កោះជ័យ,
ខេត្ដរតនគិរី ៖ ហេតុការណ៍ជិះម៉ូតូធ្លាក់ស្ពានកាលពីថ្ងៃទី៧ កុម្ភៈ ដែលបណ្ដាលឱ្យបុរសម្នាក់រងរបួសបាក់ដៃ និងបែកក្បាល ដេកសន្លប់ស្ដូកស្ដឹង និងម្នាក់ទៀតដែលជិះម៉ូតូជាមួយមិនមានរងរបួសទេ ពេលកើតហេតុនោះ និងបានជួយនាំអ្នករបួសទៅកាន់មន្ទីរពេទ្យថែមទៀត ប៉ុន្ដែរំលងបាន១ថ្ងៃក្រោយ ស្រាប់តែអ្នកមិនឃើញមានរងរបួសអ្វីធំដុំនោះបែរជាក្អួតធ្លាក់ឈាម ស្លាប់ក្នុងពេលគ្រូពេទ្យលើកដាក់លើតុបំរុងធ្វើការវះកាត់នៅ មន្ទីរពេទ្យបង្អែកខេត្ដ ។
ទាក់ទិននឹងគ្រោះថ្នាក់គួរឱ្យកត់សំគាល់នេះត្រូវបានប្រភពព័ត៌មាន រាយការណ៍ឱ្យដឹងថា កាលពីវេលាម៉ោង៦ និង៣០នាទីល្ងាច ថ្ងៃទី៧ កុម្ភៈ ម៉ូតូមួយគ្រឿងម៉ាកវ៉េវ ពណ៌ស្លែ ពាក់ស្លាកលេខភ.៥៤២៧ ភព២ បើកបរដោយឈ្មោះឃុន តំបន់ ភេទប្រុស អាយុ២៥ឆ្នាំ ជាជនជាតិគ្រឹង រស់នៅភូមិតាអង២ ឃុំតាអង ស្រុកកូនមុំ បានឌុបឈ្មោះឃុត ដេត អាយុ៣៧ឆ្នាំ ជាជនជាតិខ្មែរ រស់នៅក្នុង ភូមិតាអងដូចគ្នា ។
ការជិះម៉ូតូឌុបគ្នានោះ ចេញពីក្រុងបានលុងទៅផ្ទះ តែការបើកបរ បានជួបបញ្ហា ខណៈពេលម៉ូតូបោះពួយខុសស្ពានធ្លាក់ចូលស្នាមភ្លោះនៅចំណុច ទល់មុខពន្ធនាគារភ្នំស្វាយ ព្រំប្រទល់សង្កាត់ឡាបានសៀក និងសង្កាត់កាចាញ បណ្ដាលឱ្យអ្នក បើកបរជនជាតិគ្រឹងរងរបួសធ្ងន់បាក់ដៃម្ខាង និងបែកក្បាលសន្លប់ពុំដឹងខ្លួន ឯម្នាក់ទៀត ជាអ្នកជិះពីក្រោយមិនមានរងរបួសទេ ។
ក្នុងពេលកើតហេតុអ្នកមិនរងរបួសបានដើរចុះ ទៅលើកម៉ូតូ និងជួយលើកអ្នករបួសដាក់រថយន្ដសង្គ្រោះរបស់មន្ទីរពេទ្យខេត្ដទៀតផង ។
អ្នកឃើញហេតុការណ៍រូបនោះបានបន្ដទៀតថា ក្នុងពេលគ្រោះថ្នាក់ភ្លាមៗឃើញ កំលាំងប៉ូលិសប៉ុស្ដិ៍រដ្ឋបាលសង្កាត់កាចាញ ទូរស័ព្ទហៅរថយន្ដសង្គ្រោះមន្ទីរពេទ្យបង្អែកខេត្ដទៅដឹកអ្នករងរបួស ទៅសង្គ្រោះ។ ក្រុមគ្រួសារអ្នករងគ្រោះឱ្យដឹងថា នៅថ្ងៃទី៨ ខែ កុម្ភៈ ម៉ោង៦ល្ងាច បែរជាស្លាប់អ្នកដែលមើលពុំឃើញថា មានរបួសទៅវិញ ។ មានការកត់សំគាល់ថា ក្នុងពេលកើតហេតុនោះ អ្នកដែលស្លាប់បាននិយាយប្រាប់គេឯងថា វិលមុខ លុះដល់មន្ទីរពេទ្យ បន្ទាប់ពីពិនិត្យរួចមកគ្រូពេទ្យប្រាប់ថា មានឈាមកកក្នុងខ្លួន ហើយក៏ចាប់ផ្ដើមចុកអួលៗ និងនោមលែងចេញ ។ រោគសញានេះលោកគ្រូពេទ្យដឹងច្បាស់ថាធ្ងន់ធ្ងរ ក៏រៀបចំការវះកាត់ ស្រាប់តែបុរសរូបនោះក្អួតឈាម ហើយស្លាប់តែម្ដង ។
សពត្រូវបញ្ជូនទៅធ្វើបុណ្យនៅភូមិកាចាញ ឯអ្នករបួសបាក់ដៃ បែកក្បាល សន្លប់ពេលកើតហេតុកំពុងសំរាកព្យាបាលនៅមន្ទីរពេទ្យ ។ ការជិះម៉ូតូខុសស្ពាននេះមតិខ្លះបាន រិះគន់ចំពោះក្រុមហ៊ុនស្ថាបនាផ្លូវជាតិលេខ ៧៨អា ដែលឈូសឆាយចាក់ដីពង្រីកកន្លងមកពុំដែលបានដាក់ស្លាកសញាអ្វីទេ ហើយតែងតែកើតមានគ្រោះថ្នាក់ជារឿយៗ។ ជាក់ស្ដែងកំណាត់ផ្លូវចាប់ពីស្រុកបកែវដល់ព្រំដែនវៀតណាមត្រូវ ខូចខាតស្ទើរទាំងស្រុងមិនទាន់ទាំងបានសម្ពោធដាក់ឱ្យប្រើប្រាស់ផង និងទើបតែជួសជុលឡើងវិញក្នុងពេលថ្មីៗនេះប៉ុណ្ណោះ ។ ផ្លូវដែលខូចគឺជាបន្ទុកលើអ្នក ដែលទទួលគ្រប់គ្រងពិនិត្យគុណភាពផ្លូវនេះដែរ ៕
Subscribe to:
Post Comments (Atom)
No comments:
Post a Comment