ដោយ ឡេង ម៉ាលី
មានមនុស្ស ២នាក់បានស្លាប់ និង៦នាក់ផ្សេងទៀតរងរបួសក្នុងគ្រោះថ្នាក់ចរាចរណ៍ក្រឡាប់ឡានមួយ នៅក្នុងស្រុកស្នួល ខេត្តក្រចេះ កាលពីវេលាម៉ោងប្រមាណ ១២ និង ២៥នាទី ថ្ងៃទី១៥ ខែមេសា ឆ្នាំ២០១០នេះ។
សាក្សីមួយរូបឈ្មោះ សុខ សុភក្រ្តា ដែលស្ថិតក្នុងរថយន្តនោះ បាននិយាយឲ្យដឹងថា រថយន្តក្រឡាប់នោះជាប្រភេទ Lexus ហើយបានខូចខាតស្ទើរទាំងស្រុង បន្ទាប់ពីក្រឡាប់ជាច្រើនជុំ។
ក្នុងគ្រោះថ្នាក់ក្រឡាប់ឡាននេះ មានអ្នកបើកបរម្នាក់ និងស្ត្រីអ្នករួមដំណើរម្នាក់ទៀត បានស្លាប់នៅនឹងកន្លែង ក្នុងនោះមានរបួសធ្ងន់ជាងគេម្នាក់ របួសបាក់ដៃបាក់ជើងចំនួន ៤នាក់ និងរបួសស្រាលម្នាក់។
លោក សុខ សុភ្រ្តា និយាយអំពីមូលហេតុនៃការក្រឡាប់នោះថា អាចបណ្ដាលមកពីការបែកកង់មុខខាងឆ្វេង ៖ «ឡានហ្នឹងនិយាយទៅអត់ ទាន់ដឹងច្បាស់ថាមូលហេតុបែកកង់ ឬមួយក៏ប៉ះគ្នាអត់ដឹង គ្រាន់តែច្បាស់ៗ អ្នកភូមិហ្នឹងគាត់ថា ឡានហ្នឹងបែកកង់។ ពួកខ្ញុំអត់ទាន់មាននរណាដឹងច្បាស់ទេ ក្រឡាប់ឡាន ដឹងខ្លួនឡើងគឺនៅក្រៅឡាន។ ខ្ទាតចេញពីឡានមកទាំងអស់។ អត់មាននរណានៅក្នុងឡានទេ»។
ស្នងការនគរបាលខេត្តក្រចេះ លោក ជួង សៀងហាក់ បានសន្និដ្ឋានអំពីគ្រោះថ្នាក់ជាបឋមលើស្ថានភាពជាក់ស្ដែងថា ឡានបានបែកកង់និងរបូតកាឡេ។
លោក ជួង សៀងហាក់ បានឲ្យដឹងដូច្នេះ ៖ «ការសន្និដ្ឋានមិនមែនជា ឯកទេស ប៉ុន្តែជាទម្លាប់ដែលធ្លាប់មានបទពិសោធន៍ ពីព្រោះប្រភេទ Lexus ក៏វាមិនងាយនឹងរបូតអាក្បាលត្រងោលហ្នឹងបានដែរ។ ប៉ុន្តែបើសិនណាវាបែកកង់ហើយ វារមួលយ៉ាន់ គឺវាទៅហើយ ព្រោះវាដូចដៃយើងដួលទៅវាបត់មកក្រោយវិញអ៊ីចឹង។ យើងសន្និដ្ឋានអ៊ីចឹង ប៉ុន្តែយើងមិនមែនជាអ្នកបច្ចេកទេសទេ។ នេះដោយសារឃើញជាក់ស្ដែង វារបូតកាឡេចេញពីយ៉ាន់កង់ហ្នឹង។ អ៊ីចឹងយើងគិតថា វាបែកហើយបានបត់អាយ៉ាន់ហ្នឹងមកក្រោយ វាទៅមុខមិនរួច។ វាអូសប៉ុន្មានត្រឡប់ ហើយទៅប៉ះឡានកាមរី៩១ គេទៀតនោះ»។
លោកមានប្រសាសន៍ថា ស្ត្រីម្នាក់ដែលស្លាប់នោះ លោកនៅមិនទាន់ស្គាល់អត្តសញ្ញាណនៅឡើយទេ ហើយក៏មិនមែនជាសមាជិកគ្រួសាររបស់អ្នកស្លាប់ម្នាក់ទៀត និងក្នុងចំណោមអ្នករួមដំណើរផ្សេងទៀតដែរ។
លោក ជួង សៀងហាក់ មានប្រសាសន៍ដូច្នេះ ៖ «ម្នាក់នោះដូចជាស្ថិត ក្នុងក្រុមគ្រួសាររួមដំណើរជាមួយគ្នា។ ឯម្នាក់ទៀតស្រីនេះ ដូចជាអ្នកសុំជិះ អត់ទាន់រកអត្តសញ្ញាណ អត់ទាន់រកស្អីឃើញទេ»។
No comments:
Post a Comment