ម៉ូតូ​បុក​ម៉ូតូ​ស្លាប់​ម្នាក់​របួសធ្ងន់​ ៤ ​នាក់​ នៅ​ខណ្ឌ​ដង្កោ

CEN
ម៉ូតូ VIVA ជិះ​គ្នា ​២ ​នាក់ បើក​ឆ្លងផ្លូវត្រូវ​ម៉ូតូ ​១ គ្រឿង​ទៀត​បើក​យ៉ាង​លឿន​បុក​ចំ​ទទឹង បណ្តាលឲ្យ​មនុស្ស​ ៥ ​នាក់​ដួល​រណូករណែល របួស​ធ្ងន់​ទាំង​អស់ ហើយ​បាន​ស្លាប់​ម្នាក់​ពេល​បញ្ជូនដល់​មន្ទីរពេទ្យ ។​

​ ​គ្រោះថ្នាក់​ខាងលើនេះ ​កើតឡើង​កាលពី​វេលា​ម៉ោង ៨​ និង​ ៣០ ​នាទី​យប់ ថ្ងៃទី​៨ ​ឧសភា ​កន្លង​ទៅនេះ នៅ​តាម​ផ្លូវជាតិ​លេខ​៤ ភូមិ​ជម្ពូ​វ័ន សង្កាត់​ចោមចៅ ខណ្ឌដង្កោ ។ ប៉ូលិស​និយាយថា ម៉ូតូ​បើក​ឆ្លងផ្លូវ​ម៉ាក VIVA ពណ៌​ខ្មៅ​ស្លា​កលេខ​កណ្តាល 1G 7080 បើកបរ​ដោយ​ឈ្មោះ ធន់ នាវ ភេទ​ប្រុស អាយុ​២២​ឆ្នាំ មុខរបរ​កម្មករ​រោងចក្រ ស្នាក់​នៅ​ឃុំ​កន្ទោក ស្រុក​អង្គស្នួល ខេត្ត​កណ្តាល (ស្លាប់) និងអ្នករួមដំណើរ​ឈ្មោះ ទិន រតនៈ ភេទ​ប្រុស អាយុ​២៦​ឆ្នាំ មុខរ​បរជួស​ជុល​ម៉ូតូ ស្នាក់​នៅ​ឃុំ​ជាមួយ​គ្នា​របួសធ្ងន់ ។ ភាគី​ម្ខាង​ទៀត​ម៉ូតូ​ម៉ាក HONDA C125 ពណ៌​ខ្មៅ គ្មាន​ស្លាក​លេខ បើកបរ​ដោយ​ឈ្មោះ វណ្ណា ចិត្រា ភេទ​ប្រុស អាយុ​២០​ឆ្នាំ មុខរបរ​រត់​ម៉ូតូឌុប ស្នាក់នៅ​សង្កាត់​ទឹកថ្លា សង្កាត់​សែន​សុខ អ្នករួមដំណើរ​ឈ្មោះ នី ហឿន ភេទ​ប្រុស អាយុ​២០​ឆ្នាំ មុខរបរ​កម្មករសំណង់ ស្នាក់នៅ​សង្កាត់​ត្រពាំង​ក្រសាំង ខណ្ឌដង្កោ និង​ឈ្មោះ ជិន រ៉​ន ភេទ​ប្រុស អាយុ​២២​ឆ្នាំ មុខរបរ​កម្មករសំណង់ ស្នាក់នៅ​ភូមិ​ជាមួយគ្នា ។ ពួកគេ​ទាំង​៣​នាក់​ របួសធ្ងន់កំពុង​ដេកពេទ្យ​ឯកជន និង​ពេទ្យ​លោកសង្ឃ ។​

​ ​ប៉ូលិស​បានឲ្យដឹង​ទៀតថា មុន​កើតហេតុ​ម៉ូតូ VIVA បើក​ឆ្លងផ្លូវ​ស្របពេលនោះ​ម៉ូតូ HONDA បើក​តាម​ផ្លូវជាតិ​លេខ​៤ យ៉ាង​លឿន ពី​កើត​ទៅ​លិច បុក​ចំ​ទទឹង​ម៉ូតូ​ពេញទំហឹង បណ្តាលឲ្យ​ដួលរ​ណូក​រណែល​ពេញ​ផ្លូវ រង​របួសធ្ងន់ ហើយ​បុរស​ឈ្មោះ ធន់ នាវ បាន​ស្លាប់​ក្រោយពេល​បញ្ជូន​ដល់​មន្ទីរពេទ្យ ។ ម៉ូតូ​ទាំង​ពីរ​រក្សាទុក​នៅ​អធិការដ្ឋាន​ប៉ូលិស​ខណ្ឌ​ដង្កោ ដោះស្រាយ​តាម​នីតិវិធី ៕​
អានបន្ថែម