ដឹក​នាង​ខារ៉ាអូខេ​ទៅ​លេង​ខេត្ត​ព្រះសីហនុ​ទាំងយប់​ ដល់​ព្រៃនប់​ក្រឡាប់​ស្លាប់​មា្នក់ ​របួស ៣​ នាក់​

ដោយ : សុ​ពិសិដ្ឋ​ (ថ្ងៃទី 27 សីហា 2009)
CEN News

ស្ត្រី​រងគ្រោះ សុភា រតនា

ភ្នំពេញ​: រថយន្ត​មួយ​គ្រឿង​មាន​អ្នកធ្វើដំណើរ ៤​ នាក់​ បាន​បើក​យ៉ាង​លឿន​ពេល​យប់​តាម​បណ្តោយ​ផ្លូវ​ជាតិ​លេខ​៤ ក្នុង​ទិសដៅ​ទៅ​លេង​ខេត្ត​ព្រះសីហនុ បាន​ជ្រុល​ចង្កូត​ក្រឡាប់​ដោយ​ឯកឯង បណ្តាល​ឲ្យ​នារី​ម្នាក់​ស្លាប់ និង​មនុស្ស ៣​នាក់​ទៀត​រងរបួស​ធ្ងន់ ដោយ​មូលហេតុ​អ្នកបើកបរ​ស្រវឹង ងងុយដេក និង​បើ​ក​លឿន ។​

​គ្រោះថ្នាក់​ខាងលើនេះបាន​កើតឡើង​កាលពី​វេលា​ម៉ោង ១២ និង ៣០ នាទី អធ្រាត្រ​ថ្ងៃ​ទី២៧ សីហា នេះ​នៅ​ចំណុច​ផ្លូវ​កោង ផ្លូវជាតិ​លេខ​៤ ភូមិ​ត្រពាំង​មូល សង្កាត់​ជើងគោ ខណ្ឌ​ព្រៃនប់ ខេត្ត​ព្រះសីហនុ ។​

​ ប្រភព​ពី​ខណ្ឌ​ព្រៃនប់បានឲ្យដឹងថា រថយន្ត​បង្ក​គ្រោះថ្នាក់​ដោយ​ឯកឯង ម៉ាក 4RUNNER ពណ៌​ទឹកប្រាក់ បើកបរ​ដោយ​ឈ្មោះ ហែម ឧត្តម ភេទ​ប្រុស អាយុ ៣០​ឆ្នាំ ស្នាក់នៅ​សង្កាត់​ជ័យជំនះ ខណ្ឌដូនពេញ (​របួសធ្ងន់​) អ្នករួមដំណើរ ១​.ឈ្មោះ ហួត រង្សី ភេទ​ប្រុស អាយុ ២៥​ឆ្នាំ ស្នាក់​នៅ​ឃុំ​ព្រែក​ក្តាម ខេត្ត​កណ្តាល (​របួសធ្ងន់​) ២.​ឈ្មោះ សុភា រតនា ភេទ​ស្រី អាយុ ២៤​ឆ្នាំ ស្នាក់នៅ​សង្កាត់​បឹង​ទំពុន ខណ្ឌមានជ័យ (​របួសធ្ងន់​) និង៣ ឈ្មោះ ​ម៉េត ស៊ីណា ហៅ​ឡាយ ភេទ​ស្រី អាយុ ១៨​ឆ្នាំ ស្នាក់នៅ​សង្កាត់​ទួល​ទំពូង ខណ្ឌចំការមន (​ស្លាប់​នៅ​កន្លែងកើតហេតុ​) ។​

​ ស្ត្រី​ឈ្មោះ សុភា រតនា ដែល​កំពុង​សម្រាក​ព្យាបាល​នៅ​មន្ទីរពេទ្យ​កាល់ម៉ែ​តក្រុងភ្នំពេញ បាន​និយាយ​ឲ្យដឹងថា នៅ​យប់​ថ្ងៃទី២៦ សីហា បុរស​ទាំង ២​នាក់ បាន​ទៅ​ច្រៀង​ខារ៉ាអូខេ នៅ​ហាង​មួយ​ប្លុក​ផ្សារ​តាប៉ាង សង្កាត់​ផ្សារ​ថ្មី​៣ ខណ្ឌដូនពេញ ។ បន្ទាប់​ពី​ច្រៀង​ចប់​នៅ​ម៉ោង ១១ និង ២០ នាទី យប់​ ពួកគាត់​បបួល​នាង​ទាំង​២ ទៅលេងខេត្ត​ព្រះសីហនុទាំងយប់ ។ ពេល​ទៅដល់​ចំណុច​ខាងលើ ស្រាប់តែ​ជ្រុល​ចង្កូត​ធ្លាក់​ពីលើ​ផ្លូវ​ក្រឡាប់​តែម្តង បណ្តាលឲ្យ​ឈ្មោះ ម៉ែត ស៊ីណា ស្លាប់ ក្រៅពី​នោះ​របួសធ្ងន់ទាំងអស់ ។​

​ប្រភព​ពី​ខណ្ឌ​ព្រៃនប់បានឲ្យដឹងថា មូលហេតុ​ដែល​បណ្តាលឲ្យ​គ្រោះថ្នាក់ មក​ពី​អ្នកបើកបរ​ហូប​ជាតិ​ស្រវឹង ងងុយដេក និង​បើក​លឿន​នៅ​ផ្លូវ​កោង ។ ក្រោយពេល​គ្រោះថ្នាក់​សមត្ថកិច្ច​បាន​ហៅ​រថយន្ត​សង្គ្រោះ​នៃ​មន្ទីរពេទ្យ​ បង្អែ​កខេត្ដព្រះសីហនុ ដឹក​មក​សង្គ្រោះ​នៅ​មន្ទីរពេទ្យ​កាល់ម៉ែត​នៅវេលា​ម៉ោង ៦ និង ១៦ នាទី​ព្រឹក ថ្ងៃទី២៧ សីហា ។ ចំណែក​រថយន្ត​រក្សាទុក​នៅ​អធិការដ្ឋាន ប៉ូលិស​ខណ្ឌ​ព្រៃនប់ ៕