វិទ្យុអាស៊ីសេរី
ដោយ គង់ យុទ្ធនា
របាយការណ៍ពីក្រុមប៉ូលិសខេត្តរតនគិរីឲ្យដឹងថា មនុស្ស ៧នាក់ស្លាប់ និងប្រមាណជិត ៥០នាក់ផ្សេងទៀតរងរបួស ដោយសារគ្រោះថ្នាក់ដោយឡែកៗផ្សេងគ្នា នៅក្នុងអំឡុងពេលបុណ្យចូលឆ្នាំខ្មែរ រយៈពេលបីថ្ងៃកន្លងមកនេះ។
ប្រធានមន្ទីរពេទ្យបង្អែកខេត្តរតនគិរី លោក ហ៊ីង ថានសុគន្ធា បានរៀបរាប់បែបនេះថា ៖ «គ្នាអ្នកនៅហ្នឹងកំពុងតែវេទនាហ្នឹង ហើយ។ ទាំងខ្ញុំគ្មានទៅណារួចផង នៅហ្នឹងរហូត។ គ្រោះថ្នាក់ចរាចរណ៍ថ្ងៃ១៥ហ្នឹង គ្រាន់តែចូលម្ដងមួយឆាវៗ ពិបាក។ ដូចយប់មិញអី លេងប្រមាណដល់ម៉ោង ១២ ម៉ោង ១អីបានហើយ ដេរ។ រវល់អ៊ីចឹងហើយ មានអ្នកវះ ឆ្លងទន្លេអត់រួចទៀត!»។
នៅល្ងាចថ្ងៃទី១៦ មេសា បុរសជនជាតិភាគតិចទំពួន អាយុ ៣៥ឆ្នាំ មួយរូប រស់នៅស្រុកអូរជុំ បានលោតចូលទៅក្នុងទឹកបឹងយក្ខឡោម ហើយសមត្ថកិច្ចបានសន្និដ្ឋានថា ស្លាប់។ មកទល់នឹងព្រឹកថ្ងៃទី១៧ មេសានេះ គេនៅមិនទាន់ឃើញសាកសពបុរសនោះអណ្ដែតចេញពីទឹកមកវិញនៅឡើយទេ។
សរុបករណីស្លាប់ដោយលង់ទឹកពីថ្ងៃទី១៤ ដល់ថ្ងៃទី១៦ មេសា នៅខេត្តរតនគិរី គឺមានមនុស្សស្លាប់ចំនួន ៣នាក់។ ស្លាប់ដោយលង់ទឹកក្នុងបាក់ខ្សាច់នៅរមណីយដ្ឋានតាតៃ ស្រុកលំផាត់ និងស្លាប់នៅរមណីយដ្ឋានបឹងយក្ខឡោម។ ឯ ៤នាក់ទៀតបានស្លាប់នៅក្នុងគ្រោះថ្នាក់ចរាចរណ៍ ក្នុងនោះមានមនុស្ស ២០នាក់របួសធ្ងន់ និង ២២នាក់ទៀតរបួសស្រាល។
ប៉ូលិសចរាចរណ៍បានរាយការណ៍ថា នៅព្រឹកថ្ងៃទី១៤ មេសា នៅស្រុកអូរជុំមានករណីឡានបុកម៉ូតូមួយគ្រឿងបណ្ដាលឲ្យស្លាប់ មនុស្សម្នាក់។ បន្ទាប់មកនៅថ្ងៃទី១៥ មេសា ជាថ្ងៃទី២ នៃឱកាសបុណ្យចូលឆ្នាំមានគ្រោះថ្នាក់ជាច្រើនកន្លែងផ្សេងទៀត ក្នុងនោះមានការក្រឡាប់គោយន្ត ២ករណី នៅស្រុកបរកែវ និងស្រុកលំផាត់ ដែលបានសម្លាប់មនុស្ស ៣នាក់ភា្លមៗ និងរបួសសរុប ២០នាក់។
មេបញ្ជាការរងកងរាជអាវុធហត្ថខេត្តរតនគិរី លោក ចាន់ សារិន បានបញ្ជាក់ថា គោយន្តច្នៃមួយគ្រឿងបានផ្ទុកមនុស្សជាង ៣០នាក់ ជាកម្មករចម្ការកៅស៊ូ មានបំណងមកលេងក្រុងបានលុង នៅល្ងាចថ្ងៃទី១៥ ខែមេសា បានក្រឡាប់ដោយសារបែកកង់នៅចំណុចភូមិផ្អរ ឃុំកិចុង ស្រុកបរកែវ បណ្ដាលឲ្យមនុស្សម្នាក់ស្លាប់នៅនឹងកន្លែង ហើយ ២នាក់ទៀតបានស្លាប់នៅពេលបញ្ជូនដល់មន្ទីរពេទ្យ។
លោក ចាន់ សារិន បានបញ្ជាក់ថា ៖ «មានការរបួស ៣០នាក់ដែលរបួសធ្ងន់។ ការស្លាប់នៅទីកន្លែងនោះ ម្នាក់ ហើយមកដល់មន្ទីរពេទ្យស្លាប់ម្នាក់ទៀត។ វាបណ្ដាលមកពីបើកបរគោយន្តហ្នឹងខ្វះការត្រួតពិនិត្យ ធូរកង់មុខហើយ ខំបើកលឿនទៅ ផ្ទុះក្រឡាប់!»។
អភិបាលស្រុកលំផាត់ លោក គង់ ស្រ៊ុន បានឲ្យដឹងដែរថា មានករណីក្រឡាប់គោយន្តប្រភេទកន្ត្រៃ ផ្ទុកមនុស្ស ១០នាក់ នៅចំណុចផ្លូវកោងចូលទៅកាន់រមណីយដ្ឋានទឹកជ្រោះ ៧ជាន់ បណ្ដាលឲ្យមនុស្សរបួសធ្ងន់ ២នាក់ និងរបួសស្រាល ៨នាក់កាលពីថ្ងៃទី១៥ មេសា។ ជាមួយគ្នាដែរមានបុរស ២នាក់បានជិះម៉ូតូបុកគ្នា លើផ្លូវទៅកាន់រមណីយដ្ឋានទឹកជ្រោះ ៧ជាន់ បណ្ដាលឲ្យរបួសធ្ងន់ម្នាក់ផងដែរ។
លោក គង់ ស៊្រុន បានមានប្រសាសន៍ថា ៖ «មកពីកាលេថងហ្នឹងវាចង្កូត វែង។ ផ្លូវកន្លែងហ្នឹងវារាងកាច់មែន សូម្បីតែខ្ញុំបើកឡានទៅកន្លែងហ្នឹងក៏ពិបាកកាច់ចង្កូតដែរហ្នឹង»។
មន្ត្រីសម្របសម្រួលអង្គការសិទ្ធិមនុស្ស អាដហុក ខេត្តរតនគិរី លោក ប៉ែន ប៊ុណ្ណារ៍ បានទទូចឲ្យមន្ទីរសាធារណការ និងដឹកជញ្ជូន ពិនិត្យ និងរៀបចំឲ្យមានសណ្ដាប់ធ្នាប់ចំពោះការប្រើប្រាស់គោយន្តច្នៃជា ច្រើន ដែលគេដឹងថា មិនមានសុវត្ថិភាពគ្រប់គ្រាន់បានធ្វើចរាចរណ៍ និងដឹកជញ្ជូនដែលបង្កនូវគ្រោះថ្នាក់ជាញឹកញាប់ និងស្នើឲ្យគិតគូរអំពីការពង្រឹងឲ្យមានប័ណ្ណបើកបរផង។
លោក ប៉ែន ប៊ុណ្ណារ៍ បានអះអាងថា ៖ «ដល់ពេលវេលាហើយ សូមឲ្យមានការផ្សព្វផ្សាយទៅដល់មូលដ្ឋានទាំងអស់ ដែលប្រើប្រាស់រថយន្តកែច្នៃហ្នឹង ត្រូវមានប័ណ្ណបើកបរ ហើយជាពិសេស ត្រូវតម្រូវឲ្យមានការថ្លឹងថ្លែងតាកេឲ្យបានគ្រប់គ្រាន់»។
នៅខេត្តរតនគិរីមានគោយន្តច្នៃប្រមាណជាង ១០០គ្រឿង មិនត្រឹមតែប្រើប្រាស់នៅក្នុងព្រៃ ឬចម្ការនោះទេ តែគេបានយកមកប្រើក្នុងការដឹកជញ្ជូនផ្សេងៗ។ គេបានយកមកដឹកមនុស្សច្រើនហួសហេតុ ពិសេសនៅពេលមានពិធីបុណ្យកម្សាន្តសប្បាយម្ដងៗ ហើយជាញយៗបានក្រឡាប់បណ្ដាលឲ្យស្លាប់ និងរបួសជាច្រើន៕
អានបន្ថែម
