សិក្ខាសាលាថ្នាក់ជាតិមួយបានរៀបចំឡើងដោយគណៈកម្មាធិការជាតិសុវត្ថិភាពចរាចរណ៍
ផ្លូវគោក ដោយសហការជាមួយអង្គការដៃគូសុវត្ថិភាពចរាចរណ៍ផ្លូវគោកសកល
តាមរយៈមូលនិធិ សប្បុរសរបស់ប៊្លូមប៊ើក ដែលប្រព្រឹត្តទៅនាថ្ងៃទី១ ខែវិច្ឆិកា ឆ្នាំ២០១២ នៅសណ្ឋាគារភ្នំពេញ ក្រោមអធិបតីភាពរបស់ឯកឧត្ដម សួន រចនា រដ្ឋលេខាធិការក្រសួងសាធារណការនិងដឹកជញ្ជូន រួមជាមួយវត្តមានរបស់ ឯកឧត្ដម លោកជំទាវ មន្រ្តីជំនាញមកពីក្រសួងពាក់ពន្ធ័ តំណាងអង្គការកំពុងបំពេញការងារសុវត្ថិភាពចរាចរណ៍ផ្លូវគោក និងតំណាងក្រុមហ៊ុនឯកជន ជាច្រើនរូបទៀត
សរុបចំនួនប្រមាណ ៧០រូប។
គោលបំណងនៃសិក្ខាសាលានេះ គឺកសាងផែនការសកម្មភាពថ្នាក់ជាតិស្តីពីមួកសុវត្ថិភាព
ដែលមានលក្ខណៈពិស្តារ និងប្រកបដោយប្រសិទ្ធភាពគ្រប់គ្រាន់សម្រាប់រយៈពេលបីឆ្នាំ (២០១៣
ដល់២០១៥) ដែលជាផ្នែកមួយជួយឱ្យរាជរដ្ឋាភិបាល អាចសម្រេចផែនការបង្កើនអត្រាពាក់មួក សុវត្ថិភាពដល់១០០%
ទូទាំងប្រទេសត្រឹមឆ្នាំ២០២០ អ្វីជាពិសេសគឺសង្រ្គោះជីវិតអ្នកប្រើប្រាស់ផ្លូវគ្រប់រូប
ទាំងអ្នកបើកបរ និងអ្នករួមដំណើរតាមម៉ូតូ កុំឱ្យរងរបួសក្បាលធ្ងន់ធ្ងរនៅពេលដែលជួបឧប្បត្តិហេតុគ្រោះថ្នាក់ចរាចរណ៍។
តាមរបាយការណ៍ប្រព័ន្ធព័តមានជនរងគ្រោះនិងគ្រោះថ្នាក់ចរាចរណ៍ផ្លូវគោក
ឆ្នាំ២០១១ មានជនរងគ្រោះថ្នាក់ចរាចរណ៍ដល់ស្លាប់សរុបចំនួន
១៩០៥នាក់ ក្នុងនោះ អ្នកប្រើប្រាស់ម៉ូតូ (អ្នកបើកបរ និងអ្នករួមដំណើជាមួយ)
បានបាត់បង់ជីវិតរហូតដល់ ១២៦២នាក់ ដែលក្នុងនោះប្រមាណ ៧០% មានរបួសក្បាល។ របាយការណ៍នេះក៏បានរកឃើញផងដែរថាអ្នករួមដំណើរពីក្រោយមាន អត្រារងរបួសក្បាលខ្ពស់ជាងអ្នកបើកបរម៉ូតូទៅទៀត។ ការសិក្សាជាអន្តរជាតិមួយបានបញ្ជាក់ថា ការពាក់មួកសុវត្ថិភាពឱ្យបានត្រឹមត្រូវអាច
កាត់បន្ថយការប្រឈមនឹងការស្លាប់ដោយសាររបួសក្បាលបានប្រមាណជិត៤០% ហើយព្រមទាំងជួយកាត់បន្ថយការប្រឈមទៅនឹងរបួសក្បាលធ្ងន់ធ្ងរបានខ្ពស់ជាង៧០% ។
ក្នុងឆ្នាំ២០១១ អង្គការជនពិការអន្តរជាតិ សហការជាមួយសកលវិទ្យាល័យចនហប់គីន ក្នុងការអង្កេតលើការពាក់មួកសុវត្ថិភាពក្នុងខេត្ត/ក្រុងចំនួន៣
រួមមានខេត្តកណ្ដាល កំពង់ស្ពឺនិងរាជធានីភ្នំពេញ លទ្ធផលបានបង្ហាញថា អត្រាពាក់មួកសុវត្ថិភាពក្នុងចំណោមអ្នកបើកបរម៉ូតូ មាន៦៣% រីឯអ្នករួមដំណើរ (អ្នកជិះពីក្រោយ) គឺមានត្រឹមតែ៦% ប៉ុណ្ណោះ ។
សិក្ខាសាលានេះបានប្រព្រឹត្ដទៅដោយមានការពិភាក្សា និងផ្ដល់យោបល់យ៉ាងផុលផុស ពីក្រុមការងារបច្ចេកទេស និងអ្នកជំនាញដែលបានចូលរួម មានជាអាទិ៍អនុសាសន៍គន្លឹះ
និងសកម្មភាពយុទ្ធសាស្រ្តទាំងឡាយ ដែលជាត្រីវិស័យសម្រាប់អនុវត្តជំរុញ ធ្វើយ៉ាងណាឱ្យអត្រា
ពាក់មួកសុវត្ថិភាពមានការកើនឡើងស្របទៅតាមទឹសដៅដែលបានកំនត់។
គួររំលឹកដែរថា ប្រទេសកម្ពុជាក៏ដូចជាបណ្តាប្រទេសជាច្រើនទៀតនៅលើសកលលោក បានប្តេជ្ញា
កាត់បន្ថយចំនួនអ្នកស្លាប់ដោយសារគ្រោះថ្នាក់ចរាចរណ៍ ឱ្យបាន៥០%ត្រឹមឆ្នាំ២០២០តាមរយៈការអនុវត្តន៍ផែនការជាតិរបស់ខ្លួន ស្របទៅនឹងផែនការទសវត្សរ៍សកម្មភាពសុវត្ថិភាពចរាចរណ៍ផ្លូវគោក របស់អង្គការសហប្រជាជាតិ ឆ្នាំ ២០១១-២០២០៕
សម្រាប់ព័ត៌មានបន្ថែមសូមធ្វើការទាក់ទង៖
លោកស្រី ម៉ែនច័ន្ទសុកុល ប្រធានផ្នែកទំនាក់ទំនងអន្តរជាតិ
អគ្គលេខាធិការដ្ឋាន នៃគណកម្មាធិការជាតិសុវត្ថិភាពចរាចរណ៍ផ្លូវគោក
ទូរស័ព្ទៈ 077 777 795
ហេ្វសប៊ុកៈ NRSC-Cambodia
No comments:
Post a Comment