Road Safety Awareness in Cambodia: សេចក្តីប្រកាសព័ត៌មាន សិក្ខាសាលាស្តីពីការលើកកម្ពស់ការយល់ដឹងអំពីការពាក់មួកសុវត្ថិភាព និងការមិនបើកបរក្រោមឥទ្ធិពលគ្រឿងស្រវឹង

ទីរួមខេត្តស្វាយរៀង ថ្ងៃទី ១៦ ខែកក្កដា ឆ្នាំ ២០១៤៖ ថ្ងៃនេះគណៈកម្មាធិការជាតិសុវត្ថិភាពចរាចរណ៍ផ្លូវគោក ហើយនិងសហភាពសហព័ន្ធយុវជនកម្ពុជាខេត្តស្វាយរៀង ដោយមានការឧ បត្ថម្ភពីអង្គការសុខភាពពិភពលោក តាមរយៈកម្មវិធីសុវត្ថិភាពចរាចរណ៍សកលរបស់ ប៊្លូមបឺគភីលែនត្រូភី (Bloomberg Philanthropies Global Road Safety Program) បានរៀបចំសិក្ខា សាលា ស្តីពីការលើកកម្ពស់ការយល់ដឹងអំពីការពាក់មួកសុវត្ថិភាពនិង ការបើកបរ ក្រោម ឥទ្ធិពល គ្រឿងស្រវឹងនៅទីរួមខេត្តស្វាយរៀង សិក្ខាកាមចូ លរួមមាន ប្រមាណជាង ២០០ នាក់ជាយុវជន នៃសហភាពសហព័ន្ធយុវជនកម្ពុជាខេត្តស្វាយរៀង។

សិក្ខាសាលានេះមានគោលបំណងបង្កើននូវការយល់ដឹងអំពីសុវត្ថិភាពចរាចរណ៍ដោយផ្តោតលើសារៈប្រយោជន៏នៃការពាក់មួកសុវត្ថិភាពចំពោះអ្នកបើកបរម៉ូតូនិងអ្នករួមដំណើរ ហើយនិងការ មិនបើកបរក្រោមឥទ្ធិពលគ្រឿងស្រវឹងចំពោះ អ្នកប្រើប្រាស់យានយន្តទាំងអស់។ សារពីរសំខាន់របស់សិក្ខាសាលានេះគឺ “ពាក់មួកសុវត្ថិភាពរាល់ពេលធ្វើដំណើរជិតឬឆ្ងាយ និងគ្រប់ពេលវេលា!” និង “បើពិសាគ្រឿងស្រវឹង កុំបើកបរ!”។ នៅក្នុងសិក្ខាសាលានេះក៏មានការផ្តល់ជូនមួកសុវត្ថិភាពមានគុណភាពខ្ពស់ចំនួន ២២០ មួកដល់យុវជននៃសហភាពសហព័ន្ធយុវជនកម្ពុជាខេត្តស្វាយរៀងផងដែរ។

នៅក្នុងប្រទេសកម្ពុជា ការស្លាប់ និងការរងរបួសដោយសារគ្រោះថ្នាក់ចរាចរណ៍គឺជាបញ្ហាសុខភាពសាធារណៈគួរឲ្យព្រួយបារម្មណ៍។ យោងតាមរបាយការណ៍បឋមរបស់ប្រព័ន្ធព័ត៌មានជនរងគ្រោះនិងគ្រោះថ្នាក់ចរាចរណ៍បានឲ្យដឹងថាក្នុងឆ្នាំ២០១៣ អ្នកស្លាប់ដោយសារគ្រោះថ្នាក់ចរាចរណ៍មានចំនួន ១៩៥០នាក់។ ជាមធ្យមក្នុងមួយថ្ងៃមានមនុស្សប្រមាណជាង ៥នាក់បានស្លាប់ នៅលើផ្លូវនៃប្រទេសកម្ពុជា។ ក្នុងចំណោមអ្នកស្លាប់ទាំង៥នាក់នោះ មានប្រមាណជា ៤នាក់ជាអ្នកបើកបរម៉ូតូ និង អ្នករួមដំណើរជាមួយ។ អ្នកប្រើប្រាស់ម៉ូតូគឺជាជនដែលងាយរងគ្រោះថ្នាក់ជាងគេដែលមានអ្នកស្លាប់រហូតដល់ទៅ ៧០%នៃអ្នកស្លាប់សរុប។ ភាគច្រើននៃអ្នកស្លាប់ទាំងអស់ដោយសារគ្រោះថ្នាក់ចរាចរណ៍ គឺជាយុវជនអាយុពី ១៥ទៅ ២៩ ឆ្នាំ (៥០%) ដែលជាការខាតបង់ដ៏ធំធេងនូវកំលំាងនៃការអភិវឌ្ឍន៏ប្រទេសជាតិ។

ដោយឡែកចំពោះខេត្តស្វាយរៀង អ្នកស្លាប់ដោយសារគ្រោះថ្នាក់ចរាចរណ៍ក្នុងឆ្នាំ ២០១៣មានចំនួន ៦៤នាក់។ ៣១% នៃអ្នកស្លាប់បណ្តាល មកពី ការបើកបរលើសល្បឿនកំណត់ ហើយ១៩% ទៀតបណ្តាលមកពីការបើកបរក្រោមឥទ្ធិពលគ្រឿង។ ៨៣% នៃអ្នកស្លាប់ជាអ្នកប្រើប្រាស់ម៉ូតូ ហើយភាគច្រើននៃជនរងគ្រោះមិនបានពាក់មួកសុវត្ថិភាពទេនៅពេលមានគ្រោះថ្នាក់កើត

ឡើង។ នេះគឺជាការបាត់បង់ដែលយើងអាចកាត់បន្ថយបាន ប្រសិនបើអ្នកប្រើប្រាស់ផ្លូវគ្រប់រូបគោរពច្បាប់ចរាចរណ៍ ហើយនិងមានការចុះប្រតិបត្តិការរឹតបន្តឹងច្បាប់ដ៏តឹងរ៉ឹង និងជាប់ជាប្រចាំពីកំលាំងនគរបាលចរាចរណ៍ជាតិខេត្ត-ក្រុង។

កត្តាហានិភ័យចំបងដែលរួមចំណែកនៅក្នុងការរងរបួស និងការស្លាប់ដោយគ្រោះថ្នាក់ចរាចរណ៍គឺឥរិយាបទមិនសមរបស់អ្នកប្រើប្រាស់ផ្លូវរួមមាន ការបើកបរលើសល្បឿនកំណត់ ការបើកបរក្រោមឥទ្ធិពលគ្រឿងស្រវឹង និងការមិនពាក់មួកសុវត្ថិភាពជាដើមនៅពេលធ្វើដំណើរទំាងអ្នកបើកបរ និងអ្នករួមដំណើរ។ ការរងរបួសក្បាលគឺជាមូលហេតុចំបងនៃការស្លាប់ និងពិការភាពចំពោះអ្នកប្រើប្រាស់ម៉ូតូនៅពេលគ្រោះថ្នាក់ចរាចរណ៍កើតឡើង។ ពាក់មួកសុវត្ថិភាព គឺជាមធ្យោបាយតែមួយគត់ដែលមានប្រសិទ្ធិភាពបំផុត ដែលអាចកាត់បន្ថយរបួសក្បាលធ្ងន់ធ្ងរ និងការស្លាប់ដោយរបួសក្បាលបាន ដែលបណ្តាលមកពីគ្រោះថ្នាក់ចរាចរណ៍នៅពេលធ្វើដំណើរតាមម៉ូតូ។

ច្បាប់ចរាចរណ៍ផ្លូវគោកថ្មីដែលដាក់បញ្ចូលមាត្រាតម្រូវឲ្យអ្នករួមដំណើរជាមួយត្រូវពាក់មួកសុវត្ថិភាព ហើយនិងការបង្កើនការផាកពិន័យ ការដាក់ទោសទណ្ឌចំពោះអ្នកបើកបរក្រោមឥទ្ធិពលគ្រឿងស្រវឹងត្រូវបានរំពឹងថានិងត្រូវបានអនុម័តក្នុងពេលឆាប់ៗខាងមុខនេះ។ ការអនុវត្តន៍ច្បាប់ ការផ្សព្វផ្សាយអប់រំសាធារណៈ រួមផ្សំជាមួយនិងការចុះប្រតិបត្តិការរឹតបន្តឹងច្បាប់ជាប់ជាប្រចាំ ដែលធ្វើឡើងដោយកំលាំងនគរបាលចរាចរណ៍ជាតិខេត្ត-ក្រុង និងចូលរួមចំណែកក្នុងការការពារ និងសង្រ្គោះអាយុជីវិតរបស់ប្រជាជនពីសោកនាដកម្មដែលអាចការ ពារបាននេះ។ ជាលទ្ធផលចំពោះការខឹតខំប្រឹងប្រែងរួមគ្នានេះ ហើយជាពិសេសដោយមានការចូលរួមយ៉ាងសកម្មពីយុវជននៃសហភាពសហព័ន្ធយុវជនកម្ពុជាខេត្តស្វាយរៀង យើងនិងអាចឈានទៅសំរេចបាននូវគោលបំណងទសវត្សរ៍សុវត្ថិភាពចរាចរណ៍ផ្លូវគោកក្នុងការកាត់បន្ថយការស្លាប់នៅក្នុងប្រទេស កម្ពុជាឲ្យបាន ៥០% នៅឆ្នាំ ២០២០ខាងមុខ ស្របតាមទស្សនវិស័យដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន “ថ្ងៃនេះ ថ្ងៃស្អែក កុំឲ្យមានគ្រោះថ្នាក់ចរាចរណ៍!”។