Tuesday, June 8, 2010

បើក​ឡាន​ដឹក​ស្រាបៀរ​​របូត​ទ្វារ​​ធ្លាក់​ ស្រាបៀរ​ប៉ះ​មនុស្ស​២​នាក់​របួស​ស្រាល

កម្ពុជាថ្មី
កំពង់ឆ្នាំង ៖ នៅ​ម៉ោង ៦​និង​៥០​នាទី ព្រឹក​ថ្ងៃ​ទី​៤ ខែ​មិថុនា ឆ្នាំ​២០១០ នៅ​ចំណុច​លើ​ផ្លូវ​ជាតិ លេខ​៥ ផ្លូវ​កោង​មុខ​សាលា​បំពេញ​វិជ្ជា​ខេត្ត ក្នុង​ភូមិ​កណ្ដាល សង្កាត់​កំពង់​ឆ្នាំង ក្រុង​កំពង់ឆ្នាំង មាន ករណី​គ្រោះ​ថ្នាក់​មួយ​បាន​កើត​ឡើង បណ្ដាល​ឲ្យ​មនុស្ស​២​នាក់​រង​របួស​ស្រាល។

សមត្ថកិច្ច ​នគរបាល ក្រុង​កំពង់​ឆ្នាំង បាន​ឲ្យ​ដឹង​ថា​​ម៉ោង​ខាង​លើ រថយន្ត​ម៉ាក​កូរ៉េ ១​គ្រឿង ដឹក​ស្រាបៀរ​ឲ្យ​ក្រុមហ៊ុន ANCHOR ពាក់​ស្លាក​លេខ ច៩០៧៨ ភព២ បាន​បើក​ពី​ត្បូង​មក​ជើង​មក​ដល់​ចំណុច​ខាង​លើ ជា​ផ្លូវ កោង ក៏​របើក​ទ្វារ​ចំហៀង​ខាង​ស្ដាំ​របស់​រថយន្ត ធ្លាក់​ស្រាបៀរ​ជាង​៥០​កេះ មក​លើ​ផ្លូវ​ជាតិ បណ្ដាល ឲ្យ​ប៉ះ​អ្នក​ជិះ​កង់​ម្នាក់ និង​អ្នក​ជិះ​ម៉ូតូ​ម្នាក់​រង​របួស​ស្រាល។

អ្នក​ បើក​បរ​រថយន្ត​នោះ​ឈ្មោះ​​ម៉ក់ សំអុល អាយុ​២២​ឆ្នាំ ភេទ​ប្រុស រស់​នៅ​ភូមិ​ស្មែត ឃុំ​ស្វាយ​ជ្រុំ ស្រុក​រលាប្អៀរ ធ្វើ​ការ​ក្នុង​ក្រុមហ៊ុន​ស្រាបៀរ ANCHOR ។ ជន​រងគ្រោះ​ទី​១​ឈ្មោះ នូ សុបូរ៉ានី អាយុ​១១​ឆ្នាំ ភេទ​ស្រី​​ជិះ​កង់​ជា​សិស្ស​សាលា ត្រូវ​បាន​គេ​សំរុះ​សំរួល​សង​លុយ​ចំនួន​១០​ម៉ឺន​រៀល។ ឯ ជន​រង​គ្រោះ​ទី​២​ឈ្មោះ តូច យ៉េន អាយុ​៤២​ឆ្នាំ ភេទ​ប្រុស ជិះ​ម៉ូតូ មិន​ទាន់​ចូល​ខ្លួន​មក​ដោះស្រាយ​ទេ កំពុង​ព្យាបាល​របួស។ ករណី​គ្រោះ​ថ្នាក់​នោះ សមត្ថកិច្ច​និយាយ​ថា មក​ពី​អ្នក​បើក​បរ​រថយន្ត​ប្រហែស ភ្លេច​ចាក់​សោរ​ទ្វារ​ចំហៀង​​រថយន្ត ទើប​ពេល​បើក​ដល់​ផ្លូវ​កោង​បត់​ទ្វារ​ចំហៀង​របស់​រថយន្ត​រអិល​របើក​ឡើង ហើយ​កេះ​ស្រាបៀរ​ក៏​រអិល​ធ្លាក់​មក​ប៉ះ​ចំ​អ្នក​កំពុង​ធ្វើ​ដំណើរ​តាម​ដង​ ផ្លូវ​តែ​ម្ដង។

រថយន្ត ​ត្រូវ​សមត្ថកិច្ច​ឃាត់​ទុក​ក្នុង​អធិការដ្ឋាន​នគរបាល​ក្រុង​កំពង់ឆ្នាំង ដើម្បី​រង់​ចាំ​ដោះ​ស្រាយ​ជាមួយ​ជន​រង​គ្រោះ៕

អានបន្ថែម

No comments: