បត់​ផ្លូវ​កោង​ពេល​ភ្លៀង​ក្រឡាប់​ធ្លាក់​កំពប់​ម៉ា​ស៊ូ​ត​អស់​ជាង ៥ ពាន់​លីត្រ​

ដោយ : មង្គល (ថ្ងៃទី 24 កក្កដា 2009)
CEN News
បាត់ដំបង​: ឡាន​ស៊ីទែន​ដឹក​ប្រេងម៉ាស៊ូត ១ គ្រឿង មាន​ចំណុះ​ជិត ៤ ម៉ឺន​លីត្រ របស់​ក្រុមហ៊ុន ប្រាយ​វិកថឺ​រី​មេគង្គ​ភេត្រូ​លៀម ធ្វើដំណើរ​ពី​ភ្នំពេញ​មក​បាត់ដំបង​តាម​បណ្តោយ​ផ្លូវជាតិ​លេខ​៥ ពេល​មក​ដល់​ផ្លូវ​កោង និង​មាន​ភ្លៀងរលឹម​ស្រិចៗ​ផង បណ្តាលឲ្យរ​អិ​លកង់ ហើយ​តៃកុង​ជាន់​ហ្វ្រាំង​គំហុក​បណ្តាលឲ្យឡាន​ក្រឡាប់​ធ្លាក់​ពីលើ​ថ្នល់ បណ្ដាល​ឲ្យ​ផ្អៀង​កំ​ពប់​ប្រេង​អស់​ប្រមាណ​ជាង ៥ ពាន់​លីត្រ ប៉ុន្តែ​មិន​មាន​គ្រោះថ្នាក់​ដល់​មនុស្ស​ទេ ។ ហេតុការណ៍​នេះ​កើតឡើង​កាលពី​ម៉ោង ៥ និង ១៥ នាទី​ទៀបភ្លឺ​ថ្ងៃទី​២៣ ខែកក្កដា ឆ្នាំ​២០០៩ នៅ​ចំណុច​ភូមិ​បញ្ញា ឃុំ​កំពង់ព្រះ ស្រុក​សង្កែ ខេត្ត​បាត់ដំបង ។​
​
​មន្ត្រី​អាវុធ​ស្រុក​សង្កែ​ម្នាក់​បានឲ្យដឹងថា មូលហេតុ​ដែល​នាំ​ឲ្យ​ឡាន​ដឹក​ប្រេងម៉ាស៊ូត​នេះ​ក្រឡាប់​ធ្លាក់​ថ្នល់​ទៅ​ ខាងស្តាំ​ដៃ ដោយសារ​នៅ​យប់​ថ្ងៃ​ទី​២២ ខែកក្កដា មាន​ភ្លៀង​ធ្លាក់​ជាប់​រហូត​តាំងពី​ម៉ោង ៩ យប់​រហូតដល់​ម៉ោង ៧ ព្រឹក ថ្ងៃទី​២៣ ។ នៅ​មុនពេល​កើតហេតុ ឡាន​ដឹក​ប្រេង​នេះ​បាន​ធ្វើដំណើរ​ពី​កើត​មក​លិច ពេលមកដល់​កើតហេតុ​ដែល​ជា​ផ្លូវ​កោង ហើយ​ផ្លូវ​រអិល​ផង​ដោយសារ​ឡាន​បើក​លឿន​ផង តៃកុង​ភ្ញាក់​ក៏​ជាន់​ហ្វ្រាំង​គំហុក​បណ្តាលឲ្យឡាន​ក្រឡាប់ ធ្លាក់​ទៅ​ខាង​ក្រោម​ថ្នល់​ប៉ះ​ជើង​ម្ខាង​កំពប់​ប្រេង​ចាក់ចោល​ទៅ​ដី ប៉ុន្តែ​តៃកុង និង​ព្រូឡាន​មិន​មានរ​បួស​អ្វី​ទេ ។ បន្ទាប់ពី​ដឹង​ថា មាន​ឡាន​ក្រឡាប់ និង​មាន​ប្រេង​កំពប់​ប្រជាពលរដ្ឋ​ដែល​មាន​ទីលំនៅ​ជិត​កន្លែងកើតហេតុ បាន​នាំគ្នា​យក​ប៉ោត ធុង​ទៅ​ដង​យក​ប្រេង​កំពប់ ហើយ​យកទៅ​លក់​ឲ្យ​ហាង​លក់​សាំង​ដែល​នៅ​ជិត​នោះ ។​
​
​តៃកុង​ឡាន​ដែល​បើកបរ​មានឈ្មោះ ឈាន ប៊ុនធឿន ភេទ​ប្រុស អាយុ ២០ ឆ្នាំ ទីលំនៅ​ភូមិ ឃុំ​សួង ស្រុក​ត្បូងឃ្មុំ ខេត្ត​កំពង់ចាម ។ ឡាន​ដឹក​ប្រេង​នេះ​ជា​កម្មសិទ្ធិ​របស់​ក្រុមហ៊ុន ប្រាយ​វិកថឺ​រី​មេគង្គ​ភេត្រូ​លៀម ពាក់​ស្លាក​លេខ ភ្នំពេញ 3A 9566 ។ ឡាន​នេះ​ក្រោយពេល​ក្រឡាប់​តំណាង​ក្រុមហ៊ុន​បាន​ហៅ​ឡានស្ទូច​ធុន​ធំ​ចំនួន ២ គ្រឿង ទៅ​ស្ទូច​យក​ឡាន​ដឹក​ប្រេង​ដែល​ក្រឡាប់ធា្លក់​ក្រោម​ថ្នល់ អស់​រយៈពេល​ជិត ៧ ម៉ោង ទើប​ស្ទូច​យកមក​ដាក់​លើ​ថ្នល់ជាតិ​បាន រួច​អូស​យកទៅ​ខេត្ត​បាត់ដំបង ដើម្បី​ផ្ទេរ​ប្រេង​ទៅក្នុង​ស្ថានីយ​មួយកន្លែង ៕
អានបនែ្ដម