ដោយ កែវ និមល
លោក សុន ឆ័យ តំណាងរាស្រ្តគណបក្សសមរង្ស៊ី បានសរសេរលិខិតមួយនៅថ្ងៃ១៦ កុម្ភៈ ជូនលោក ស ខេង ឧបនាយករដ្ឋមន្រ្តីនិងជារដ្ឋមន្រ្តីក្រសួងមហាផ្ទៃ សុំឲ្យកែលម្អការងារប៉ូលិសចរាចរណ៍ផ្លូវគោកដែលលោកមានប្រសាសន៍ ថា មានចំនួនយ៉ាងច្រើនហើយបំពេញការងារមិនមានប្រសិទ្ធភាព។
តំណាងរាស្រ្ដគណបក្សសមរង្ស៊ី លោក សុន ឆ័យ
នៅក្នុងលិខិតចុះថ្ងៃទី១៦ កុម្ភៈ លោក សុន ឆ័យ បានសរសេរទៀតថា មានពេលខ្លះប៉ូលិសចរាចរណ៍មិនបានជួយសម្រួលការធ្វើចរាចរណ៍របស់ យានយន្តនានាទេ តែបែរជាបង្កការកកស្ទះទៅវិញ ហើយមានពេលខ្លះបានសម្លុតទារលុយអ្នកបើកបរយានយន្តនានាទៅវិញទៀត ផង។
លោក សុន ឆ័យ បានមានប្រសាសន៍ទាក់ទងនឹងលិខិតផ្ញើជូនលោកឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ ស ខេង ដូច្នេះ ៖ «យើង ឃើញសកម្មភាពក្រុមកុងត្រូលនគរបាលចរាចរណ៍ហ្នឹងគឺកើតមានច្រើនស្ទើរ គ្រប់ទីកន្លែង។ ពីមុននាយករដ្ឋមន្រ្តីធ្លាប់ប្រកាសម្ដងទៅក៏ស្ងាត់ ប៉ុន្តែឥឡូវហាក់ដូចជាលែងស្ដាប់បង្គាប់នរណាហើយ ហើយនាំគ្នាបង្កើតក្រុមចល័តក៏មាន ក្រុមកុងត្រូលតាមផ្លូវជាតិ តាមទីក្រុងគ្រប់ច្រកល្ហក ដើម្បីចាប់រថយន្ត ចាប់ម៉ូតូ ហើយជំរិតយកកម្រៃក្រៅផ្លូវការផ្ទាល់ខ្លួន អត់មានលិខិតស្នាម។ ផលិតផលកសិកម្ម គ្រាន់តែដឹកពីកន្លែងមួយទៅកន្លែងមួយហ្នឹងតាមចាប់ ធ្វើឲ្យទំនិញមានតម្លៃខ្ពស់ហួសហេតុនៅក្នុងទីផ្សារយើង ក្នុងស្ថានភាពសេដ្ឋកិច្ចលំបាកនេះ។ ភាពអនាធិបតេយ្យនេះមានលក្ខណៈខ្លះដូចជាចោរប្លន់តែម្ដង»។
No comments:
Post a Comment