ឌ ដើម្បីដោះស្រាយពេលក្រោយ ។
*ករណីទី ២: នៅវេលាម៉ោង ១១ យប់ថ្ងៃដដែល នៅចំណុចផ្លូវ ៣៤៨ កែងផ្លូវ ២០៥ សង្កាត់ទួលស្វាយព្រៃ II ខណ្ឌចំការមន មានរថយន្ត និងរថយន្តបុកគ្នា បណ្ដាលឲ្យខូចខាតទាំងសងខាង ប៉ុន្តែពុំមានអ្នករងរបួសឡើយ ។
ប៉ូលិសនិយាយថា ភាគីម្ខាងរថយន្តម៉ាក VIGO ពណ៌ខ្មៅស្លាកលេខ កំពង់ចាម 2A 2726 បើកបរដោយឈ្មោះ ហេង សុខហៃ ភេទប្រុស អាយុ ៥០ ឆ្នាំ មុខរបរលក់ដូរស្នាក់នៅឃុំសួង ស្រុកត្បូងឃ្មុំ ខេត្តកំពង់ចាម រថយន្តខូចផ្នែកខាងមុខ ។ ចំណែកភាគីម្ខាងទៀតម៉ាក Mercedes ពណ៌ទឹកប្រាក់ពាក់ស្លាកលេខភ្នំពេញ 2J 6575 បើកបរដោយឈ្មោះ សុខ ឃាង ភេទប្រុស អាយុ ៤០ ឆ្នាំ មុខរបរមន្ត្រីក្រសួងអប់រំ ស្នាក់នៅផ្ទះលេខ ៩៨ សង្កាត់ទួលស្វាយព្រៃI ខណ្ឌចំការមន ខូចចំហៀងខាងស្ដាំ ។
ប៉ូលិសបញ្ជាក់ទៀតថា មុនកើតហេតុរថយន្ត VIGO បើកតាមផ្លូវលេខ ២០៥ ពីត្បូងទៅជើង ចំណែករថយន្តម៉ាក Mercedes បើកតាមផ្លូវ ៣៤៨ ពីលិចទៅកើតដោយបុកគ្នាចំកណ្ដាលផ្លូវខ្វែងខាង ភាគីទាំងពីរបានជជែកយកត្រូវរៀងៗខ្លួន មិនអាចផ្សះផ្សាគ្នាបានទើបនាំយករថយន្តរក្សាទុកនៅខណ្ឌដោះស្រាយ នៅពេលក្រោយ ។
ដោយឡែកនៅយប់ថ្ងៃដដែល នៅផ្លូវសហព័ន្ធរុស្ស៊ី មុខក្លោងទ្វារវត្តនាគវ័ន សង្កាត់ស្រះចក ខណ្ឌដូនពេញ មានករណីម៉ូតូបុកម៉ូតូ បណ្ដាលឲ្យមនុស្ស ៤ នាក់រងរបួស (ស្រី ៣ នាក់ ប្រុស ១ នាក់) និងនៅផ្លូវចោមចៅ សង្កាត់ចោមចៅ ខណ្ឌដង្កោ មានករណីម៉ូតូបុកម៉ូតូ បណ្ដាលឲ្យបុរសម្នាក់មានរបួសធ្ងន់ ហើយភាគីម៉ូតូម្ខាងទៀត បានបើកគេចបាត់ ៕
No comments:
Post a Comment