ដោយ ឱ ភារិទ្ធ វិទ្យុអាស៊ីសេរី
2010-03-12ច្បាប់បានកំណត់និងតម្រូវឲ្យអ្នកបើកបរយានយន្តគ្រប់ប្រភេទមាន ប័ណ្ណបើកបរ ប៉ុន្តែកសិករខ្លះនៅស្រុកមេមត់មិនសប្បាយចិត្តចំពោះប៉ូលិសដែលចាប់ បង្ខំពួកគេឲ្យបង់ប្រាក់ផាកពិន័យដ៏ច្រើនដោយសារពួកគេពុំមាន ប័ណ្ណបើកបរត្រាក់ទ័រ។
កសិករនៅខេត្តកំពង់ចាមដែលមានត្រាក់ទ័រភ្ជួររាស់ដីបានឲ្យដឹង ថា ពួកគេពុំដែលចាប់អារម្មណ៍ទៅលើច្បាប់ដែលតម្រូវឲ្យអ្នកបើក ត្រាក់ទ័រភ្ជួរដីមានប័ណ្ណបើកបរនោះឡើយ ដោយពួកគេយល់ថា ត្រាក់ទ័រពុំមែនជាយាន្តចរាចរដឹកជញ្ជូនប្រកបអាជីវកម្មលើដងផ្លូវ សាធារណៈដូចរថយន្តផ្សេងៗឡើយ។
លោក សាម៉េន នៅស្រុកពញាក្រែក ឲ្យដឹងថា កាលពីថ្ងៃទី៩ មីនា លោកត្រូវបានប៉ូលិសស្រុកមេមត់ឃាត់ត្រាក់ទ័រលោកសួររកប័ណ្ណបើកបរ ព្រមទាំងគំរាមផាកពិន័យជាប្រាក់ជាច្រើនម៉ឺនរៀលទៀតផង នៅពេលដែលលោកវិលត្រឡប់មកពីភ្ជួរដីចម្ការរបស់បងប្រុសលោកក្នុង ឃុំជាំគ្រវៀន កាលពីពេលថ្មីៗនេះ។
លោក សាម៉េន បានបញ្ជាក់ថា ៖ «ប៉ូលិសទៅសួរខ្ញុំថា មានប័ណ្ណបើកបរ មានពាក់មីដែរឬមួយក៏អត់? គេទារ ៦ម៉ឺន(រៀល) គេចុះឲ្យ ២ម៉ឺនរៀល ហើយខ្ញុំសុំឲ្យគេតែ ១៥.០០០ គេអត់ព្រមទៀត! ហើយគាត់ថា បើសិនខ្ញុំមិនឲ្យលុយហ្នឹងទេ គេនឹងចាប់ខ្ញុំយកទៅដាក់គុក!»។
លោក សុខ ដារិទ្ធ អ្នកបើកបរត្រាក់ទ័រភ្ជួរដីម្នាក់ទៀតនៅឃុំជាំតាម៉ៅ បានឲ្យដឹងដែរថា លោកពុំធ្លាប់ជួបប្រទះនូវបញ្ហាបែបនេះទេ ដែលលោកគិតថា ការបើកបរក្នុងចម្ការវាមិនដូចតាមផ្លូវជាតិឡើយ តែលោកថា នឹងខិតខំរៀបចំបំពេញសំណុំបែបបទកុំឲ្យជួបបញ្ហានេះ។
លោក សុខ ដារិទ្ធ បានអះអាងថា ៖ «ការភ្ជួរដីនៅតាមចម្ការហ្នឹង មិនចាំបាច់ប័ណ្ណបើកបរក៏បានដែរ ព្រោះអីនៅតាមជនបទ តាមចម្ការ តាមព្រៃអ៊ីចឹង។ អ្នកណាទៅមានលុយរៀនយកប័ណ្ណបើកបរឲ្យបាននោះ!»។
ទាក់ទិនបញ្ហានេះ លោក វណ្ណា មន្ត្រីនៃមន្ទីរសាធារណៈការនិងដឹកជញ្ជូនខេត្ត បានឲ្យដឹងថា រាល់អ្នកបញ្ជាយានយន្តគ្រប់ប្រភេទទាំងអស់ត្រូវតែមានប័ណ្ណបើកបរ បើខ្វះខាតលើចំណុចណាមួយគឺគេអាចផាកពិន័យបានទៅតាមច្បាប់កំណត់ ៖ «បើកត្រាក់ទ័រ ឡានកែច្នៃ គោយន្តអីហ្នឹង ត្រូវតែមាន!»។
លោក អ៊ិន ហឿង ស្នងការរងទទួលបន្ទុកសណ្តាប់ធ្នាប់ បានបញ្ជាក់ជូនថា ពុំមានច្បាប់ណាមួយកំណត់ឲ្យទារប្រាក់ដ៏ច្រើនបែបនោះឡើយ ៖ «អាហ្នឹងវាមិនត្រូវទេ អាហ្នឹងជាបុគ្គលទេ។ ច្បាប់គ្មានកំណត់ស្អីដល់ប៉ុណ្ណឹងទេ!»។
លោក នាង សាវ៉ាត មន្ត្រីសិទ្ធិមនុស្សនៃសមាគម អាដហុក បានកត់សម្គាល់ថា អ្នកបើកត្រាក់ទ័រឬប្រភេទយានយន្តកែច្នៃត្រូវតែមានប័ណ្ណបើកបរ ប៉ុន្តែចំពោះការខ្វះខាតលោកថា ក៏ពុំមានច្បាប់ណាឲ្យអនុវត្តផាកពិន័យជាប្រាក់ហួសហេតុបែបនេះ ទេ។
លោក នាង សាវ៉ាត បានមានប្រសាសន៍ថា ៖ «ត្រាក់ទ័រក៏វាទាក់ទងទៅ នឹងការធ្វើចរាចរណ៍លើផ្លូវជាតិដែរ។ តែបើសិនជាមានការពិន័យ ត្រូវតែមានលិខិតស្នាមត្រឹមត្រូវ ថាពិន័យគាត់យ៉ាងម៉េច? ហើយយ៉ាងណាក៏វាមិន ៦-៧ម៉ឺន(រៀល) គំរាមគាត់យកដាក់គុកអ៊ីចឹងទេ អាហ្នឹងវាជារឿងខុសច្បាប់។ ការធ្វើផ្ទុយពីនីតិវិធី ខុសសមត្ថកិច្ចរបស់ខ្លួន វាជាអំពើពុករលួយ។ អាហ្នឹងត្រូវតែហាមឃាត់ ត្រូវតែចៀសវាង»។
មន្ត្រីនៃមន្ទីរចរាចរណ៍ខេត្តកំពង់ចាមមិនបានបញ្ជាក់ឲ្យដឹងពី ចំនួនត្រាក់ទ័រមានតាមតំបន់ក្នុងខេត្ត ថាមានប័ណ្ណបើកបរ ឬមិនមានប័ណ្ណបើកបរនោះ មានចំនួនប៉ុន្មានឡើយ។ ឯអ្នកបើកត្រាក់ទ័របានឲ្យដឹងថា ក្នុងឃុំនីមួយៗមានត្រាក់ទ័រភ្ជួរដីយកប្រាក់ប្រមាណពីជាង ១០គ្រឿង ទៅ ២០គ្រឿង ដែលបានភ្ជួរដីយកប្រាក់ដោយគិតថ្លៃឈ្នួលតាមស្ថានភាពដី ពី ១០ម៉ឺនរៀល និងលើសនេះបន្តិចបន្តួចក្នុងមួយហិកតា ហើយភាគច្រើនគឺពុំមានប័ណ្ណបើកបរឡើយ៕
No comments:
Post a Comment