ក្រឡាប់​រថយន្ត​ដឹក​អ្នកដំណើរ​ស្លាប់​ម្នាក់ របួស ៣ នាក់

រថយន្ត​ក្រឡាប់ និង​ទិដ្ឋភាព​ពេល​ប៉ូលិស​ចរាចរណ៍ បន្ទាយមានជ័យ​សង្គ្រោះជនរងគ្រោះ

ដោយ : សូ​ផុន​ (ថ្ងៃទី 30 កក្កដា 2009)
CNE News
បន្ទាយមានជ័យ​: រថយន្ត​ដឹក​អ្នកដំណើ​រធុន ១ បាំង​កន្លះ ១ គ្រឿង​ បាន​គ្រោះថ្នាក់​ក្រឡាប់ ខណៈ​បើកបរនៅ​ចំណុច​បង្គោល គ​-​ម លេខ ៤០១ ខាងលិច​ភូមិ​ឈ្នួល​មានជ័យ ឃុំ​ឈ្នួល​មានជ័យ ស្រុក​ព្រះនេត្រព្រះ កាលពី​ថ្ងៃ​ទី ៣០ កក្កដា ២០០៩ ។​
​ អ្នកបើកបរ​ឈ្មោះ ពឿយ សារ៉ាត់ អាយុ ២៧ ឆ្នាំ ទីលំនៅ​ភូមិ​-​ឃុំ​រោង​គោ ស្រុក​ក្រឡាញ់ ខេត្តសៀមរាប បាន​និយាយ​ក្រោយ​កើតហេតុ​នោះ​ថា មុន​កើតហេតុ​ គឺកូនប្រុស​ អាយុ​ជិត ៥ ឆ្នាំ របស់ខ្លួន បាន​អង្គុយ​អែប​ និង​ខ្លួន​កំពុង​បើកបរ រួច​វា​ដេកលក់​ហើយ​ទៅ​ខ្ទាស់​នឹង​ដៃ​ចង្កូតរថយន្ត ។ ពេលនោះ​ខ្លួន​មិន​ហ៊ាន​ទាញ​កូន​ខ្លាំង​ត្បិត​ខ្លាច​វា​ឈឺ​ តែ​ក៏​ជា​បង្ក​ថយន្ត​រេ​ចង្កូត​ចុះឡើង ហើយ​បុក​បង្គោល គ​-​ម លេខ ៤០១ រួច​ក្រឡាប់​រថយន្ត​តែ​ម្តង ។​
​ គឺ​មូលហេតុ​នោះហើយ ​ដែល​នាំ​ឲ្យ​អ្នកដំណើរ​ដែល​រងរបួស និង​ដែល​មិន​រងរបួស​ខឹងសម្បារ​ខ្លាំងណាស់ ប៊ិះ​មាន​ការវាយដំ​អ្នកបើកបរ និង​ជា​ម្ចាស់​រថយន្ត ។ នោះ​ជា​ការ​ធ្វេសប្រហែស (​ប្រមាថ​) ដល់​សុ​វត្ថិភាព​អ្នកដំណើរ ។​
​ នៅ​នឹង​កន្លែងកើតហេតុ គេ​ឃើញ​មាន​ជនរងគ្រោះ​របួសធ្ងន់ ១-​ឈ្មោះ ឆាយ ឡ​ប ភេទ​ស្រី អាយុ ២៤ ឆ្នាំ រស់នៅ​ភូមិ​ចក ឃុំ​រហាល ស្រុក​ព្រះនេត្រព្រះ ខេត្ត​បន្ទាយមានជ័យ ។ ជននេះ បាន​ស្លាប់​នៅពេល​បន្ទាប់មក ព្រោះ​របួស​ធ្ងន់ធ្ងរ​ពេក បើទោះបីជា​រថយន្ត​ពេទ្យ​សង្គ្រោះ បាន​ដឹក​មក​ពេទ្យ​ក្តី ។ ២-​ឈ្មោះ រ៉ុង ខាត់​ណា ភេទ​ស្រី អាយុ ២០ ឆ្នាំ រស់នៅ​ភូមិ​-​ឃុំ​រោង​គោ ស្រុក​ក្រឡាញ់ ខេត្តសៀមរាប និង​៣-​ឈ្មោះ ប៉ិន រិទ្ធ ភេទ​ប្រុស អាយុ ២៦ ឆ្នាំ រស់នៅ​ភូមិ​រំដួល ឃុំ​ភ្នំ​លៀប ស្រុក​ព្រះនេត្រព្រះ ខេត្ត​បន្ទាយមានជ័យ ។
​ សូមបញ្ជាក់​ថា រថយន្ត​បង្ក​គ្រោះថ្នាក់​ខ្លួនឯង​នោះ ធុន​នី​សាន់ ១ បាំង​កន្លះ ពាក់​ស្លាក​លេខ ប​.១៤៨៤ ភព​២ មាន​ម្ចាស់​ និង​ជា​អ្នកបើកបរ​ឈ្មោះ ពឿយ សារ៉ាត់ ភេទ​ប្រុស អាយុ ២៧ ឆ្នាំ ។ រថយន្ត​ដឹក​អ្នកដំណើរ​នេះ ដឹក​មនុស្ស ១៧ នាក់ ៕