រថយន្ត​ច្នៃ​របស់​ក្រុម​ល្ខោន​បាសាក់​ក្រឡាប់​ផ្ងារ​ជើង​របួស​១២​នាក់

កម្ពុជាថ្មី
ខេត្ត ​បាត់ដំបង ៖ ក្រុម​តួ​សំដែង​ល្ខោន​បាសាក់​ចំនួន​១២​នាក់ បាន​រង​របួស ព្រម​ទាំង​បាន​បញ្ជូន​ទៅ​កាន់​មន្ទីរ​ពេទ្យ​ទាំង​យប់ នៅ​ពេល​ជួប​នឹង​ឧបទ្ទវហេតុ ដោយសារ​រថយន្ត​របស់​ពួក​គេ​ក្រ ឡាប់​ផ្ងារ​ជើង។

ហេតុការណ៍​នៃ​ការ​ក្រឡាប់​ រថយន្ត​ច្នៃ​នេះ បាន​កើត​ឡើង​កាល​ពី​ព្រលប់​ថ្ងៃ​ទី​ ០១ ខែ​មីនា ឆ្នាំ ២០១០ វេលាម៉ោង​១៩ និង​៣០​នាទី លើ​កំណាត់​ផ្លូវ​ជាតិ​លេខ​៥៧ ត្រង់​ចំណុច​ភូមិ​ស្វាយ​ជ្រុំ សង្កាត់ អូរម៉ាស់ ក្រុង​បាត់​ដំបង ដែល​រថយន្ត​នោះ​ជា​ប្រភេទ​រថយន្ត​កែច្នៃ ព្រម​ទាំង​បាន​បើកបរ​ពី​បាត់​ដំបង ទៅ​ចំណុច​អូរ​ដូន​ពៅ ក្នុង​ទឹក​ដី​ស្រុក​បវេល ដើម្បី​ទៅ​សំដែង​ល្ខោន​នៅ​ទី​នោះ។

តាម ​ការ​បំភ្លឺ​ពី​ក្រុម​សំដែង ដែល​បាន​ជិះ​នៅ​លើ​រថយន្ត​នោះ​បាន​បញ្ជាក់​ថា រថយន្ត​នេះ​បើក​បរ ដោយ​ឈ្មោះ​ឈៀង ឆៃហៀង ភេទ​ប្រុស អាយុ​៦០​ឆ្នាំ រស់​នៅ​ភូមិ​ឡឥដ្ឋ សង្កាត់​ព្រែក​ព្រះ​ស្ដេច ក្រុង បាត់​ដំបង។ លុះ​ទៅ​ដល់​ចំណុច​កើត​ហេតុ ដែល​លក្ខណៈ​ផ្លូវ​ទើប​តែ​ចាក់​ដី និង​ឈូស​ឆាយ​ថ្មីៗ​ដោយ ក្រុម​ហ៊ុន​ចិន​នោះ ក៏​បាន​ជួប​ប្រទះ​ជាមួយ​រថយន្ត​កាមរី​មក​ពី​មុខ​បើក​ក្នុង​ល្បឿន​យ៉ាង​ លឿន​ចំ​កណ្ដាល​ផ្លូវ​ទៀត​ផង។ នៅ​ក្នុង​ខណៈ​នោះ​ផង​ដែរ អ្នក​បើកបរ​បាន​ងាក​ចង្កូត​ទៅ​អែប​ចិញ្ចើម​ផ្លូវ​ខាង ស្ដាំ​របស់​ខ្លួន ដើម្បី​គេច​ពី​ស្ថានភាព​មិន​ល្អ​នៅ​ចំពោះ​មុខ ក៏​ស្រាប់​តែ​ដី​ចិញ្ចើម​ថ្នល់​ដែល​ជា​ដី​ថ្មី​បាន របេះ​ធ្លាក់​កង់​ម្ខាង​បណ្ដាល​ឲ្យ​រថយន្ត​ក្រឡាប់​ធ្លាក់​ទៅ​ក្រោម​តែ​ម្ដង។ ចំណែក​ក្រុម​ល្ខោន ដែល​ជិះ ខាង​លើ​ជាង​២០​នាក់​នោះ បាន​ធ្លាក់​បោក​ទៅ​ដី​រង​របួស​ចំនួន​១២​នាក់ ព្រម​ទាំង​បាន​រថយន្ត​សាមុយ របស់​ការិយាល័យ​ចរាចរ​ផ្លូវ​គោក​ខេត្ត​ដឹក​ជញ្ជូន​ទៅ​ កាន់​មន្ទីរ​ពេទ្យ​ជា​បន្ទាន់​ផង​ដែរ៕