ដោយ : សេរី (ថ្ងៃទី 15 សីហា 2009)
CEN News
កំពង់ធំ: យុវជនម្នាក់បានបាត់បង់ជីវិត ហើយយុវជនម្នាក់ទៀតរងរបួសជាទម្ងន់ក្រោយពីយុវជនទាំងពីរ បានជិះម៉ូតូបុកគ្នាយ៉ាងពេញទំហឹង ។
ហេតុការណ៍នេះបានកើតឡើង នៅវេលាម៉ោង ៨ និង ១០ នាទីព្រឹកថ្ងៃទី១៤ ខែសីហា នៅគល់ស្ពានកំពង់ធំ ចំណុចផ្លូវខ្វែងកំពង់បៅ ។ សាក្សីបានប្រាប់ប៉ូលិសថា មុនពេលកើតហេតុគេឃើញ យុវជនម្នាក់ដែលគេស្គាល់ឈ្មោះថា ថឹក ហុង រស់នៅភូមិព្រៃក្តី ឃុំតាំងក្រសៅ ស្រុកប្រាសាទសំបូរបើកម៉ូតូយ៉ោងលឿនពីជើងទៅត្បូង ។ ល្បឿនដែលជនរងគ្រោះបើកនោះលឿនណាស់ ។ លុះមកដល់ចំណុចកើតហេតុខាងលើបានទៅប៉ះកន្ទុយម៉ូតូផ្សេងមួយទៀត ដែលកំពុងបើកពីមុខ ប៉ុន្តែម៉ូតូនោះមិនបានដួលទេ ។ ដោយឡែកម៉ូតូជនរងគ្រោះបានផ្លាតចេញពីចំណែកផ្លូវខាងស្តាំរបស់ខ្លួន ចូលទៅចំណែកផ្លូវម្ខាងទៀត ជួនមានម៉ូតូមួយគ្រឿងទៀតដែលគេជិះត្រឹមត្រូវបញ្ច្រាសទិសគ្នា ហើយបុកពីមុខយ៉ាងពេញទំហឹងតែម្តង ។
ប៉ូលិសបាននិយាយថា ម៉ូតូដែលបើកបរយ៉ាងត្រឹមត្រូវ ហើយគេមកបុកនោះឈ្មោះ សឿ ចាន់តារារិទ្ធ អាយុ៣០ឆ្នាំ រស់នៅភូមិក្តី ឃុំព្រៃតាហ៊ូ ក្រុងស្ទឹងសែន ។ ប៉ូលិសនិយាយថា បន្ទាប់ពីបុកហើយ តារារិទ្ធហាក់ដូចជា គ្មានរងរបួសអ្វីធ្ងន់ធ្ងរទេ ក្រោកដើរនិយាយប្រាប់ប៉ូលិសពេលវាស់វែង ហើយថែមទាំងបញ្ជាក់ថា ខ្លួនមិនអីទៀតផង ។ ប៉ូលិសក៏នាំយកអ្នកបង្កឈ្មោះ ថឹក ហុង ទៅមន្ទីរពេទ្យ ហើយក្រោយមកថឹកហុងក៏ស្លាប់នៅមន្ទីរពេទ្យ ។ តែរយៈពេលនោះប្រហែលជាមួយម៉ោងនៅពេលប៉ូលិសហៅធ្វើកំណត់ហេតុ តារារិទ្ធប្រាប់ប៉ូលិសថា ខ្លួនហាក់ដូចជាមិនស្រួល ហើយក៏ទៅពេទ្យលុះទៅដល់មន្ទីរពេទ្យស្រាប់តែសន្លប់ពេទ្យដាក់ អុកស៊ីហ្សែន ហើយក៏សម្រេចបញ្ជូនទៅភ្នំពេញភ្លាមៗតែម្តង ។
យើងសង្កេតឃើញថា អ្នកទាំងពីរដែលបុកគ្នាសុទ្ធតែពាក់មួកសុវត្ថិភាពដូចគ្នា ប៉ុន្តែទំហំនៃការបុកវាខ្លាំងពេក ទោះបីមួកក៏ទប់ទល់មិនឈ្នះដែរ ព្រោះភាគីម្ខាងនោះជិះលឿនណាស់ ។
អធិការរងប៉ូលិសក្រុងស្ទឹងសែនទទួលបន្ទុកចរាចរណ៍និយាយថា ករណីនេះនៅមិនទាន់មានដំណោះស្រាយអ្វីទេ ព្រោះភាគីទាំងពីរម្នាក់ស្លាប់ និងម្នាក់ទៀតបញ្ជូនទៅភ្នំពេញ រង់ចាំពេលវេលាដែលភាគីទាំងសងខាងមានឱកាសសិន ៕
Subscribe to:
Post Comments (Atom)
No comments:
Post a Comment