ដោយ ៖ កោះឯករាជ្យ
ខេត្ដបន្ទាយមានជ័យ ៖ យ៉ាងហោចណាស់ក៏មានមនុស្សម្នាក់ស្លាប់និងម្នាក់ទៀតរងរបួសធ្ងន់ នៅក្នុងឧប្បត្ដិហេតុគ្រោះថ្នាក់ចរាចរណ៍ពីរលើកនៃថ្ងៃទី១ ឧសភា ២០១០ ក្នុងភូមិសាស្ដ្រខេត្ដបន្ទាយមានជ័យ។ តាមមន្ដ្រីនគរបាលចរាចរខេត្ដបានឱ្យដឹងថា គ្រោះថ្នាក់ចរាចរណ៍លើកទី១ បានកើតឡើងកាលពីវេលាម៉ោង១០និង៤៥នាទីព្រឹក នៅលើកំណាត់ផ្លូវជាតិលេខ៥ ខាងលិចស្ពានទឹកថ្លា ចំងាយ២០០ម៉ែត្រ ក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ រវាងក្បួនម៉ូតូធុនយក្សចំនួន១៩គ្រឿង ដែលធ្វើដំណើរទេសចរណ៍ទៅកាន់ខេត្ដសៀមរាប ហើយមានម៉ូតូ១គ្រឿងក្នុងចំណោមម៉ូតូទាំង១៩គ្រឿង បានបើកកៀរជាមួយម៉ូតូហុងដាឌ្រីមមួយគ្រឿងក្នុងទិសដៅស្របគ្នាពី លិចទៅកើត។ ជនរងគ្រោះដែលស្លាប់ឈ្មោះង៉ិក ចន្ថា ភេទប្រុស អាយុ២៥ឆ្នាំ នៅភូមិពង្រ ឃុំបន្ទាយនាង ស្រុកមង្គលបុរី បើកបរម៉ូតូម៉ាកហុងដា ធុនសេ១២៥ ពណ៌ខ្មៅ ស៊េរី២០១០ ពាក់ស្លាកលេខបន្ទាយមានជ័យ ១C-៧៧៧៩ ។
ចំណែកអ្នកបើកបរម៉ូតូក្នុងដំណើរទេសចរណ៍ឈ្មោះសុរ៉ា ផាន់សាងៀមសាក់ ភេទប្រុស អាយុ៥៦ឆ្នាំ ជនជាតិថៃ រស់នៅស្រុកមឿង ខេត្ដអាំណាតចៈរ៉ើន ប្រទេសថៃ ជាអ្នកធ្វើដំណើរទេសចរណ៍ទៅកាន់ខេត្ដសៀមរាប បើកបរម៉ូតូយក្សម៉ាក BMW ធុន១១៥០ CC ពណ៌ខៀវ-ស ពាក់ស្លាកអក្សរថៃលេខ៥៥៥ ។ ប្រភពព័ត៌មានដដែលបានឱ្យដឹងទៀតថា មុនពេលកើតហេតុអ្នកបើកបរម៉ូតូទាំង២គ្រឿង បានបើកពីទិសខាងលិចទៅទិសខាងកើតក្នុងល្បឿនលឿនដូចគ្នា លុះមកដល់ចំណុចខាងលើដែលជាផ្លូវកោង អ្នកបើកបរម៉ូតូហុងដាឌ្រីម បានបើកងាកមកខាងស្ដាំដៃរបស់ម៉ូតូធំ បណ្ដាលឱ្យម៉ូតូធំកៀរដួល ។ ពេលនោះអ្នកបើកបរម៉ូតូហុងដាឌ្រីម បានខ្ទាតចេញពីម៉ូតូទៅបោកក្បាលនឹងបង្គោលរនាំងដែកផ្លូវកោងធ្វើឱ្យ បែកមួកសុវត្ថិភាព និងបែកក្បាលធ្លាយខួរស្លាប់ភ្លាមៗនៅកន្លែងកើតហេតុ ឯម៉ូតូខ្ទាតជាប់នឹងរនាំងដែកចំណែកម៉ូតូធំនោះខូចខាតបន្ដិចបន្ដួច ហើយអ្នកបើកបរមិនមានគ្រោះថ្នាក់អ្វីទេ។ មន្ដ្រីនគរបាលចរាចរដដែលបានបន្ដទៀតថា ក្រោយពីធ្វើការវាស់វែងរួច សពជនរងគ្រោះត្រូវបានដឹកតាមរថយន្ដសង្គ្រោះរបស់ស្នងការដ្ឋានយកទៅ ប្រគល់ជូនក្រុមគ្រួសារសពចាត់ចែងធ្វើបុណ្យតាមប្រពៃណី ហើយករណីគ្រោះថ្នាក់ខាងលើនេះ ក្រុមហ៊ុន អង្គរធីខេអែន ត្រាវ៉ែល រ៉ាប់រងដោះស្រាយ។
ដោយឡែកនៅថ្ងៃដដែលនោះដែរ នាវេលាម៉ោង២និង៣០នាទីរសៀល នៅលើកំណាត់ផ្លូវជាតិលេខ៦ ជិតស្ពានសាលាក្រៅស្ថិតនៅភូមិសាលាក្រៅ សង្កាត់ភ្នៀត ក្រុងសិរីសោភ័ណ មានគ្រោះថ្នាក់ចរាចរណ៍មួយលើកទៀត ដោយរថយន្ដបុកជាមួយគោយន្ដកន្ដ្រៃក្នុងទិសដៅបញ្ច្រាសគ្នា ។ តាមមន្ដ្រីនគរបាលចរាចរឱ្យដឹងថា មុនពេលកើតហេតុមានរថយន្ដមួយគ្រឿងម៉ាកម៉ុងតេរ៉ូមីតស៊ុយប៊ីស៊ី ពណ៌បៃតងចាស់ ពាក់ស្លាកលេខភ្នំពេញ ២C-៦៨៦៤ បើកបរដោយស្ដ្រីឈ្មោះអាន់ណា អាយុ៣៧ឆ្នាំ ជនជាតិអេស្ប៉ាញ មុខងារទីប្រឹក្សាមជ្ឈមណ្ឌលកុមារកំព្រា ដែលមានទីស្នាក់ការនៅភូមិសាលាឆេះ ឃុំរហាល ស្រុកព្រះនេត្រព្រះ បើកបរក្នុងទិសដៅពីលិចទៅកើត បានបុកជាមួយគោយន្ដកន្ដ្រៃ ដែលបើកក្នុងទិសដៅបញ្ច្រាសទិសគ្នា ខណៈគោយន្ដបត់មកខាងឆ្វេងដៃគន្លងផ្លូវរថយន្ដ។ ក្នុងហេតុការណ៍នេះបណ្ដាលឱ្យអ្នកបើកបរគោយន្ដកន្ដ្រៃ ឈ្មោះគង់ សូល ភេទប្រុស អាយុ២១ឆ្នាំ នៅភូមិបន្ទាត់បោះ ឃុំតាផូ ស្រុកស្វាយចេក រងរបួសធ្ងន់ ហើយត្រូវបានរថយន្ដសង្គ្រោះរបស់ស្នងការដ្ឋាននគរបាលខេត្ដ ដឹកយកទៅមន្ទីរពេទ្យភ្លាមៗ។ ចំពោះគោយន្ដកន្ដ្រៃដាច់កង់ផ្នែកខាងស្ដាំ និងរថយន្ដខូចខាតផ្នែកខាងមុខហើយត្រូវបានសមត្ថកិច្ចនាំយកទៅរក្សា ទុកដើម្បីធ្វើការដោះស្រាយ ។
No comments:
Post a Comment