កុំ បើកបរនៅពេលស្រវឹង គឺជាសារអប់រំ ដែលក្រសួងសាធារណការ និងដឹកជញ្ជូន រួមទាំងអង្គការផ្នែកសុវត្ថិភាពចរាចរណ៍ បានលើកឡើងក្នុងពេលបុណ្យភ្ជុំបិណ្ឌ។ ជាមួយនឹងសារអប់រំនេះ ក៏មានសេចក្តីអំពាវនាវដល់សាធារណជន ឲ្យបង្កើនការប្រុងប្រយ័ត្ននៅពេលធ្វើដំណើរ។
សារអប់រំសុវត្ថិភាពចរាចរណ៍ត្រូវបានលើកឡើងនៅពេលបុណ្យភ្ជុំបិណ្ឌ(រូបថត ៖ សុវណ្ណារ៉ា)
សេចក្តី អំពាវនាវដែលចុះហត្ថលេខាដោយរដ្ឋមន្ត្រីក្រសួងសាធារណការ និងដឹកជញ្ជូន បានជូនដំណឹងដល់សាធារណជនថា ចាប់ពីថ្ងៃទី១៨ ដល់ ថ្ងៃទី២០ កញ្ញា ឆ្នាំ២០០៩នេះ ជារដូវបុណ្យភ្ជុំបិណ្ឌ និងជារយៈពេល ដែលមានការធ្វើដំណើរច្រើន ខុសថ្ងៃធម្មតា។ ដូច្នេះអ្នកប្រើប្រាស់ផ្លូវថ្នល់ទាំងអស់ ត្រូវបើកបរដោយស្មារតីប្រុងប្រយ័ត្នជានិច្ច និងត្រូវគោរពច្បាប់ចរាចរណ៍ឱ្យបានម៉ឺងម៉ាត់បំផុត។
សេចក្តី ប្រកាសបានបញ្ជាក់ថា អ្នកបើកបរត្រូវអនុវត្តតាមពាក្យស្លោក “បើកបរកុំផឹកគ្រឿងស្រវឹង និងត្រូវគោរពច្បាប់ចរាចរណ៍”។ ក្នុងពេលបើកបរ ក៏ត្រូវប្រកាន់ខ្ជាប់នូវសុជីវធម៌ និងអធ្យាស្រ័យគ្នាទៅវិញទៅមក។ អ្នកបើកទោចក្រយានយន្ត ម៉ូតូ រ៉ឺម៉ក ត្រូវពាក់មួកការពារ រីឯអ្នកបើកបររថយន្តត្រូវពាក់ខ្សែក្រវ៉ាត់សុវត្ថិភាព។
សេចក្តី ណែនាំក៏បានហាមរថយន្តឈ្នួល ផ្ទុកអ្នកដំណើរលើសចំណុះ និងហាមផ្ទុកអ្នកដំណើរលើដំបូលដែលជាហេតុបណ្តាលអោយមានគ្រោះថ្នាក់ ចរាចរណ៍ជាយថាហេតុ។
ក្នុងរដូវបុណ្យភ្ជុំបិណ្ឌ ប្រជាពលរដ្ឋបានធ្វើដំណើរច្រើនខុសថ្ងៃធម្មតា ពិសេសការធ្វើដំណើរចេញពីភ្នំពេញ ទៅកាន់ស្រុកកំណើត។ រៀងរាល់ឆ្នាំ តែងមានគ្រោះថ្នាក់កើតឡើង ជាពិសេស អ្នកបើកបរខ្វះការប្រុងប្រយ័ត្ន និងបើកបរពេលស្រវឹង ដោយសារបុណ្យភ្ជុំ ប្រជាជនខ្មែរ មានទម្លាប់ជួបជុំមិត្តភក្តិ បងប្អូន និងសេពគ្រឿងស្រវឹង។
ការផ្ទុកអ្នកដំណើរលើសចំណុះក៏ជាមូលហេតុមួយនៃគ្រោះថ្នាក់ចរាចរណ៍ដែរ
(រូបថត ៖ សុវណ្ណារ៉ា)
របាយការណ៍ បង្ហាញថា ក្នុងរយៈពេល៥ថ្ងៃ អំឡុងពេលបុណ្យភ្ជុំបិណ្ឌ កាលពីឆ្នាំមុន មានមនុស្សស្លាប់ដោយគ្រោះថ្នាក់ចរាចរណ៍ ចំនួន ២៨ នាក់ និងរបួសធ្ងន់ចំនួន ១១៧នាក់។ គ្រោះថ្នាក់ចរាចរណ៍ភាគច្រើន បង្កពីការបើកបរមិនគោរពច្បាប់ចរាចរណ៍ ពិសេសអ្នកបើកបរលឿនហួសកំណត់ និងស្រវឹង។
លោក មាស ច័ន្ទឌី អ្នកសម្របសម្រួលគម្រោងសុវត្ថិភាពចរាចរណ៍ របស់អង្គការជនពិការអន្តរជាតិប៊ែលហ្សិក បានកត់សម្គាល់ថា ក្នុងរដូវភ្ជុំបិណ្ឌ មនុស្សម្នាធ្វើដំណើរច្រើន និងមានការជួបជុំសេពគ្រឿងស្រវឹង។ ចំណែករថយន្តឈ្នួល ក៏ផ្ទុកលើសចំណុះ ដែលបង្កជាគ្រោះថ្នាក់៕
No comments:
Post a Comment