ថ្ងៃ​សែន​ចូល​ឆ្នាំ​ចិន នៅ​កំពង់ចាម​គ្រោះថ្នាក់​ចរាចរណ៍​៤​លើក​, ស្លាប់​៥​នាក់​និង​របួស​ម្នាក់​

CEN
កំពង់ចាម: ប៉ូលីស​បានឱ្យដឹងថា កាលពី​ថ្ងៃ​ទី​១៣ ខែ​កុម្ភៈ ឆ្នាំ​២០១០ ចំ​ថ្ងៃ​សែន​ចូល​ឆ្នាំ​ចិន​កន្លងទៅនេះ មាន​គ្រោះថ្នាក់​ចរាចរណ៍​ចំនួន ៤​លើក បាន​បណ្តាលឱ្យ​មនុស្ស​ចំនួន ៥​នាក់​ស្លាប់ និង​ម្នាក់​បាន​រងរបួស​ធ្ងន់ នៅ​កន្លែង​ផ្សេងៗ​គ្នា តាម​បណ្តា​ស្រុក​មួយចំនួន ។ គ្រោះថ្នាក់​ទាំងនោះ ភាគច្រើន​បង្ក​ដោយ​ខ្លួនឯង និង​ការ​ស្រវឹងស្រា ។​
​ ​ប្រភពព័ត៌មាន ពី​សមត្ថកិច្ច​នៅ​តាម​បណ្តា​ស្រុក ដែល​កើតមាន​គ្រោះថ្នាក់​ចរាចរណ៍ បានឱ្យដឹងថា ក្នុង​ចំណោម​ស្រុក ដែល​មាន​គ្រោះ​ចរាចរណ៍​នេះ មាន​: ស្រ៊េក​ត្បូងឃ្មុំ​ស្លាប់​ចំនួន ២​នាក់​, ស្រុក​ព្រៃឈរ​ស្លាប់​ចំនួន​ម្នាក់​, ស្រុក​ចម្ការលើ​ស្លាប់​ចំនួន​ម្នាក់ និង​របួស​ម្នាក់ និង​ស្រុក​ក្រូចឆ្មារ​ស្លាប់​ចំនួន​ម្នាក់​ដែរ ។ ជនរងគ្រោះ​មាន​វយ័​ពី ១៩​ឆ្នាំ​រហូត​ដល់ ៨១​ឆ្នាំ ។ គ្រោះថ្នាក់​ទាំងនេះ មួយចំនួន​គឺ​បង្ក​ដោយ​ខ្លួនឯង ។​
​ ​លោក ជុំ ថា​ន់​នី នាយការិយាល័យ​ចរាចរណ៍ ជើងគោក​ខេត្តកំពង់ចាម បានឱ្យដឹងថា ខាង​លោក​នៅ មិនទាន់​សរុប​តួលេខ គ្រោះ​ចរាចរណ៍​សម្រាប់ ឱកាស​បុណ្យ​ចូល​ឆ្នាំ​ចិន​នោះទេ ។ មន្ត្រី​រូប​នោះ​រំលឹកថា គ្រោះថ្នាក់​ភាគច្រើន បង្ក​ស្លាប់​ដោយ​ខ្លួនឯង និង​ផ្តើមចេញពី​ការ​ស្រវឹង ៕