ដោយ : សុពិសិដ្ឋ (ថ្ងៃទី 25 កក្កដា 2009)
CEN News
ភ្នំពេញ: បុរសម្នាក់ដែលប៉ូលិសមូលដ្ឋានអះអាងថា ជាមន្ត្រីប៉ូលិសក្រសួងមហាផ្ទៃ ទំនងជាស្រវឹង បានបើករថយន្តកៀររថយន្តមួយគ្រឿងផ្សេងទៀត បណ្ដាលឲ្យក្រឡាប់លើថ្នល់ ។ រីឯម្ចាស់រថយន្តរងរបួសធ្ងន់ ។
គ្រោះថ្នាក់ខាងលើនេះ បានកើតឡើងកាលពីវេលាម៉ោង ៣ និង ៣០ នាទី រសៀលថ្ងៃទី ២៤ កក្កដា នេះ នៅចំណុចផ្លូវ ៣៧១ មុខផ្សារ PC ភូមិត្នោតជ្រុំ សង្កាត់បឹងទំពុន ខណ្ឌមានជ័យ ។
ប៉ូលិសនិយាយថា រថយន្តបង្កម៉ាក តូយូតាកាមរីសេរី ៩៥ ពណ៌សំបកឪឡឹក ស្លាកលេខភ្នំពេញ 2A 6506 បើកបរដោយឈ្មោះ សោម កិតិគុណ អាយុ ៤២ ឆ្នាំ មុខរបរមន្ត្រីប៉ូលិស ស្នាក់នៅឃុំព្រែកឯង ស្រុកកៀនស្វាយ ខេត្តកណ្ដាល រងរបួសដេកពេទ្យឯកជន ។
ប៉ូលិសបន្តថា មុនកើតហេតុរថយន្តបង្កហេតុបើកតាមផ្លូវ ៣៧១ ពីលិចទៅកើត លុះដល់ចំណុចខាងលើក៏បើកកៀររថយន្តកូរ៉េចំណុះ ១ តោនកន្លះ ពណ៌ស ស្លាកលេខ ញ ២០៤៩ ភព ២ ចតស្ងៀម បណ្ដាលឲ្យជ្រុលចង្កូតក្រឡាប់លើថ្នល់ ហើយបុករទេះលក់នំកាឆាយកំពុបថែមទៀត ។ អ្នកបើកបរដែលទំនងជាស្រវឹងបានត្រូវគេបញ្ជូនទៅព្យាបាលនៅពេទ្យ ឯកជន ។
រថយន្តត្រូវបានប៉ូលិសស្ទូចយកទៅរក្សាទុកនៅអធិការដ្ឋានប៉ូលិស ខណ្ឌមានជ័យ ដោះស្រាយនៅពេលក្រោយ ៕
No comments:
Post a Comment