Sunday, May 9, 2010

បើក​ម៉ូតូ​បុក​ម៉ូតូ​ពីក្រោយ​ស្លាប់​ម្នាក់

CEN news
ម៉ូតូ ១ គ្រឿង ជិះ​គ្នា ២ នាក់ បាន​បើក​យ៉ាង​លឿន​ជ្រុល​បុក​ម៉ូតូ ១ គ្រឿង​ទៀត កំពុង​ធ្វើដំណើរ​ស្រប​ទិស​គ្នា បណ្តាល​ឲ្យ​បុរស​ម្នាក់រងរបួស​ធ្ងន់ ហើយ​បាន​ស្លាប់​ក្រោយ​ពេល​បញ្ជូន​ដល់​មន្ទីរពេទ្យ ។​

គ្រោះថ្នាក់​ចរាចរ ខាងលើនេះ កើតឡើង​កាល​វេលា​ម៉ោង ៦ និង ៥ នាទី​ព្រឹក​ថ្ងៃទី ៧ ឧសភា​កន្លង​ទៅនេះ នៅ​ចំណុច​មុខខ្លោង​ទ្វារវ​ត្ត​ប្រជុំ​សាគរ ផ្លូវ​ទន្លេសាប សង្កាត់​ជ្រោយចង្វា ខណ្ឌ​ឫស្សីកែវ ។

ប៉ូលិស​ចរាចរ បានឲ្យដឹងថា ម៉ូតូ​បង្ក​ម៉ាក HONDA C125-07 ពណ៌​ខ្មៅ ស្លាក​លេខ​តាកែវ 1G 8564 បើកបរ ដោយ​ឈ្មោះ ឡៅ សុខុម ភេទ​ប្រុស អាយុ ២៣ ឆ្នាំ និង​អ្នករួមដំណើរ​ឈ្មោះ ប៉ែន ចាន់​សារឿ​ន ភេទ​ប្រុស អាយុ ៣៩ ឆ្នាំ មុខរបរ​ជាងសំណង់ អ្នក​ទាំង ២ ស្នាក់​នៅ​ក្រុម​៨ ភូមិ​១២ សង្កាត់​បឹងកក់​១ ខណ្ឌ​ទួលគោក ។ ចំណែក​ភាគី​ម្ខាង​ទៀត ម៉ូតូ​ម៉ាក Step ពណ៌​ខ្មៅ ស្លាក​លេខ​ភ្នំពេញ 1S 9811 បើកបរ​ដោយ​ឈ្មោះ ស្មាន អ៊ូ​មើ​ត ភេទ​ប្រុស អាយុ ១៧ ឆ្នាំ មុខរបរ​លក់​សាច់គោ ស្នាក់​នៅផ្ទះ​លេខ ៣៧ ភូមិ​៣ ផ្លូវ​ទន្លេសាប សង្កាត់​ជ្រោយចង្វា ខណ្ឌ​ឫស្សីកែវ ។​

ប៉ូលិស​បន្តថា មុន​កើតហេតុ​ម៉ូតូ HONDA ពណ៌​ខ្មៅ បើក​ឌុប​គ្នា​តាម​ផ្លូវ​ទន្លេសាប ពី​ត្បូង​ទៅ​ជើង ហើយ​បុក​ម៉ូតូ​ម៉ាក Step ពីក្រោយ បណ្តាលឲ្យ​ដួល​ប្រកាច់ប្រកិន​ទាំងអស់គ្នា ។ ដោយឡែក​បុរស​ឈ្មោះ ប៉ែន ​ចាន់​សារឿ​ន ដួល​បោក​ក្បាល​របួស​ធ្ងន់ ហើយ​បាន​ស្លាប់​ពេល​បញ្ជូន​ដល់​មន្ទីរពេទ្យ​កាល់ម៉ែត ។ សព​ក្រុមគ្រួសារ​យក​ទៅ​ធ្វើបុណ្យ ។ រីឯ​ម៉ូតូ​ទាំង​ពីរ​រក្សាទុក​នៅ​សង់​ត្រាល់ ៕
អានបន្ថែម

No comments: