កោះឯករាជ្យ
ខេត្ដបាត់ដំបង ៖ ការបើកបរពេលស្រវឹងត្រូវបានហាមដាច់ខាតដោយច្បាប់ ស្ដីពីចរាចរណ៍ ហើយច្បាប់នេះទៀត ក៏ត្រូវបានអនុវត្ដដោយមន្ដ្រីនគរបាលចរាចរដែរ ។ ផ្ទុយទៅវិញ មន្ដ្រីនគរបាលចរាចរក្រុងបាត់ដំបងមួយរូប ទំនងភ្លេចខ្លួន គាត់បានផឹកស៊ីស្រវឹងជោកជាំ រួចជិះម៉ូតូដួលពីរបីត្រឡប់ម្នាក់ឯងរហូតដល់សន្លប់បាត់មាត់ឈឹង ឈាមជោកពេញខ្លួន ថែមទាំងមិនពាក់មួកសុវត្ថិភាពទៀត ។ សាក្សីដែលបានជួយសង្គ្រោះ និយាយថា មន្ដ្រីនគរបាលចរាចររូបនេះជិះ ម៉ូតូដួលខ្លួនឯងលើផ្លូវក្រួសក្រហមក្នុងភូមិអូរតាគាំ២ សង្កាត់ទួលតាឯក ក្រុងបាត់ដំបង កាលពីវេលាម៉ោង៦ល្ងាចថ្ងៃទី២ មិថុនា ដោយគ្មានអ្នកណាពញាក់គាត់ទេ។
មន្ដ្រីចរាចរដែលផឹកស្រវឹងរហូតភ្លេច បំរាមនេះត្រូវគេប្រាប់ថា ឈ្មោះកុសល ជា មន្ដ្រីនគរបាលក្រុងបាត់ដំបង ។ បុរសចំណាស់ម្នាក់ដែលឃើញសកម្មភាពមន្ដ្រី នគរបាលនេះដួលផ្ទាល់ភ្នែកនិយាយថា គាត់បានឃើញមន្ដ្រីនគរបាលនោះជិះម៉ូតូយ៉ាងលឿន ប៉ុន្ដែភ្លាមនោះស្រាប់តែដួលប្រាវ ។ លុះពេលគាត់ស្ទុះទៅមើលស្រាប់តែឃើញ នគរបាលចរាចរម្នាក់នោះដួលសន្លប់ស្ដូក មានឈាមជោកដោយបែកមុខបែកមាត់ ហើយធុំក្លិនស្រាទៀតផង ។ គាត់និយាយថា មន្ដ្រីនគរបាលនេះស្រវឹង និងជិះម៉ូតូលឿន ហើយអត់ពាក់មួកសុវត្ថិភាពទៀត ។ បើពិនិត្យស្នាមដួល គឺម៉ូតូគាត់អូសប្រហែល១០ ម៉ែត្រជិះដួលម្នាក់ឯងគ្មានអ្នកណាប៉ះគាត់ទេ ។
ទោះបីជាបែបណា ក្រោយពីកើតហេតុបន្ដិច ត្រូវបានគេទាក់ទងទៅការិយាល័យ នគរបាលចរាចរខេត្ដ ដើម្បីយករថយន្ដមក ជួយដឹកយកទៅសង្គ្រោះភ្លាមៗ ។ មន្ដ្រីនគរបាលចរាចរខេត្ដនិយាយថា គេបានបញ្ជូននគរបាលភ្លេចច្បាប់រូបនេះទៅសង្គ្រោះ បន្ទាន់នៅមន្ទីរពេទ្យបង្អែកខេត្ដបាត់ដំបង ។ សមត្ថកិច្ចបានប្រាប់ថា បើពិនិត្យលើមុខ របួសមិនសូវធ្ងន់ធ្ងរប៉ុន្មានទេ ប៉ុន្ដែបុរសនេះ សន្លប់ធំ ដោយសារជាតិអាកុលក្នុងខ្លួនច្រើន លើសលប់ពេក ។ ការប្រព្រឹត្ដិរបស់មន្ដ្រី នគរបាលចរាចររូបនេះបានធ្វើឱ្យមានការរិះគន់យ៉ាងខ្លាំងពី ប្រជាពលរដ្ឋ ដែលគាត់ជា មន្ដ្រីនគរបាលចរាចរតែងដាស់តឿនគេកុំឱ្យបើកបរពេលស្រវឹង ហើយត្រូវពាក់មួកសុវត្ថិភាពតែខ្លួនគាត់បែរជាមិនគោរពទៅវិញ ។
No comments:
Post a Comment