ស្រវឹងធ្លាក់ភ្នែក បើករថយន្ត​បុក​បង្គោល​ភ្លើង

ដោយ : សុ​ពិសិដ្ឋ​
ភ្នំពេញ​: រថយន្ត​កាមរី​មួយ​គ្រឿង បាន​បើក​បុក​បង្គោល​ភ្លើង បណ្តាលឲ្យ​រថយន្ត​ខូច​ខ្ទេច និង​បង្គោល​ភ្លើង​បាក់​ទ្រេត​ស្ទើរ​រាប​ដល់​ដី ប៉ុន្តែ​អ្នកបើកបរ​ និង​អ្នករួមដំណើរ​មិន​រងរបួស​ធ្ងន់ធ្ងរ​ឡើយ ។​
​គ្រោះ​ថ្នាក់​ខាងលើនេះ បាន​កើតឡើង​កាលពី​វេលា​ម៉ោង ៣ និង ១៥ នាទី​ទៀបភ្លឺ​ថ្ងៃទី ២០ មករា​នេះ នៅតាម​ផ្លូវ 271 មុខ​វិទ្យាល័យ​ជាស៊ីម​សាមគ្កី សង្កាត់​បឹង​សាឡាង ខណ្ឌ​ទួលគោក ។​
​ប៉ូលិស​និយាយថា រថយន្ត​បង្ក​ម៉ាក​កាមរី ពណ៌​ស ស៊េរី 90 ស្លាក​លេខ ង 3365 ភព​2 បើកបរ​ដោយ​បុរស​ម្នាក់ ពុំ​ទាន់​ស្គាល់​អត្តសញ្ញាណ និង​អ្នករួមដំណើរ​ជា​បុរស​ម្នាក់​ទៀត ។​
​សាក្សី​បាន​បំភ្លឺ​ប្រាប់​ប៉ូលិស​ថា មុន​កើតហេតុ​គេ​ឃើញរថយន្ត​បើក​តាមផ្លូវ 271 ពី​ជើង​ទៅ​ត្បូង​យ៉ាង​លឿន ។ លុះដល់​ចំណុច​ខាងលើ​ដែល​ជា​ផ្លូវ​កោង​រថយន្ត​ជ្រុល​ទៅ​ចំណែក​ខាងឆ្វេង​ដៃ បុក​បង្គោល​ភ្លើង​លាន់​សូរ​ក្ទាំង​តែម្តង ។​
​អ្នកបើកបរ និង​អ្នក​រួម​ដំណើរ​ដែល​ទំនង​ជា​ស្រវឹង​ជោកជាំ និង​រងរបួស​ស្រាល​បាន​ហៅ​ម៉ូតូឌុប​ជិះ​ទៅ​បាត់ ។​
​រថយន្ត​ត្រូវបាន​ប៉ូលិសចរាចរ​ក្រុង​ស្ទូច​យកទៅ​រក្សាទុកនៅ​សាលា​រាជធានី​ភ្នំពេញ ដើម្បី​ធ្វើការ​ផាកពិន័យ​ទ្វេដង ៕