ភ្នំពេញ: រថយន្តដឹកអ្នកដំណើរ របស់ក្រុមហ៊ុន GST ដែលមានមនុស្សប្រមាណ ៥០នាក់ ជិះលើនោះស្ទើរលោះព្រលឹងគ្រប់ៗគ្នា ខណៈពេលដែលអ្នកបើកបរបើកវ៉ាហើយបុកម៉ូតូ ១គ្រឿង បណ្តាលឲ្យបុរសម្នាក់ស្លាប់ រួចជ្រុលចង្កូតធ្លាក់ចូលទឹកបឹង ។
គ្រោះថ្នាក់ខាងលើនេះបានកើតឡើងកាលពីវេលាម៉ោង ៨ និង ៣០ នាទី ព្រឹកថ្ងៃទី២៤ កញ្ញា នេះនៅតាមផ្លូវជាតិលេខ 6A ក្រុម៦ ភូមិកៀនឃ្លាំង សង្កាត់ព្រែកលៀប ខណ្ឌឫស្សីកែវ ជាប់ផ្ទះសំណាក់ហេងមហាសាល ។
ប៉ូលិសនិយាយថា រថយន្តបង្កធុនដឹកអ្នកដំណើរចំណុះ ៥០នាក់ របស់ក្រុមហ៊ុន GST ពណ៌ស ស្លាកលេខភ្នំពេញ 3A 4841 អ្នកបើកបររត់បាត់ ។ អ្នករួមដំណើរសរុបប្រមាណ ៥០នាក់ ក្នុងនោះរងរបួសស្រាលម្នាក់ ។ ចំណែកម៉ូតូរងការខូចខាតម៉ាក CUB ជ្រុងពណ៌ទឹកប៊ិច ស្លាកលេខភ្នំពេញ 1T 8449 មុខរបរមន្ត្រីប៉ូលិសក្រសួងមហាផ្ទៃ ស្នាក់នៅសង្កាត់ព្រែកលៀប ស្លាប់នៅកន្លែងកើតហេតុ ។
ប៉ូលិសបញ្ជាក់ថា រថយន្តនេះមានចំណតនៅបេនឡានផ្សារថ្មី បានដឹកអ្នកដំណើរប្រមាណ ៥០នាក់ ទៅខេត្តព្រះវិហារ ។ ខណៈពេលធ្វើដំណើរតាមផ្លូវជាតិលេខ 6A ដល់ចំណុចខាងលើ រថយន្តក៏បើកវ៉ារថយន្តមួយគ្រឿង ហើយជ្រុលបុកម៉ូតូកំពុងធ្វើដំណើរច្រាសទិស បណ្តាលឲ្យរថយន្តជ្រុលចង្កូតធ្លាក់ទឹកបឹងតែម្តង ។ អ្នកដំណើរទាំងអស់ពុំរងគ្រោះថ្នាក់ធ្ងន់ធ្ងរទេ ប៉ុន្តែម្នាក់ៗភ័យស្ទើរលោះព្រលឹង ហើយវិលត្រឡប់មកភ្នំពេញវិញ ដើម្បីឲ្យក្រុមហ៊ុនសងថ្លៃសំបុត្ររថយន្ត ។
រថយន្តត្រូវបានប៉ូលិសចរាចរក្រុងស្ទូចយកទៅរក្សាទុកដោះស្រាយ ៕
No comments:
Post a Comment