សម្តេច​ហ៊ុន សែនៈ ពាក់​មួក​សុវត្ថិ​ភាព​គឺជា​កាតព្វកិច្ច​ប្រជាពលរដ្ឋ​គ្រប់​រូប

ដោយ រស់ ឌីណា
០៦-០១-២០០៩
សម្តេច ​នាយក​រដ្ឋ​មន្រ្តី​ហ៊ុន សែន​ បាន​អំពាវ​នាវ​ជាថ្មី​ នៅ​ថ្ងៃ​អង្គារ ទី​៦ ខែ​មករា​នេះ ចំពោះ​​អ្នក​​បើក​បរ​ទោ​​ចក្រ​យាន​យន្ត​​ទាំង​អស់​ សុំ​​អោយ​ពាក់​មួក​ការ​ពារ​សុវត្ថិភាព​​អោយ​បាន​គ្រប់​គ្នា។ កា​រ​តម្រូវ​អោយ​ពាក់​មួក​សុវត្ថិភាព​​បាន​ចូល​ជា​ធរមាន​ចាប់​តាំង​ពី​ ថ្ងៃទី​១ ខែមករា ឆ្នាំ​២០០៩​។ សម្តេច​មាន​ប្រសាសន៍​​ថា​ សម្តេច​​សង្កេត​ឃើញ​​​មាន​អ្នកបើក​បរ​ម៉ូតូ​ពាក់​មួក​សុវត្ថិភាព​ ត្រឹម​តែ​​៥០%​ប៉ុណ្ណោះ​​។ សម្តេច​ក៏​បាន​ស្នើសុំអ្នក​ផ្សេង​ទៀត ទិញ​មួក​ពាក់​​អោយ​បាន​ឆាប់​រហ័ស​​បំផុត។​​

«ខ្ញុំ​នៅ​តែ​អំពាវនាវ​ ដល់​អ្នក​បើក​បរ​ម៉ូតូ​ទាំង​អស់ រួម​ទាំង​អ្នក​រួម​ដំណើរ​ជាមួយ​ សុំ​ពាក់​មួក​សុវត្ថិភាព ដើម្បី​ការ​ពារ​អាយុជីវិត។ នេះ​មិន​មែនជា​បញ្ហា​របស់​ខ្ញុំ​នោះទេ ខ្ញុំ​មិន​ងាយ​​​​ស្លាប់​នៅ​​ក្នុង​គ្រោះ​ថ្នាក់​ចរាចរណ៍ណាស់ ​ព្រោះ​​មុន​នឹង​បុក​អ្វី​មួយ វា​បុក​​ក្រុម​ការ​ពារ​ខាង​មុខ​មុន ហើយ​ភាគ​ច្រើន​ ផ្លូវ​ត្រូវ​បាន​បិទ​ទៀត​ផង​»។​ ម្យ៉ាង​ទៀត សម្តេច​ហ៊ុន សែន​ក៏​បាន​សំណូម​ពរ​ដល់​អ្នកលក់មួក មិន​ត្រូវ​ឆ្លៀត​​ឱកាស​នេះ តំឡើង​ថ្លៃ​មួក​នោះទេ។​