ឡង់គ្រីស័រ​ បើក​កិន​មនុស្ស​ស្លាប់​ម្នាក់​របួស​ធ្ងន់​ម្នាក់ ហើយ​បើក​គេច​បាត់

កម្ពុជាថ្មី
ភ្នំពេញ ៖ និស្សិត​នារី​ម្នាក់ បាន​ស្លាប់​ភ្លាម​ៗ នៅ​កន្លែង​កើត​ហេតុ និង​នារី​ម្នាក់​ទៀត​ដែល​រួម ដំណើរ​ជាមួយ​បាន​ទទួល​រង​របួស​ធ្ងន់ធ្ងរ ខណៈ​ពេល​ពួក​គេ​បើក​ម៉ូតូ​ ឌុប​គ្នា​ ហើយ​ត្រូវ​រថយន្ត​ម៉ាក ឡង់គ្រីស័រ ដែល​សាក្សី​បញ្ជាក់​ថា ពាក់​ផ្លាក​លេខ 2A-8881បាន​បើក​កៀរ​ដួល​ម៉ូតូ រួច​កិន​ពី​លើ​ជន រងគ្រោះ​ស្លាប់​និង​របួស ហើយ​បើក​គេច​បាត់​ដោយ​សុវត្ថិភាព។

ឧប្បត្តិហេតុ គ្រោះ​ថ្នាក់​ដ៏​រន្ធត់​នោះ​បាន​កើត​ឡើង កាល​ពី​វេលា​ម៉ោង ១​និង​១៥​នាទី រំលង​អា ធ្រាត្រ ឈាន​ចូល​ថ្ងៃ​ទី​២៦​​ខែ​កុម្ភៈ ឆ្នាំ​២០១០ នៅ​ចំណុច​មុខ​សណ្ឋាគារ​ខារ៉ា ផ្លូវលេខ​៤៧ ក្នុង​សង្កាត់ ស្រះចក ខណ្ឌ​ដូនពេញ រាជធានី​ភ្នំពេញ។

ជនរងគ្រោះ ដែល​ត្រូវ​រថយន្ត​កិន​ស្លាប់​និង​របួស​ធ្ងន់​នោះ ទី​១​ឈ្មោះ ទួន ចរិយា ភេទ​ស្រី អាយុ​១៩​ឆ្នាំ មុខ​របរ​និស្សិត ស្នាក់​នៅ​ផ្ទះ​លេខ ៥១២ E សង្កាត់​ចោមចៅ ខណ្ឌ​ដង្កោ (បាន​ស្លាប់​នៅ នឹង​កន្លែង​កើត​ហេតុ) និង​ទី​២​ឈ្មោះ ឆាំ សុខា ភេទ​ស្រី អាយុ​២០​ឆ្នាំ ស្នាក់​នៅ​ភូមិ ព្រែក​អំបិល ឃុំ ព្រែក​ក្រាំង ស្រុក​ស្អាង ខេត្ត​កណ្ដាល(របួស​ធ្ងន់​ធ្ងរ) ជន​រងគ្រោះ​ទាំង​ពីរ​នាក់​នេះ ជិះ​ម៉ូតូ cub ជ្រុង ពណ៌ទឹកប៊ិច ពាក់​ផ្លាក​លេខ ឌ.៣៦១៩ ភព១។

សាក្សី ​នៅ​កន្លែង​កើត​ហេតុ​បាន​ឲ្យ​ដឹង​ថា នៅ​មុន​ពេល​កើត​ហេតុ គេ​បាន​ឃើញ​ជនរងគ្រោះ ទាំង​២​នាក់​នោះ​បាន​បើក​ម៉ូតូ​គុប​ជ្រុង ឌុប​គ្នា​ដោយ​ធ្វើ​ដំណើរ​តាម​ផ្លូវ​លេខ ៤៧ ពី​​ជើង​មក​ត្បូង លុះ មក​ដល់​ចំណុច​កើត​ហេតុ​ពេល​នោះ​មាន​រថយន្ត​ម៉ាកឡង់គ្រីស័រ​​ពាក់​ផ្លាក​លេខ 2A-8881 ដែល​បើក យ៉ាង​លឿន​មក​ពី​ក្រោយ ស្រប​ទិស​គ្នា​បាន​កៀរ​ម៉ូតូ​ជនរងគ្រោះ ដួល​ប្រាវ​បណ្តាល​ឲ្យ​ជន​រងគ្រោះ អ្នក​បើក​ម៉ូតូ​នោះ ត្រូវ​រថយន្ត​នោះ​កិន​ខ្ទេច​ក្បាល​ស្លាប់​ភ្លាម​ៗ​នៅ​កន្លែង​កើត​ហេតុ ចំណែក​នារី​ម្នាក់ ទៀត ដែល​រួម​ដំណើរ​ជាមួយ​បាន​ទទួល​រង​​របួស​យ៉ាង​ធ្ងន់ធ្ងរ តែ​ពុំ​ត្រូវ​បាន​រថយន្ត​បង្កហេតុ​នោះ ឈប់​មើល​ឡើយ ដោយ​បន្ថែម​ល្បឿន​បើក​គេច​បាត់​ភ្លាម​ៗ​ផង​ដែរ៕