Ken news
ភ្នំពេញ: ម៉ូតូមួយគ្រឿងបើកបរដោយបុរសម្នាក់ បានបើកបត់ឆ្វេងមិនប្រយ័ត្ន ទៅបុកម៉ូតូមួយគ្រឿងទៀតធ្វើដំណើរច្រាសទិសគ្នា បណ្តាលឲ្យបុរសម្នាក់ជាគ្រូបង្រៀនស្លាប់ភ្លាមៗ រីឯអ្នកបង្ករបួសធ្ងន់ធ្ងរកំពុងសង្គ្រោះនៅក្នុងមន្ទីរពេទ្យ ។
គ្រោះថ្នាក់ខាងលើនេះ បានកើតឡើងកាលពីវេលាម៉ោង ៩ និង ២០ នាទី យប់ថ្ងៃទី ២៧ មករា នេះនៅចំណុចមុខផ្ទះលេខ ៥៥៦ ផ្លូវ៣៧១ ក្រុម១ ភូមិក្បាលទំនប់ សង្កាត់បឹងទំពុន ខណ្ឌមានជ័យ ។
ប៉ូលិសមូលដ្ឋានបានឲ្យដឹងថា ជនរងគ្រោះ ដែលដួលបោកក្បាលស្លាប់ឈ្មោះ ចាន់ សង្វារ អាយុ ៣៩ឆ្នាំ មុខរបរគ្រូបង្រៀននៅវិទ្យាល័យទួលស្វាយព្រៃ ស្នាក់នៅផ្ទះលេខ ១៤២C ផ្លូវ១០៥ សង្កាត់បឹងត្របែក ខណ្ឌចំការមន ។ ជនរងគ្រោះរូបនេះ បើកម៉ូតូម៉ាក HONDA CUB ជ្រុង C70 ពណ៌ទឹកសមុទ្រ ស្លាកលេខ ផ ០៧៤២ ភព១ ។
ចំណែកភាគីម្ខាងទៀតឈ្មោះ រ៉ូ អាយុ ៣០ឆ្នាំ ស្នាក់នៅផ្ទះលេខ ១១៦ ក្រុម១ ភូមិក្បាលទំនប់ ផ្លូវ៣៧១ ក្បែរកន្លែងកើតហេតុ ។ គាត់បើកម៉ូតូម៉ាក HONDA CUB ជ្រុង ពណ៌ទឹកប៊ិច C90 ស្លាកលេខ ភ្នំពេញ 1C 7246 រងរបួសធ្ងន់កំពុងព្យាបាលនៅមន្ទីរពេទ្យកាល់ម៉ែត ។
សាក្សីឃើញហេតុការណ៍ បានបំភ្លឺប្រាប់ប៉ូលិសថា មុនកើតហេតុម៉ូតូ CUB ពណ៌ទឹកសមុទ្រ បើកតាមផ្លូវ ៣៧១ ពីលិចទៅកើត ប៉ុន្តែម្ចាស់ម៉ូតូពុំបានពាក់មួកសុវត្ថិភាពទេ ដោយគាត់ដាក់មួកក្នុងកន្ត្រកម៉ូតូ ។ លុះដល់ចំណុចខាងលើ ស្រាប់តែម៉ូតូ CUB ពណ៌ទឹកប៊ិច ធ្វើដំណើរច្រាសទិសមកដល់ចំណុចខាងលើក៏បត់ឆ្វេង បុកចំពីមុខពេញទំហឹងបណ្តាលឲ្យជនរងគ្រោះទាំង ២នាក់ ដួលបោកក្បាលលើថ្នល់ទាំងអស់គ្នាតែម្តង ។ ដោយឡែកអ្នកបើកម៉ូតូ CUB ពណ៌ទឹកសមុទ្រ បោកក្បាលពីក្រោយ បែកឈាមស្លាប់ភ្លាមៗ ដោយជើងគាត់គងលើម៉ូតូ ។
ក្នុងករណីនេះប៉ូលិសបានរកឃើញកាតជនរងគ្រោះ ហើយទំនាក់ទំនងដល់ក្រុមគ្រួសារយកសពទៅធ្វើបុណ្យតាមប្រពៃណីទាំងយប់ ។ រីឯម៉ូតូទាំង២ រក្សារទុកនៅអធិការដ្ឋានប៉ូលិសខណ្ឌមានជ័យ ដោះស្រាយនៅពេលក្រោយ ៕
No comments:
Post a Comment