ជិះ​ម៉ូតូ​មិន​ប្រយ័ត្ន បុក​អ្នក​ដើរ​ឆ្លង​ផ្លូវ​សន្លប់​ឈឹង

កម្ពុជាថ្មី
ឧត្ដរមានជ័យ៖ មាន​ករណី​គ្រោះ​ថ្នាក់​ចរាចរ​មួយ​បាន​កើត​ឡើង បណ្ដាល​ឲ្យ​ទាហាន​ម្នាក់​ដួល បោក​ក្បាល​នឹង​ថ្នល់​សន្លប់​ឈឹង នៅ​នឹង​កន្លែង ដោយ​សារ​តែ​ម៉ូតូ​វ៉េវ​បើក​បុក។

ហេតុការណ៍ ​នោះ បាន​កើត​ឡើង​នៅ​វេលា​ម៉ោង ៧​យប់ ថ្ងៃ​ទី​១៥ ខែ​មិថុនា ឆ្នាំ​២០១០ នៅ​ម្ដុំ ខារ៉ាអូខេ​ផ្កាយ​មាស ស្ថិត​ក្នុង​ភូមិ​អភិវឌ្ឍន៍ ឃុំ​ និង​ស្រុក អន្លង់វែង ខេត្ត​ឧត្តរមានជ័យ។

ប្រភព​ព័ត៌មាន​ពី​កន្លែង​កើត​ហេតុ បាន​ឲ្យ​កម្ពុជា​ថ្មី​ដឹង​ថា មុន​កើត​ហេតុ​គ្រោះ​ថ្នាក់​មាន​ទាហាន ៤​ទៅ​៥​នាក់ អង្គុយ​មុខ​ផ្ទះ ដើម្បី​ជជែក​គ្នា​លេង ពេល​នោះ​ទាហាន​ម្នាក់​ឈ្មោះសឹម ផល្លា អាយុ​២៣ ឆ្នាំ ក្រោក​ពី​តុ​អង្គុយ រួច​ដើរ​ឆ្លង​ថ្នល់​បំរុង​ទៅ​បត់​ជើង​តូច​ម្ខាង​ថ្នល់ ដោយ​ដើរ​ដល់​ចិញ្ចើម​ថ្នល់​ក៏​ឃើញ ម៉ូតូ​វ៉េវ ពណ៌​ក្រហម លាយ​ខ្មៅ បើក​ពី​ជើង​ទៅ​ត្បូង​មាន​គ្នា​២​នាក់ បើក​បរ​ដោយ​ឈ្មោះ​សុខ អ៊ុល ភេទ ប្រុស​អាយុ​១៨​ឆ្នាំ ឌុប​ឈ្មោះ​ម៉ាក រឹម ភេទ​ប្រុស អាយុ​២៣​ឆ្នាំ ដោយ​បាន​បើក​បោះ​ពួយ​យ៉ាង លឿន​ នៅ​ពេល​វ៉ាក់​នឹង​មនុស្ស​មិន​ដឹង​គេច​ទៅ​ណា ក៏​បុក​ពេញ​ទំហឹង​បណ្ដាល​ឲ្យ​ទាហាន​នោះ សន្លប់​ឈឹង​តែ​ម្ដង។ ចំណែក​អ្នក​បើកបរ​និង​អ្នក​ជិះ​រង​របួស​ស្រាល៕