នៅ​តាកែវ​ថ្ងៃ​សែនៈ​របួស​១៧​នាក់​, ស្លាប់​២​នាក់​

CEN
តាកែវ: ខេត្ត​តាកែវ​នៅ​ថ្ងៃ​សែន​ចូល​ឆ្នាំ​ចិន ថ្ងៃទី ១៣ កុម្ភៈ ២០១០ មាន​គ្រោះថ្នាក់​ចរាចរណ៍​ចំនួន ១២​លើក​បាន​កើតឡើង បណ្តាលអោយ​មនុស្ស រង​របួសស្រាល​ចំនួន ៦​នាក់​, រងរបួស​ធ្ងន់ ១១​នាក់ និង ស្លាប់​ចំនួន ២​នាក់ ក្នុងនោះ​មាន​ម្នាក់​ជា​ភរិយា របស់​លោក​អនុប្រធាន​ទី ២ ព្រឹទ្ធសភា​ផង ។​
​តាម​របាយការណ៍​របស់លោក ប៉ុក ពុល​រិទ្ធ ប្រធានការិយាល័យ ចរាចរណ៍​ផ្លូវគោក បានអោយដឹងថា ក្នុង​គ្រោះថ្នាក់​ចរាចរណ៍​ទាំង ១២​លើក ក្នុង​ថ្ងៃ​សែន​ចូល​ឆ្នាំ​ចិន បាន​កើតឡើង​នៅ​ស្រុក​ផ្សេងៗ​គ្នា ក្នុងនោះ នៅ​ស្រុក​ព្រៃកប្បាស កើតឡើង​ចំនួន ៣​ករណី បណ្តាលអោយ​ស្លាប់​ម្នាក់ របួសធ្ងន់​ម្នាក់ រង​របួសស្រាល​ចំនួន ២​នាក់​,​ស្រុក​សំរោង កើតឡើង​៣​ករណី ដែល​បណ្តាលអោយ​មនុស្ស រង​របួសធ្ងន់​ចំនួន ២​នាក់ និង​របួសស្រាល​ចំនួន ២​នាក់​, ស្រុក​កោះអណ្តែត​កើតឡើង​ចំនួន ២​ករណី បណ្ត​ល​អោយមាន​មនុស្ស រង​របួសធ្ងន់​ចំនួន ២​នាក់ និង​រង​របួសស្រាល​ចំនួន ៣​នាក់​, ស្រុក​គិរីវង់​កើតឡើង​ចំនួន ១​ករណី បណ្តាលអោយ​មនុស្ស រងរបួស​ធ្ងន់ ១​នាក់​, ស្រុក​ទ្រាំង​កើតឡើង​ចំនួន ១​ករណី បណ្តាលអោយ​មនុស្ស រង​របួសធ្ងន់​ម្នាក់​, ស្រុក​ត្រាំកក់ កើតឡើង​ចំនួន ១​ករណី បណ្តាលអោយ​មនុស្ស រងរបួស​ចំនួន​២​នាក់ ។ ដោយឡែក​នៅក្នុង​ក្រុង​ដូន​កែវ​វិញ កើតឡើង​ចំនួន ២​ករណី មួយ​គ្រោះថ្នាក់​បង្កឡើង ដោយ​ខ្លួនឯង​រងរបួស​ធ្ងន់ ១​នាក់ និង​រង​របួសស្រាល​ចំនួន ១​នាក់ ។​
​រីឯ​គ្រោះថ្នាក់​ចរាចរណ៍​មួយទៀត បណ្តាល​អោយ​មាន​មនុស្ស រង​របួសធ្ងន់​ចំនួន ២​នាក់ និង​បាត់បង់​ជីវិត​ម្នាក់ ដែល​ជនរងគ្រោះ ជា​ភរិយា​របស់​លោក ទេព ង​ន អនុប្រធាន​ទី ២​ព្រឹទ្ធសភា ។ គ្រោះថ្នាក់​ចរាចរណ៍​នេះ បាន​កើតឡើង​នៅ​តាម បណ្តោយ​ផ្លូវជាតិ​លេខ ២ ចន្លោះ​បង្គោលគីឡូម៉ែត្រ​លេខ ៨១-៨២ ស្ថិតនៅក្នុង​ភូមិ​ត្រពាំង​សាលា សង្កាត់រ​កា​ក្រៅ ក្រុង​ដូន​កែវ រវាង​រថយន្ត និង​ម៉ូតូ ក្នុងទិសដៅ​ខ្វែងគ្នា វេលា​ម៉ោង ១៥ និង ៣៥ នាទី ។ រថយន្ត​ម៉ាក​តូ​យូ​តា​ឡង់​គ្រីស័រ ព៌ណ​ស្លែ​សេរី​ឆ្នាំ ១៩៩៣ ពាក់​ស្លាក់ លេខ ង ២៦៧២ ភព​២ បើកបរ​ដោយ​ឈ្មោះ ទុយ សុខន ភេទ​ប្រុស អាយុ ២៤​ឆ្នាំ រស់នៅ​ភូមិ​ក្រាំង​កណ្តាល ឃុំ​ប្រាំបី​មុំ ស្រុក​ទ្រាំង ខេត្តតាកែវ គ្មាន​របួស​ទេ ។ ចំណែក​អ្នករួមដំនើរ​ចំនួន ២​នាក់ រួមមាន​ឈ្មោះ ភូ ធាន ភេទ​ស្រី អាយុ ៦១​ឆ្នាំ នៅ​បូរី​ចំការមន រាជធានី​ភ្នំពេញ ជា​ភរិយា​របស់​លោក ទេព ង​ន អនុប្រធាន​ទី ២ ព្រឹទ្ធសភា បាត់បង់​ជីវិត នៅ​កន្លែងកើតហេតុ និង​ម្នាក់​ទៀត​ឈ្មោះ ភាព ភេទ​ស្រី ជា​អ្នកបំរើ​រងរបួស​ធ្ងន់ ។ រីឯ​ម៉ូតូ បើកបរ​ដោយ​ឈ្មោះ កាន់ តារា ភេទ​ប្រុស អាយុ ២៩​ឆ្នាំ រស់នៅ​ភូមិ​អណ្តូង សំរិត ឃុំ​ធ្លា​ប្រជុំ ស្រុក​កោះអណ្តែត រងរបួស​ធ្ងន់ ។ តាម​សាក្សី​ឃើញ​ហេតុការណ៍ បានអោយដឹងថា មុនពេល​កើតហេតុ គេ​ឃើញ​រថយន្ត​បើក​មក ពី​ទិស​ខាងត្បូង ឆ្ពោះទៅ​ទិស​ខាងជើង ដល់​កន្លែងកើតហេតុ ក៍​វាក់​នឹង​ម៉ូតូ ១​គ្រឿង ជិះ​ចេញពី​ផ្លូវលំ​ពី​ទិសខាងកើត ឆ្ពោះទៅ​ទិស​ខាងលិច ពេល​នោះ​រថយន្ត​ក៍​បុក​ម៉ូតូ យ៉ាង​ពេញទំហឹង បណ្តាលអោយ​រថយន្ត ជ្រុល​សង្កូត​ក្រឡាប់ ទៅ​ខាងកើត​ថ្នល់​ជាច្រើន​ត្រឡប់ ៕